«ՈՉ ՄԻ ՌԵԿՏՈՐ, ԴԱՍԱԽՈՍ ԿԱՄ ՊՐՈՖԵՍՈՐ ՉԻ ԿԱՐՈՂ ԻՐԵՆ ՎԵՐ ԴԱՍԵԼ ՕՐԵՆՔՆԵՐԻՑ»

«ՈՉ ՄԻ ՌԵԿՏՈՐ, ԴԱՍԱԽՈՍ ԿԱՄ ՊՐՈՖԵՍՈՐ ՉԻ ԿԱՐՈՂ ԻՐԵՆ ՎԵՐ ԴԱՍԵԼ ՕՐԵՆՔՆԵՐԻՑ»

Հայաստանի պետական ճարտարագիտական համալսարանում շարունակում են «եռալ» նոր սկանդալներ: Մեծ աղմուկ հանած սեքս-սկանդալին այժմ փոխարինելու է եկել բուհի ռեկտորի պաշտոնակատար Հովհաննես Թոքմաջյանի եւ ուսանողական խորհրդի միջեւ եղած հակասությունը, իսկ կռվասեղանին դրված է ուսանողական կառույցի ղեկավարումը։ Այս մասին այսօր ՀՀ կառավարության նիստից հետո իր մտահոգություններով կիսվեց նաեւ ՀՀ ԿԳ նախարար ԱՐՄԵՆ ԱՇՈՏՅԱՆԸ. «Բուհը հերթական անգամ այս ամիսների ընթացքում հայտնվեց թվով երրորդ, թե չորրորդ սկանդալում: Կարծում եմ` ղեկավարության պարտականությունն է ապահովել բուհի բարի համբավը եւ բարոյահոգեբանական առողջ մթնոլորտը, ինչպես նաեւ նորմալ ուսումնական գործընթացի իրականացումը: Նախարարության կողմից ստացված բողոքներին ի արձագանք կատարել ենք ուսումնասիրություններ, որոնց արդյունքներից երկուսի մասին արդեն տեղեկացրել ենք ձեզ: ԿԳ նախարարությունը, որպես լիազոր պետական մարմին, բացառապես առաջնորդվելու է ՀՀ օրենսդրությամբ եւ հուսով եմ, որ մոտ ապագայում այդ խնդիրն իր վերջնական կարգավորումը կստանա: Ոչ մի ռեկտոր, դասախոս կամ պրոֆեսոր չի կարող իրեն վեր դասել օրենքներից եւ ոչ մի ուսանող չի կարող իրեն վեր դասել օրենքներից»: Ապա հավելեց. «Ինչպես ձեզ, այնպես էլ մեզ հուզում է բուհի իմիջը, հատկապես այն սկանդալների շարքը, որ տեղի է ունենում այդ բուհում: Մտահոգիչ է կառավարման որակի եւ արդյունավետության տեսակետից, մտահոգիչ է բուհում բարոյահոգեբանական մթնոլորտի առողջացմանն ուղված անհապաղ միջոցառումների իրականացման տեսակետից եւ կարծում եմ, որ այդտեղ միասին ձեր օգնությամբ կիրականցնենք հանրային հաշվետվության եւ հանրային  մոնիթորինգի գործընթաց»: Թե, ի վերջո, ո՞րն է ՀՊՃՀ-ի շարունակական ձախորդությունների պատճառը, ըստ ԿԳ նախարարի. «Այնտեղ կա լրջագույն խնդիր: Կարծում եմ, որ բոլոր դեպքերում վերջին ժամանակահատվածում ինչ-որ շատ են «չեպեները» Պոլիտեխնիկում: Սա ակնհայտ է, իսկ ինչո՞ւ է այդպես` ես ունեմ իմ կարծիքը, որն այս պահին մասնավոր է, բայց երբ համապատասխան ուսումնասիրությունները կատարվեն եւ պատճառները միս ու արյուն ստանան, ապա կտեսնեք, որ ոչ մի գործողություն անպատիժ կրթության ոլորտում չի մնա, անկախ նրանից ով է արել եւ ինչ է արել, չկան արտոնյալներ եւ չեն կարող լինել», - եզրափակեց Ա.Աշոտյանը:

ՀՐԱՆՏ ՍԱՐԱՖՅԱՆ