«ԲՀԿ-Ն ՆՈՐԻՑ ԿՄՆԱ ԱՆՀԱՍԿԱՆԱԼԻ ԱՅԼԸՆՏՐԱՆՔ, ԹԵ ԿԴԱՌՆԱ ԸՆԴԴԻՄՈՒԹՅՈՒՆ, ԴԱ ԱՐԴԵՆ ԻՐԵՆՑ ՈՐՈՇԵԼԻՔ ԳՈՐԾՆ Է»

«ԲՀԿ-Ն ՆՈՐԻՑ ԿՄՆԱ ԱՆՀԱՍԿԱՆԱԼԻ ԱՅԼԸՆՏՐԱՆՔ, ԹԵ ԿԴԱՌՆԱ ԸՆԴԴԻՄՈՒԹՅՈՒՆ, ԴԱ ԱՐԴԵՆ ԻՐԵՆՑ ՈՐՈՇԵԼԻՔ ԳՈՐԾՆ Է»

Դժվար թե մեկ օր առաջ որեւէ մեկը կարող էր կռահել ներքաղաքական նման զարգացումներ, սակայն ՀՀԿ խորհրդի նիստին հնչած ՀՀ նախագահ, Հայաստանի Հանրապետական կուսակցության նախագահ ՍԵՐԺ ՍԱՐԳՍՅԱՆԻ ելույթը ցնցեց մի շարք քաղաքական ուժերի` «Բարգավաճ Հայաստան» կուսակցության գլխավորությամբ: Այս մասին «Իրավունքը» զրուցեց ԱԺ ՀՀԿ խմբակցության պատգամավոր ՍՈՒՔԻԱՍ ԱՎԵՏԻՍՅԱՆԻ հետ:

- Պարոն Ավետիսյան, չե՞ք կարծում, որ ՀՀ նախագահի հնչեցրած կոշտ գնահատականները «Բարգավաճ Հայաստան» կուսակցության եւ ԲՀԿ առաջնորդի հասցեին, կարող է բերել քաղաքացիական բախումների:

- Չեմ կարծում, որովհետեւ նախեւառաջ քաղաքացիական հակասության խնդիր չկա: Ամեն ինչ արվելու է օրենքի սահմաններում: Եվ, իրոք, հասարակությանն արդեն ժամանակն է ամեն ինչ ճշմարիտը ասել, որովհետեւ շատ դեպքերում թողտվությունը բերում է հասարակության եւ քաղաքականության մեջ շատ ծանր հետեւանքների: Իսկ այդ ծանր հետեւանքներից խուսափելու համար հարկավոր է արդեն որոշակի կոնկրետ քայլեր ձեռնարկել:

- Իսկ ՀՀԿ խորհրդի նիստի ժամանակ որեւէ անդրադարձ եղե՞լ է ՀՀ առաջին նախագահի հնչեցրած կարծքիների մասին` Ցեղասպանության 100-րդ տարելիցին նվիրված համահայկական հռչակագրի վերաբերյալ, որտեղ վերջինս հռչակագրի պահանջատիրության թեզը հակասահմանադրական է համարում:

- Այդ մասին չի եղել քննարկումներ խորհրդի նիստում, որովհետեւ նիստի առանցքում կոնկրետ այդ գնահատականներն էր կոնկրետ քաղաքական ուժի եւ քաղաքական ուժի ներկայացուցչի վերաբերյալ: Այսինքն` մնացած հարցերը մանրամասնորեն չենք քննարկել:

- Ըստ Ձեզ, այս ելույթից հետո կարո՞ղ ենք ասել, որ այլեւս ԲՀԿ-ն ընդդիմություն կդառնա:

- Պարզ ասեմ` դա արդեն ԲՀԿ-ի գործն է: Ընդամենը ՀՀ Նախագահը, ՀՀԿ Գործադիր մարմինը եւ հետո խորհուրդը գնահատական է տվել այն վերջին դրսեւորումներին, որ կատարվել է ԲՀԿ-ի եւ նրա ղեկավարի կողմից: Այսինքն` սրանից հետո ԲՀԿ-ն նորից կմնա անհասկանալի այլընտրանք, թե կդառնա ընդդիմություն, դա արդեն իրենց որոշելիք գործն է:

ՀՐԱՆՏ ՍԱՐԱՖՅԱՆ