ԶԱՐՄԱՆՔ

Թեեւ Լեւոն Ակոպիչը որոշել էր, որ ՀԱԿ-ը չի մասնակցի ԲՀԿ-ի խորհրդաժողովին, սակայն պարզվում է, որ նա հասցրել է իր հավատարիմ խոսնակին` ԼԵՎՈՆ ԶՈՒՐԱԲՅԱՆԻՆ, վարակել մի հիվանդությամբ, որը կարելի է կոչել "քաղաքագիտական վերլուծություն": Ահավասիկ. "Համաժողովրդական շարժման մեջ կա մի ուժ, որի մասին ասում էին, որ երբեք չի միանա ընդդիմությանը, եւ Գագիկ Ծառուկյանը երբեք չի գնա իշխանությունների դեմ: Բայց արի ու տես, որ նա հիմա իշխանության դեմ է գնում: Նա հիմա անգամ սպառնում է, որ կդնեն արտահերթ նախագահական ընտրությունների հարց": Դե ինչ, երեւի թե, "քաղաքագիտական վերլուծությունների" 3 տարվա ընթացքում Զուրաբյանին այնպես պինդ է կպել սերը առ ԲՀԿ, որ աքցանով էլ պոկել չի լինում:
Իսկ ահա ՏԻԳՐԱՆ ԿԱՐԱՊԵՏԻՉԸ, պարզվում է, հասցրել է շատ կարճ ժամանակում զարմանալիորեն հիասթափվել ԲՀԿ-ից. "Ակնկալիքներս չարդարացան: Ես չհասկացա, ճիշտն ասած, շատերը մեղմ մոտեցումներով էին խոսում` "Մայդան" մեզ պետք չի, շատերի տրամադրվածությունը մեղմ էր, այնքան էլ տպավորված չեմ, մտածում էին պայմանավորվելու, լեզու գտնելու մասին": Ու Կարապետիչը դա ասում է այնպիսի լացակումած տոնով, որ կողքից նայողը կարող է կարծել, թե Մայդանը Կարապետիչի գրպանում դրած էր, սակայն այդ "քըխ" ԲՀԿ-ականները վերցրել ու գրպանից թռցրել են: Դե, ինչ ասես, տվյալ պարագայում Օստապ Բենդերը հաստատ խորհուրդ կտար դիմել միջազգային սեռական լիգա:
Երեկ սարսափելի ողբերգություն է տեղի ունեցել` 47-ամյա ԱՆՆԱ ԲԱԴԱԼՅԱՆԻ կատարմամբ, ընդդեմ նրա 9-ամյա որդու.  "Քննությամբ պարզվել է, որ մայրը փետրվարի 9-ին` ժամը 04-ի սահմաններում, կողպել է իրենց բնակարանի մուտքի դուռը եւ պատուհանները, որից հետո, սպանելու դիտավորությամբ, մուրճով բազմաթիվ հարվածներ հասցրել դեռահաս որդու կենսական կարեւոր օրգանի` գլխի շրջանում: Հարվածների հետեւանքով երեխային պատճառվել են գանգուղեղային բաց վնասվածքներ: Սպանության դիտավորությունն ավարտին հասցնելու նպատակով կինը հրկիզել է բնակարանը, սակայն իր կամքից անկախ հանգամանքներով հանցագործությունն ավարտին չի հասցրել, քանի որ դեպքի վայր են ժամանել հրշեջ ծառայության աշխատակիցները": Այդտեղ սարսափելի է ոչ միայն բուն ողբերգությունը, այլեւ հարեւանների ապշեցուցիչ անտարբերությունը: Պարզվում է, որ այդ վայ-մայրը խելապակաս է, եւ հարեւանները բազմիցս լսել էին, թե ինչպես է խոսում երեխու հետ միասին ինքնասպանություն գործելու վերաբերյալ, բայց բանի տեղ չէին դրել: Ի դեպ, նույն ապշեցուցիչ անտարբերության մասին պատմեց եւ դաժան ծեծի ենթարկված ակտիվիստ Արտակ Խաչատրյանը` երբ ինքը լրիվ արնաթաթախ փորձում էր տաքսի կանգնեցնել, վարորդները շտապում էին քշել-անցնել: Դե ինչ, զարմանալով մնում է արձանագրել, որ անտարբերները ոչնչով ավելի լավը չեն, քան ծանր հանցագործություն կատարողները:
Եվ վերջապես հերթական անգամ իր ցինիզմով աչքի ընկավ ԴԱՎՈՒԹՕՂԼՈՒՆ: Դիմելով Ցեղասպանության ճանաչման ինչպես արտաքին, այնպես էլ ներքին կողմնակիցներին` նա հայտարարեց. "Ես հայտարարում եմ, որ մենք չեն նահանջել եւ չենք նահանջելու հրեական, հայկական կամ  թուրք-հունական փոքրամասնության լոբբիների առաջ: Ես դիմում եմ զուգահեռ լոբբիին, որը ուղերձներ է հղում նրանց` մենք արժանապատվորեն կանգնելու ենք ձեր առաջ` անկախ այն բանից, թե որտեղ եք: Դուք ողորմելի եք` ազգին դավաճանելու համար": Նրա խոսքը մեզ բնավ չի զարմացնում, վաղուց գիտենք, որ թուրքը մնում է թուրք, եւ թուրքին կուղղի միայն այն միջոցը, ինչը կուզիկին, սակայն ապշեցուցիչ է, որ մինչեւ հիմա կան հայկական ազգանուն կրող թափթփուկներ, որոնք քարոզում են "հայ-թուրքական հաշտեցում", լույս ընծայում զառանցանքներ` "հային փրկող թուրքի" մասին ու ջանում բոլորին համոզել, որ թուրքը քաղաքակրթվել է:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ