ԻՆՉ ԿԱՐԾԻՔ ՈՒՆԻ ԱՎԵՏԻՍՅԱՆՆԵՐԻ ԻՐԱՎԱՀԱՋՈՐԴՆԵՐԻ ՓԱՍՏԱԲԱՆԸª ՈՃՐԱԳՈՐԾՈՒԹՅԱՆ ԴՐԴԱՊԱՏՃԱՌՆԵՐԻ ՄԱՍԻՆ

ԻՆՉ ԿԱՐԾԻՔ ՈՒՆԻ ԱՎԵՏԻՍՅԱՆՆԵՐԻ ԻՐԱՎԱՀԱՋՈՐԴՆԵՐԻ ՓԱՍՏԱԲԱՆԸª
ՈՃՐԱԳՈՐԾՈՒԹՅԱՆ ԴՐԴԱՊԱՏՃԱՌՆԵՐԻ ՄԱՍԻՆ

"Իրավունքի" զրուցակիցն է` հունվարի 12-ին Գյումրիում դաժանաբար սպանված Ավետիսյանների ընտանիքի իրավահաջորդների փաստաբան ԵՐԵՄ ՍԱՐԳՍՅԱՆԸ: Փաստաբանն արդեն գործի մեջ է, ուստիեւ` նախ փորձեցինք պարզել նրա գոնե նախնական պատկերացումները` այդ ոճրագործության հիմնական հարցի մասինª ինչո՞ւ դա տեղի ունեցավ, որո՞նք էին հավանական դրդապատճառները:
-Այսպիսի հանցագործությունը կա՛մ կատարվում է հատուկ պլանավորված` ելնելով ինչ-ինչ դրդապատճառներից, որը որոշակի նախապատրաստական փուլ է ունենում. այդպիսի վարկածը պարտավոր ենք չբացառել: Կա՛մ էլ, եթե մի պահ ընդունենք այն վարկածը, թե Պերմյակովը զոհերի տուն մտել է` ջուր խմելու համար, եւ հետագայում վախից ելնելով է արարքը կատարել, ապա այս դեպքում պետք է հոգեբանական որոշակի շեմ անցներ` այդ քայլերին դիմելու համար: Մինչդեռª մարդու վրա կրակել եւ հատկապես մանկահասակ երեխային սվինով հարվածել` քչերը կարող են: Դա հոգեբանական լուրջ հարց է, եւ այդ առումով գտնում եմ, որ դատահոգեբուժական փորձաքննություն, այնուամենայնիվ` անհրաժեշտ է, թեկուզ բացառելու համար, որ նա այդ արարքը կատարել է անմեղսունակության վիճակում, ինչը նույնպես կարեւոր է գործի համար: Իսկ անմեղսունակությունը պետք է որոշեն փորձագետները, որոնք կարող են անգամ պարզել, որ նա ունի որեւէ հոգեկան խնդիր, հիվանդություն, բայց հանցագործության կատարման պահին անմեղսունակ չի եղել: Բայց ասեմ, որ իրադարձությունների այն ընթացքը, որն այս պահին հայտնի է մեզ, վկայում է մարդասպանի գիտակցված գործողությունների մասին:
- Այնուամենայնիվª տարբեր լրատվամիջոցները մեկ անգամ չէ, որ ներկայացրել են, թե Վալերի Պերմյակովը հիվանդ է օլիգոֆրենիայով: Որքանո՞վ այն կարող է առնչություն ունենալ նրա մեղսունակության կամ անմեղսունակության հետ:
- Դա դեռ լրատվական միջոցների մակարդակով տարածված տեղեկություն է: Համենայնդեպս, այն կադրերը, որոնք մենք ենք տեսել, թույլ չեն տալիս մեզ առաջին հայացքից ասել, որ նա հոգեկան հիվանդ է: Ամեն դեպքումª օլիգոֆրենիայի շատ սուր վիճակը կզգացվեր նրա մոտ, բայց կարծես թե նման հատկանիշներ չենք տեսնում: Համենայնդեպսª գուցե կան որոշակի հոգեկան խնդիրներ: Օլիգոֆրենիան մի քանի աստիճան ունի, որոնցից մեկն էլ, օրինակ, դեբիլությունն է, բայց դա չի նշանակում, որ յուրաքանչյուր դեպքում դեբիլությունն անձին զրկում է իր գործողությունների վտանգավորությունը գիտակցելու կամ դրանք ղեկավարելու ունակությունից:
- Ըստ Ձեզ` ինչո՞վ կարելի է բացատրել ոճրագործի այն քայլը, որ նա դեպքի վայրում  թողել է իր կոշիկները եւ զինվորական համազգեստը:
- Նման օրինակներ շատ-շատ են լինում, թեեւ, իհարկե, կոնկրետ այս դեպքը քիչ հանդիպող է: Համենայնդեպս, այդ հանգամանքը եւս խոր քննության անհրաժեշտություն ունի, քանի որ այնպես չէ, որ մենք միանշանակ այդ փաստն ընդունում ենք: Պետք է քննության առարկա դառնա այն հանգամանքը, թե ինչու է այդ հագուստը հայտնվել այնտեղ կամ ինչու է այդքան բացահայտորեն թողնվել դեպքի վայրում:
- Դուք խոսել եք զոհերի հարազատների հետ: Հնարավո՞ր է, որ սպանվածներից որեւէ մեկը ճանաչած լիներ ոճրագործին. հարազատները կարող էին այդ մասին իմանալ:
- Համենայնդեպս ինձ հարազատները նման տվյալներ չեն հայտնել: Իրենց համար, ինչպես յուրաքանչյուրիս համար, այսօր անհայտ վիճակ է: Այսօր, երբ ես արդեն ներգրավվել եմ գործում` որպես տուժողների իրավահաջորդների ներկայացուցիչ, հիմնական խնդիրը եւ, կոպիտ ասած` առաջադրանքը, որը կա իմ առջեւ, դա համապատասխան միջնորդություններով աջակցելը, նպաստելը, ինչո՞ւ չէ` նաեւ պարտադրելն է, որպեսզի ամբողջությամբ բացահայտվի այս գործը: Ի վերջո, տուժողների իրավահաջորդների բուն նպատակն է` պարզել իրականությունն ամբողջությամբ: Եվ մենք այսօր պատրաստվում ենք միջնորդություններ ներկայացնել:
- Ի՞նչ միջնորդություններ եք ներկայացնելու:
- Միջնորդությունները հիմնականում ուղղված են գործի մի շարք էական հանգամանքների բացահայտմանը: Նշված են որոշակի գործողություններ, որոնց միջոցով կարելի է հասնել այդ հանգամանքների բացահայտմանը: Չի բացառվում, որ դրանց մի մասն անգամ արդեն իսկ կատարված լինեն, սակայն, քանի որ օրենքով սահմանված կարգով այս պահին մենք դրանց մասին չգիտենք, ուստի ապահովության համար կմիջնորդենք:
- Ո՞րն է ըստ Ձեզ այդ ողբերգության ամենահավանական վարկածը:
- Այս պահի դրությամբ ամենահավանական վարկածի մասին խոսել չեմ կարող, որովհետեւ մենք պարտավոր ենք նախ քննության առնել բոլոր վարկածները:

ԻԼՈՆԱ ԱԶԱՐՅԱՆ