ՎՐԱՍՏԱՆԻ ՆՈՐ ՍՅՈՒՐՊՐԻԶՆԵՐԸ

ՎՐԱՍՏԱՆԻ ՆՈՐ ՍՅՈՒՐՊՐԻԶՆԵՐԸ

Հավաստի աղբյուրների փոխանցմամբª Վրաստանում վերջին ժամանակներս ակտիվ լուրեր են շրջանառվում այն մասին, որ այդ երկրի տարածքով անցնող բեռնափոխադրող մեքենաների հետ կապված` որոշակի օրենսդրական հստակեցումների կարիք կա:
Այդ թեմայով զբաղվող վրացական որոշ օղակներ այն համոզմունքին են, որ որոշակի նորմատիվներից ավելի քաշող բեռնափոխադրող ավտոմեքենաները լրջորեն վնասում են Վրաստանի ասֆալտապատ ճանապարհները: Այսինքն, որ կոնկրետ մեքենաների տեխնիկական տվյալներից ելնելովª սահմանվի բեռի քաշի թույլատրելի առավելագույն քանակություն:
Ընդ որում, ըստ մեր աղբյուրի, այդ արգելքը ավելի շատ թուրքական ավտոմեքենաների դեմ է, որոնք հազարներով եւ գերբեռնված Վրաստանով անցնում են Ռուսաստան: Իսկ իմաստն այն է, որ փորձեն այդ բեռները Վրաստանում ավտոմեքենաներից անցկացնել երկաթուղային փոխադրման, ինչը կբարելավի մեռյալ վիճակում գտնվող վրացական երկաթուղային համակարգը: Այսինքն, որ Բաթումում բեռները բարձեն վագոններ եւ վրացական ու ադրբեջանական երկաթուղիներով հասցնեն Ռուսաստան: Դա համարվում է վնասաբեր. հակառակ պարագայում թուրքական բեռնափոխադրողները վաղուց կանցնեին այդ մեխանիզմին: Եվ ահա Վրաստանում մտածում են դա պարտադրել օրենքով. արհեստականորեն փոքրացնել ավտոբեռնափոխադրումների ծավալները, որի դեպքում երկաթուղին կդառնա ավելի շահավետ:
Միգուցե իրո՞ք դա ուղղված է հենց թուրքական բեռների դեմ, որոնք իրականում բավականին մեծ ծավալներով Վրաստանով գնում են Ռուսաստան: Բայց փաստ է, որ նման կարգավորումը մեխանիկորեն կազդի նաեւ Վրաստանով Հայաստանից Ռուսաստան տարվող-բերվող բեռների վրա եւս: Ընդ որումª հայկական բեռներն այլընտրանքիցª ադրբեջանական երկաթուղուց օգտվելու տարբերակ չունեն, այսինքնª միանգամից կհայտնվենք բեռնափոխադրումների ծախսերի աճի փաստի առաջ: Տեղյա՞կ են արդյոք վերոնշյալ  խնդրից ՀՀ տրանսպորտի եւ կապի նախարարությունում, արդյոք դա որեւէ կերպ կարո՞ղ է ազդել մեր բեռնափոխադրումների ինքնարժեքի վրա, փորձեցինք պարզել նախարարությունից, որտեղից մեզ խնդրեցին գրավոր հարցը ուղարկել: Եվ մինչ կստանանք նախարարության պարզաբանումը, հույս հայտնենք, որ մեր պատկան կառույցը հասցրել է տեղեկանալ նման հեռանկարին եւ միջոցներ ձեռնարկել:

ԻԼՈՆԱ ԱԶԱՐՅԱՆ