ՊՈԼԻՏԵԽՆԻԿՈՒՄ ԼԱՐՎԱԾ ՄԹՆՈԼՈՐՏ Է. ՈՒՍԽՈՐՀՐԴԻ ՆԱԽԱԳԱՀՆ ԸՆԴԴԵՄ ԹՈՔՄԱՋՅԱՆԻ

ՊՈԼԻՏԵԽՆԻԿՈՒՄ ԼԱՐՎԱԾ ՄԹՆՈԼՈՐՏ Է. ՈՒՍԽՈՐՀՐԴԻ

ՆԱԽԱԳԱՀՆ ԸՆԴԴԵՄ  ԹՈՔՄԱՋՅԱՆԻ

Հայաստանի ազգային Պոլիտեխնիկական համալսարանի ռեկտորի պաշտոնակատար Հովհաննես Թոքմաջյանի գլխավորությամբ այսօր արտահերթ գիտխորհրդի նիստ էր հրավիրել: Պատճառը  մեկն է` ՀՀ ԿԳ նախարար Արմեն Աշոտյանն իր մոտ է կանչել  Հայաստանի պետական ճարտարագիտական համալսարանի ուսանողական խորհրդի նախագահ Գոռ Վարդանյանին, քանի որ վերջինս չի  մասնակցելու համալսարանում այսօր տեղի ունենալիք գիտխորհրդի նիստին: «Բանն այն է, որ բացի Գոռ Վարդանյանից` այդ դիմումի տակ ստորագրել են նաեւ ուսխորհրդի այլ անդամներ, որոնց մեծ մասը վատ սովորող, մի քանի անգամ նկատողություն ստացած, բացակայած  ուսանողներն են: Պրն Վարդանյանը պետք է մեզ բացատրի` ինչպես է եղել, որ նման ուսանողները տեղ են գտել  ուսխորհրհդի կազմում:  Անարգանքի մթնոլորտ կա դասախոսների նկատմամբ: Դա մենք չենք հանդուրժելու»,- ասաց պրն Թոքմաջյանը:

Ռեկտորն անդրադարձավ նաեւ լրատվամիջոցներից մեկում հրապարակված այն հոդվածին, թե իբր ուսանողական խորհրդի  նախագահ Գոռ Վարդանյանին ռեկտորի հրահանգով դիտավորյալ «երկու»  են նշանակել մաթեմատիակա առարկայից:  «Ես չեմ ուզում անդրադառնալ նաեւ այն խոսակցություններին, թե ինչպես է ասպիրանտուրա ընդունվել Գոռ Վարդանյանը: Չեմ ուզում խոսել նաեւ այն փաստի մասին, թե ինչպես է լինում, որ մեկ տարվա ասպիրանտը ստանում է «երկու» մաթեմատիկա առարկայից: Բայց եկեք հիշենք` ինչ է արել մեկ տարվա ասպիրանտը իր ոլորտում»,- մանրամասնեց պրն Թոքմաջյանը, ապա  հայտարարեց` եւս մեկ հնարավորություն տալ Գոռ Վարդանյանին մաթեմատիկայի քննությունը հանձնելու համար. «Երբ պատրաստ  լինի  Գոռ Վարդանյանը, թող գա ուսանողների, մամուլի ներկայությամբ հանձնի քննությունը»:

Ռեկտորիի ելույթից հետո խոսքով հանդես եկավ ուսանողներից մեկը`Լեւոն Ազիզյանը, եւ հայտարարեց, որ Գոռ Վարդանյանը ստացել է  «լավագույն ուսանող»  կոչումը: Սա հարուցեց ներկաների ծիծաղը, որը դուր չեկավ Թոքմաջյանին: Վերջինս  սաստեց ներկաներին`ասելով, որ դա պրն Ազիզյանի կարծիքն է: «Կարելի է լինել լավագույն ուսանող` «երկու» ստանալով մաթեմատիկա առարկայից»,- ասաց ՀՊՃՀ ռեկտորը:

ՍՈՆԱ ԴԱՎԹՅԱՆ