ԲՈՐՈՒՍԻԱՅԻ ԱՆՀԱՋՈՂՈՒԹՅՈՒՆԸ ԻՋԵՑՐԵԼ Է ՄԽԻԹԱՐՅԱՆԻ ՏՐԱՆՍՖԵՐԱՅԻՆ ԳԻՆԸ

ԲՈՐՈՒՍԻԱՅԻ ԱՆՀԱՋՈՂՈՒԹՅՈՒՆԸ ԻՋԵՑՐԵԼ Է ՄԽԻԹԱՐՅԱՆԻ ՏՐԱՆՍՖԵՐԱՅԻՆ ԳԻՆԸ

Հայաստանի ազգային հավաքականի ֆուտբոլիստ Հենրիխ Մխիթարյանը վնասվածքից ապաքինվելուց հետո հունվարի 30-ին Բունդեսլիգայի 18-րդ տուրում մասնակցել էր "Բայերի" դեմ առաջին պաշտոնական հանդիպմանը, որն ավարտվել էր առանց գոլերի գրանցման: Մխիթարյանը խաղադաշտ է դուրս եկել երկրորդ խաղակեսում: Դորտմունդցիներին օգնելու երկրորդ հնարավորությունը Մխիթարյանը ստացավ արդեն հաջորդ տուրի "Աուգսբուրգի" հետ խաղում, սակայն փոխարինման դուրս գալովª Մխիթարյանը դարձյալ չկարողացավ որեւէ բան փոխել թիմի խաղում:
Դորտմունդցիների անշուք ելույթներում անգամ Մխիթարյանը առանձնանալ չի կարողանում, թեեւ կա նաեւ ոչ այնքան լիարժեք մարզավիճակի փաստը: Սակայն պետք է նշել, որ հայ ֆուտբոլիստի "սառը" խաղը սկսվել է դեռ մրցաշրջանի առաջին հատվածում: "Eurosport"-ը ամփոփելով արդյունքներըª կազմել էր Գերմանիայի առաջնության առաջին խաղաշրջանում հիասթափեցրած ֆուտբոլիստների խորհրդանշական հավաքականը, որտեղ հայտնվել է նաեւ Հենրիխ Մխիթարյանը: Կայքը գրել էր. "Միանշանակ չէ, որ հայ կիսապաշտպանը մեծ նշանակություն է ունեցել "Բորուսիայի" անհաջող ելույթներում: Խաղաշրջանի առաջին հատվածում Հենրիխ Մխիթարյանը դարձել է ընդամենը մեկ գոլի եւ մեկ արդյունավետ փոխանցման հեղինակ: 26-ամյա խաղացողի անհաջող խաղն անդրադարձել է նաեւ Պյեր-Էմերիկ Օբամեյանգի եւ Չիրո Իմոբիլեի ելույթների վրա: Կեւին Կամպլի տրանսֆերից հետո Մխիթարյանն ունեցավ եւս մեկ մրցակից":
Մինչդեռ առաջին խաղաշրջանի անահաջողությունները շտկելու ուղղությամբ Կլոպի բոլոր ջանքերը դեռ ապարդյուն են: Այս պահին "Բորուսիան" շարունակում է 16 միավորով եզրափակել Գերմանիայի առաջնության մրցաշարային աղյուսակը: Եվ որքան էլ անհաջող ելույթներում դորտմունդցիներից յուրաքանչյուրի մեղավորությունը համաչափ է, անուններ կան, որոնք մշտապես քննարկումների թիրախում են, եւ որոնք տուժում են անհամեմատ ավելի շատ: Այն, որ Մխիթարյանը ֆուտբոլային քննադատների "սիրելին է", արդեն հասցրել ենք համոզվել: Ակնհայտ է նաեւ, որ տեւական ընթացք է, ինչ հայ ֆուտբոլիստը չի բավարարում ֆուտբոլային "մասնագետների" պահանջները: Ու թեեւ Մխիթարյանի հնարավոր տրանսֆերային աշխարհագրությունը գնալով ընդլայնվում է, նրա տրանսֆերային գինն իջել է: "Transrmarket.de" կայքը իջեցրել է Հայաստանի հավաքականի առաջատարի տրանսֆերային գինը` 26 միլիոնից հասցնելով 21 մլն եվրոյի: Ֆուտբոլիստի գնի իջեցումը պայմանավորված է Բունդեսլիգայում խաղացողի ցածր արդյունավետությամբ: Ստացվում է, որ "Բորուսիայի" անհաջողությունները հատկապես վատ են անդրադառնում Մխիթարյանի վրա, թեեւ ընդունենք, որ հայ ֆուտբոլիստի մեղավորությունը թիմի անհաջողություններում ինչ-որ չափով կա:

ՔՐԻՍՏԻՆԵ ՊԵՏՐՈՍՅԱՆ