«ՌՈՒԲԵՆ ՀԱԿՈԲՅԱՆԻ ԵԼՈՒՅԹՆԵՐՆ ԸՆԴՀԱՆՐԱՊԵՍ ՉԸՆԴՈՒՆԵՑԻ». ՏԻԳՐԱՆ ԿԱՐԱՊԵՏՅԱՆ

«ՌՈՒԲԵՆ ՀԱԿՈԲՅԱՆԻ ԵԼՈՒՅԹՆԵՐՆ ԸՆԴՀԱՆՐԱՊԵՍ ՉԸՆԴՈՒՆԵՑԻ». ՏԻԳՐԱՆ ԿԱՐԱՊԵՏՅԱՆ

ԺԿ առաջնորդ Տիգրան Կարապետյանը «Իրավունքի» հետ զրույցում մինչ ԲՀԿ խորհրդաժողովը  ասել էր, որ խորհրդաժողովում պետք է անպայման լիդերության հարցը բարձրացվի:  Սակայն, ինչպես տեսանք, լիդերության հարց չբարձրացվեց: Ավելին` Տիգրան Կարապետյանը մինչեւ վերջ  խորհրդաժողովին չմասնակցեց ու անգամ ելույթ չունեցավ: «Իրավունքը» պրն Կարապետյանից  պարզեց` արդյոք կշարունակի համագործակցել  ԲՀԿ-ի հետ, եթե հաշվի առնենք, որ ԺԿ առաջնորդի սպասելիքներն այդքան էլ չեն արդարացել:

«Մենք ԲՀԿ-ի հանդեպ լավ ենք տրամադրված: Մեզ ձեռ չէր տալիս հավաքվածների ելույթները, որոնք պարունակում էին... մայդան չենք ուզում: Փաստորեն, մեղմ էին»,- պատասխանեց  պրն Կարապետյանը:

Իսկ թե ինչու խորհրդաժողովում լիդերության հարցը չբարձրաձայնվեց,  քաղաքական գործչի խոսքով` հավանաբար, նպատահարմար չեն գտել: «Բայց լիդերության հարցը, ըստ իս, հրատապ է»,- ասաց Տ. Կարապետյանը:

ԺԿ առաջնորդը նորից հայտարարեց, որ «Եռյակի» ձեւաչափն իր համար ընդունելի չէ. «Հավասարը հավասարի սկզբունքն է մեզ համար ընդունելի: Ղեկավար կարող ենք ընդունել միայն Գագիկ Ծառուկյանին»,- մանրամասնեց պրն Կարապետյանը, ապա հավելեց. ««Եռյակի» մյուս երկու ուժերի` ՀԱԿ-ին ու «Ժառանգության»  ղեկավարներին, միայն որպես  համաժողովրդական շարժման մասնակից, բայց ոչ որպես առաջնորդ կարող ենք ընդունել»:

Խորհրդաժողովի  ընթացքում  «Ժառանգության» խմբակցության ղեկավար Ռուբեն Հակոբյանն ու «Ժառանգության» փոխնախագահ Արմեն Մարտիրոսյանն իրենց ելույթներում անդրադարձան 1995-1996 թթ-ի կեղծված ընտրությունների մասին, այն դեպքում, երբ խորհրդաժողովին  չէր մասնակցում ՀԱԿ-ը: Որքանով է կոռեկտ բացակա քաղաքական ուժի ետեւից  նման գնահատականներ հնչեցնելը: «Ես էլ համարում, որ ճիշտ չէ, ավելին` Ռուբեն Հակոբյանի ելույթներն ընդհանրապես չընդունեցի: Բայց դա է իրականությունը: Վերջ, կներեք, ես զբաղված եմ»,- ասաց Տիգրան Կարապետյանն ու անջատեց հեռախոսը:

ՍՈՆԱ ԴԱՎԹՅԱՆ