ԺԻՐԱՅՐ ՍԵՖԻԼՅԱՆԻՆ ՉԻ ՀԵՏԱՔՐՔՐՈՒՄ` ԻՆՉ ԿՄՏԱԾԵՆ ԱԶԵՐԻՆԵՐԸ ՄԵՐ ՄԱՍԻՆ

ԺԻՐԱՅՐ ՍԵՖԻԼՅԱՆԻՆ ՉԻ ՀԵՏԱՔՐՔՐՈՒՄ` ԻՆՉ ԿՄՏԱԾԵՆ ԱԶԵՐԻՆԵՐԸ ՄԵՐ ՄԱՍԻՆ

Հունվարի 31-ին Բերձորում «Հիմնադիր խորհրդարանի» անդամների  նկատմամբ ԼՂՀ ոստիկանության կիրառած բռնությունը մեծ արձագանք է գտել  ադրբեջանական մամուլում: Բնականաբար, ադրբեջանցիներն այս դեպքերը ներկայացրել են բացասական երանգավորումով` գործածելով «Արցախն օկուպացրած ռեժիմի կողմից   իրականացվել են անկարգություններ» եւ նման այլ  բառակապակցություններ: «Իրավունքը» «Հիմնադիր խորհրդարանի» քարտուղարության համակարգող, Շուշիի առանձնակի գումարտակի  հրամանատար Ժիրայր Սեֆիլյանից հետաքրքրվեց`  իրեն վատ չի՞ զգում, որ ինքը եւ «Հիմնադիր խորհրդարանի» անդամները  ադրբեջանցիների բերանը լեզու դրեցին: «Ես ինձ վատ եմ զգում, որ մենք երկար տարիներ հանդուրժում ենք երկրի ղեկը տականքին փոխանցելուն: Վատ եմ զգում, որ մեր երկիրը մարդաթափվում  է: Մեզ հետաքրքրողը մեր ներքին ամրությունն է, այլ ոչ թե` ազերիները կամ աշխարհն  ի՞նչ կարող են ասել մեր մասին: Այն օրվանից , երբ ԵՏՄ ենք մտել, Արցախի հանրապետության անկախության քարոզարշավով զբաղվելը անհեթեթություն է»,- պատասխանեց ազատամարտիկը, ապա հավելեց, որ երկու պետություն խաղալու մարտավարությունը  հօդս է ցնդելու:

«Հիմնադիր խորհրդարանի» քարտուղարության համակարգողը կարծում է, որ պետք  է օր առաջ սկսել Արցախը Հայաստանին միացնելու գործընթացը:

Մեր դիտարկմանը, թե շրջանառվող լուրերի համաձայն` «Հիմնադիր խորհրդարանը» հովանավորվում է դրսից,  Ժիրայր Սեֆիլյանը խնդրեց փաստերով խոսել: «Մենք նյութական լուրջ խնդիրներ ունենք եւ դիմում ենք մեր ժողովրդին` օժանդակել մեզ: Մեր միակ աղբյուրը մեր ժողովուրդն է» ,- եզրափակեց ազատամարտիկը:

Հետաքրքիրն այն է, որ ազատամարտիկը ոգեւորված եւ պաթոսով է խոսում մեր երկրի ներքին ամրության մասին, սակայն հենց «Հիմնադիր խորհրդարանն» է Արցախին փորձում ներքաշել Հայաստանի ներքաղաքական խնդիրների հորձանուտ` չմտածելով թե ինչ մեսիջ է սրանով ուղարկում ամեն պահի մեր անհաջողության վրա հրճվող Ադրբեջանին:

ՍՈՆԱ ԴԱՎԹՅԱՆ