51-ԱՄՅԱ ԿՆՈՋ ԴԱԺԱՆ ՍՊԱՆՈՒԹՅԱՆ ՄԱՆՐԱՄԱՍՆԵՐԸ

51-ԱՄՅԱ ԿՆՈՋ ԴԱԺԱՆ
ՍՊԱՆՈՒԹՅԱՆ ՄԱՆՐԱՄԱՍՆԵՐԸ

Փարաքար գյուղի բնակիչները մինչ օրս ցնցված են փետրվարի 5-ին տեղի ունեցած դաժան սպանությունից: Հիշեցնենք, որ օրերս Փարաքար գյուղի Բաղրամյան փողոցի տներից մեկի ննջասենյակում հայտնաբերվել է դանակի երեսունից ավելի հարվածներ ստացած տանտիրուհու` 51-ամյա Անահիտ Զաքեւոսյանի դին:
Չնայած դեպքից արդեն մի քանի օր է անցել, բայց փարաքարցիները դեռ շոկի մեջ են: "Հանցագործը նույն ձեռագրով է վարվել Անահիտի հետ, ինչ Պերմյակովըª Ավետիսյանների յոթ հոգանոց ընտանիքի: Նույն բանն է` մտել է դաժան, անմարդկային ձեւով սպանել տանտիրուհուն ու դուրս եկել",- մեզ հետ զրույցում ասաց Փարաքարի բնակիչներից մեկը` Արամը: Իսկ ահա գյուղապետ Սամվել Վարդանյանն այսպես է ներկայացնում տեղի ունեցածը.
- Գյուղում բոլորը շոկի մեջ են, չենք հասկանում, թե ինչը կարող էր լինել այս սպանության պատճառը: Այդ ընտանիքը ոչնչով աչքի չէր ընկնում, գյուղում փոքրիկ խանութ ունեին, որն էլ նրանց ապրուստի միջոցն է եղել: Մարդ ու կին խանութ էին աշխատում: Երեկոյան 9-ի կողմերն Անահիտն ամուսնուն ասել է, որ գնում է տուն` հեռուստացույց դիտելու, եւ այս դեպքն է պատահել: Ամուսինը մինչ օրս ուշքի չի գալիս, չի խոսում, սթրեսից դուրս գալ չի կարողանում: Այդ օրը իրենց հետ ապրող տղան էլ տանը չի եղել: Ըստ ամենայնի, երբ Անահիտը գնացել է տուն, հանցագործը կամ հանցագործները արդեն տանն են եղել: Կնոջ տուն գնալուց մոտ մի ժամ հետո ամուսինն է գնացել տուն, բացել է դուռը եւ հայտնաբերել կնոջըª արնաշաղախ վիճակում: Անմիջապես օգնության է կանչել հարեւանին, ով էլ Շտապ օգնություն է կանչել, բայց, ցավոք, արդեն ուշ էր: Այս պահին դեռեւս դեպքի վայրում աշխատում են քննիչները, իրավապահ մարմինները քննություն են իրականացնում, հուսով ենք` հանցագործը կհայտնաբերվի եւ կպատժվի` ինչքան` շուտ, այնքան` լավ: Ասում են` Անահիտի ձեռքին էլ է դանակ եղել, հնարավոր է` ինքն էլ է պաշտպանվել, հստակ ոչինչ ասել չեմ կարող:
Դեպքի մասին առավել մանրամասն տեղեկություն փորձեցինք պարզել նաեւ սպանված Անահիտ Զաքեւոսյանի ամուսնու եղբորից` Արմեն Զաքեւոսյանից, ով բավական վրդովված էր, քանի որ.
- Հերյուրանքներ են տարածում եղբորս ընտանիքի հետ կատարված ողբերգության մասին: Գրում են, թե իբր մայրս տեսնելով հարսին այդ վիճակում` ինֆարկտ է ստացել, նման բան չկա, ինքը հիմա կողքիս նստած է: Իսկ սուտ, հերյուրանքներ տարածողներին ես դատի եմ տալու, թող չփորձեն մեր դժբախտությունը ոնց ուզեն` այդպես ներկայացնեն:
- Կասե՞ք, ինչպե՞ս է տեղի ունեցել դեպքը:
- Եղբայրս խանութում է եղել, որը տանից ահագին հեռու է: Խանութը փակել էր, որ գնար տուն` հաց ուտելու: Հացը ձեռքին մտել է տուն ու կնոջը հայտնաբերել արնաքամ վիճակում:
- Ճի՞շտ է, որ Ձեր հարսի ձեռքին դանակ է եղել, իբր դրանով նա փորձել է պաշտպանվել:
- Նման բան չի եղել, ժողովուրդն ինչ ասես, որ չի խոսում:
- Իսկ, ինչո՞վ եք բացատրում կատարվածը:
- Չեմ էլ կարողանում ինչ-որ բանով բացատրել: Աշխարհի խելոք տղեն է իմ ախպերը, ոչ մի թշնամի չուներ, ամենաբարի, կամեցող մարդն է: Խելոք, աշխատող, բանվոր տղա է եղբայրս: Ըստ իս, մտել են գողություն անելու, բայց հանդիպել են հարսիս ու արել էն, ինչի ականատես եղանք:
- Տանից ոչինչ չի՞ պակասել:
- Ոչինչ չի պակասել տանից, սա լուրջ հանցագործություն է, եւ հուսով եմ, որ իրավապահները արագ կբացահայտեն եղբորս տունը թալանող ցանկացողին կամ ցանկացողներին ու հարսիս նման ձեւով սպանողներին:

ԻԼՈՆԱ ԱԶԱՐՅԱՆ