ՄՈՎՍԻՍՅԱՆԸ ԲՈՒՆԴԵՍԼԻԳԱՅՈՒՄ ՀՆԱՐԱՎՈՐ Է ՓՈԽԱՐԻՆԻ ՄԽԻԹԱՐՅԱՆԻՆ

ՄՈՎՍԻՍՅԱՆԸ ԲՈՒՆԴԵՍԼԻԳԱՅՈՒՄ
ՀՆԱՐԱՎՈՐ Է ՓՈԽԱՐԻՆԻ ՄԽԻԹԱՐՅԱՆԻՆ

Հայաստանի ազգային ընտրանու հարձակվող Յուրա Մովսիսյանը տեւական ժամանակ է, ինչ գտնվում է գերմանական, անգլիական եւ ամերիկյան մի քանի ակումբների ուշադրության կենտրոնում: Ըստ որոշ աղբյուրների` Մովսիսյանի տեղափոխությունը այլ ակումբ անխուսափելի է. միայն ժամանակի խնդիր է, թե երբ Մովսիսյանը կվճռի հեռանալ Մոսկվայի "Սպարտակից":
Բայց ժամանակի հետ մեկտեղ` այդ հնարավոր տրանսֆերային տարբերակներն ավելանում են, այնպես որ, հարկ եղած դեպքում Մովսիսյանը կարող է հարմար ընտրություն կատարել: Sportbox-i փոխանցմամբ` Յուրան արդեն նախնական համաձայնություն է տվել գերմանական "Հանովերին":

Ռուսական կայքը մասնավորապես նշում է. "Արտյոմ Ձյուբային կորցնելու պատճառով սթրեսային վիճակում գտնվող "Սպարտակի" տրամադրության տակ կմնան տարբեր ոճեր ունեցող երկու հարձակվողներ` Յուրա Մովսիսյանն ու երիտասարդ Դենիս Դավիդովը: Սակայն "Սպարտակի" համար դա քիչ է: Մովսիսյանը հաճախ է վնասվածք ստանում, բացի այդ, նա լավ առաջարկ է սպասում ամառային տրանսֆերային պատուհանի ժամանակ":
Մինչ Մովսիսյանին բանավոր շտապում են "տեղափոխել" Բունդեսլիգա, նույն եռանդով էլ փորձում են Հենրիխ Մխիթարյանին տեղափոխել, բայց արդեն Բունդեսլիգայից: Պարբերաբար նոր, այսպես կոչված, "վարկածներ ու փաստեր են" հայտնվում, որոնք իբրեւ թե բացահայտում են գերմանական ակումբի ներքին խոհանոցային հարցերը: Վերջ դնելու համար այն բոլոր խոսակցություներին, թե Մխիթարյանը թիմում խնդիրներ ունի եւ չի ցանկանում կարիերան շարունակել գերմանական ակումբում, Դորտմունդի "Բորուսիայի" գործադիր տնօրեն Հանս-Յոահիմ Վատցկեն մեկնաբանել է. "Հնարավոր է` կան խնդիրներ "Բորուսիայի" եւ Մինո Ռայոլայի միջեւ, սակայն մենք ոչ մի խնդիր չունենք Հենրիխ Մխիթարյանի հետ": Ավելի վաղ Մխիթարանի գործակալ Մինո Ռայոլան հայտարարել էր, որ Մխիթարյանի ծառայություններով հետաքրքրված է Թուրինի "Յուվենտուսը", եւ հայ ֆուտբոլիստը ամռանը կփոխի ակումբը: "Մեծ ֆուտբոլիստները հազվադեպ են թիմ փոխում ձմռանը: Մխիթարյանը ցանկություն է հայտնել "Բորուսիան" լքել այս ամռանը: Տեսնենք",- Ռայոլանի խոսքն է փոխանցում Calciomercato կայքը: Իսկ Հենրիխ Մխիթարյանը բոլոր խոսակցություներին վերջ դնելու համար նպատակահարմար է գտել դիմել գերմանական ակումբի երկրպագուներին` հայտնելով հավատարմությունը թիմին. "Սրտանց ցանկանում եմ ասել, որ ես ամբողջովին կենտրոնացած եմ "Բորուսիայում" իմ պարտականությունների վրա: Այո, այս պահին մենք բարդ դրությունում ենք Բունդեսլիգայում, սակայն միասին մենք կարող ենք հաղթահարել այն: Իմ սիրտն ու հոգին "Բորուսիայի" հետ է",- "Ֆեյսբուքում" գրել է Մխիթարյանը:

ՔՐԻՍՏԻՆԵ ՊԵՏՐՈՍՅԱՆ