ՄԻ ԻՇԽԱՆ ԶԱՔԱՐՅԱՆԻ ՊԱՏՄՈՒԹՅՈՒՆ… ՏԵՍԱՆՅՈՒԹ

ՄԻ ԻՇԽԱՆ ԶԱՔԱՐՅԱՆԻ ՊԱՏՄՈՒԹՅՈՒՆ… ՏԵՍԱՆՅՈՒԹ

Փետրվարի չորսին ԱԺ-ում Վերահսկիչ պալատի նախագահ Իշխան Զաքարյանը պետք է ներկայացներ ՎՊ-ի`2013 թ-ի  հաշվետվությունը: Սակայն ՎՊ- նախագահի փոխարեն հաշվետվությունը ներկայացնում էր  ՎՊ խորհրդի անդամ Սեյրան Ավագյանը, որը հարուցեց պատգամավորների, հատկապես ընդդիմադիրների  արդարացի ու հիմնավորված դժգոհությունը: Բանն այն է, որ ըստ օրենքի` ՎՊ-ի հաշվետվությունը խորհրդարանում պետք է ներկայացնի  ՎՊ նախագահը, իսկ եթե հարգելի պատճառով բացակայում է` նրա տեղակալները: Բայց արի ու տես, որ հաշվետվության ներկայացումն ԱԺ-ին տրվել էր ՎՊ-ի խորհրդի անդամին: Սեյրան Ավագյանը, հավանաբար, չէր սպասում, որ պատգամավորները կբոյկոտեն հաշվետվությունը եւ խորհրդավոր մեկնաբանություններով փորձեց «պատասխանել»` որտեղ է Իշխան Զաքարյանը:

Սակայն զավեշտալին այն է, որ Սեյրան Ավագյանի ու նրա մամլո խոսնակի հայտարարությունները հակասում էին միմյանց: Lurer.com-ի հետ զրույցում ՎՊ մամլո խոսնակ Արամ Ալավերդյանն ասել է. «…Ես ընդամենն ասել եմ, որ պարոն Զաքարյանը գտնվում է արձակուրդում և նույնիսկ ցանկացողներին տրամադրել դա հավաստող հրամանի պատճենը: Միայն կասեմ, որ պարոն Զաքարյանը Երևանում է, և իմ ունեցած հավաստի տեղեկություններով՝ առողջական խնդիրների պատճառով որոշակի բուժման կուրսեր է անցնում»:

Մինչդեռ Սեյրան Ավագյանը «Իրավունքի» հետ զրույցում խորհրդարանում փետրվարի չորսին` առաջին ընդմիջումից հետո ասաց. «Իշխան Զաքարյանը աշխատանքային  կարեւոր այցով  բացակայում է ՀՀ-ից, եւ դա հետաձգել հնարավոր չէ»:

Այնուհետ լուրեր տարածվեցին, թե Իշխան Զաքարյանն Արցախում է, որը, սակայն, ՎՊ մամլո խոսնակը համարել էր էժանագին լուրեր`մոռանալով, որ  հստակ տեղեկատվական քաղցի պակասն է ստիպում ԶԼՄ-ներին  իրենց աղբյուրների միջոցով հայթայթել տեղեկատվություն:

Սեյրան Ավագյանին հիշեցրինք, որ Իշխան Զաքարյանը բավական երկար ժամանակ ուներ պատշաճ գրաֆիկ կազմելու: Ի վերջո, պատգամավորները բավական երկար են սպասել այս հաշվետվության ներկայացմանը: ՎՊ-ի խորհրդի անդամը, սակայն,  փորձեց պատասխանել հումորային բառախաղի միջոցով:

Մեր հարցին` սպասելի՞ էր, որ պատգամավորներն այսպես կըմբոստանան եւ կպահանջեն, որ Իշխան Զաքարյանը ներկայացնի հաշվետվությունը, ՎՊ խորհրդի անդամ Սեյրան Ավագյանն ասաց. «Դա բավական հին պատմություն ունի»:

Այո, պրն Ավագյան, այնքան «հին», որ  շատ «դժվար» եղավ ձեզ ու ՎՊ-ի խոսնակի համար այդ հնությունից ժամանակին ու տեղին, իրար չհակասող մի արդարացում հնարել: Բայց հուսանք, որ այս հնության փոշին կմաքրի ՎՊ նախագահ Իշխան Զաքարյանը եւ, ի վերջո, կասի` հիմա ինքն Արցախում որսի էր գնացել, թե՞...

ՍՈՆԱ ԴԱՎԹՅԱՆ