"ՄԵՆՔ ՉԷԻՆՔ ԷԼ ՍՊԱՍՈՒՄ ԲՀԿ-Ի ՀՐԱՎԵՐԻՆ"

"ՄԵՆՔ ՉԷԻՆՔ ԷԼ ՍՊԱՍՈՒՄ ԲՀԿ-Ի ՀՐԱՎԵՐԻՆ"

"Մենք չէինք էլ սպասում իրենց հրավերին, որովհետեւ ունենք գաղափարական լուրջ տարաձայնություններ, քանի որ մեր պատկերացումները` երկրի տնտեսական ու քաղաքական համակարգի վերաբերյալ բացարձակ տարբեր են: Մենք մեխանիկական իշխանափոխության կողմնակից չենք"- այս կերպ արձագանքեց ՀԴԿ նախագահ ԱՐԱՄ ՍԱՐԳՍՅԱՆԸ այն հարցին, թե արդյոք ԲՀԿ-ի կողմից կուսակցությունը ստացել է հրավեր` ԲՀԿ-ի խորհրդաժողովին մասնակցելու համար: Այնուհետ շարունակելով միտքը` Ա. Սարգսյանն ասաց, որ եթե պետք է գնանք այն ճանապարհով, ինչը ընտրել են իրենք` իշխանության հասնելու, ապա մենք գնալու ենք ուրույն ծրագրով, ինչը ոչ մի եզր չունի նրանց հետ. "Ուստի, մենք հրավերի ակնկալիք էլ չունեինք, ինչը իրենք էլ են լավ հասկանում":
-Վերջերս Բերձորում "Հիմնադիր խորհրդարանը" "100-ամյակն առանց ռեժիմի" ակցիա էր անցկացնում: Չե՞ք կարծում, որ սա ավելի շատ ներքաղաքական ակցիա էր:
- Իհարկե, մեզ համար ընդունելի չէ, որ այդ օրը` այսինքն Ցեղասպանության 100-ամյակը կապվի այս կամ այն իրադարձության հետ: Արցախ գնալը որոշակիորեն անընդունելի քայլ էր, եւ իրենց զգուշացրել էին, որ չեն սպասում իրենց այնտեղ, առավել եւս, որ դա իրոք քաղաքական ակցիա էր: Իսկ Արցախը մեզ համար ազգային-ազատագրական պայքարի խորհրդանիշն է, այն վայրն է, պաթոս չհամարեք, որտեղ լուծվում է մեր պետականության խնդիրը: Բայց մյուս կողմից չեմ կարողանում հասկանալ, թե ինչու պետք է այն ավարտվեր ծեծ ու ջարդով: ԼՂՀ իշխանությունները չեն արտոնել այդ ակցիան, որի մասին կարելի էր մեկ անգամ եւս հիշեցնել, եթե դրանից հետո էլ նրանք չենթարկվեին, ապա կա համապատասխան միջոց, այն է` ձերբակալությունը: Այդ միջադեպը արտահայտում է այն նույն երեւույթը, ինչը մենք տեսել ենք անկախ Հայաստանի երեք իշխանությունների օրոք:
- Վերջերս կոչեր են հնչում, որ պետք է Հայաստանը ստորագրի Եվրաասոցացման պայմանագրի քաղաքական մասը: Ի՞նչ կասեք այս առումով:
- Սա մեզ համար ամենացավոտ թեմաներից մեկն է: Ինչպես գիտեք, ե՛ւ ՀԴԿ-ն, ե՛ւ ՍԻՄ-ը հստակ դիրքորոշում ունեն` միասեռականների հետ կապված: Իսկ ասոցացման պայմանագրի քաղաքական մասը, եթե Հայաստանը ստորագրի, ապա մենք մեզ վրա պետք է վերցնենք այդ տխրահռչակ երեւույթները: Օրինակ, Նորվեգիայում վերջերս 61 հազար ընտանիքից երեխաներին վերցրել եւ տվել են այլ ընտանիքների, այդ թվում նաեւ միասեռականներին: Իսկ հիմա մեզ դրդում են, որ նման օրենք ընդունենք: Ցանկանում եմ հարց ուղղել ԵԽԽՎ այն 22 պատգամավորներին, ովքեր վերջերս հարց են բարձրացրել եւ անգամ բանաձեւ ընդունել, ըստ որի` հայաստանյան իշխանությունները պետք է միջոցներ ձեռնարկեն ՍԻՄ նախագահ, ԱԺ պատգամավոր Հայկ Բաբուխանյանի եւ "Իրավունք" թերթի նկատմամբ. հարգելիներս, չէ՞ որ մենք չենք խառնվում ձեր ներքին գործերին: Իսկ ո՞վ ասաց, որ դուք ճիշտ եք ապրում, իսկ մենք` սխալ: Մենք բազմադարյան ավանդույթ ունենք, որով պահպանվել են մեր հայրենիքն ու ընտանիքները, դուք ո՞վ եք, որ քար նետեք դրա վրա: Իսկ եթե այդ 22 պատգամավորները եւս դրանց շարքին են դասվում, ապա հասկանալի է, թե ինչու են վրդովված, եթե դրանցից չեն ու պարզապես պաշտպանում են այդ` բնության կանոններին դեմ երեւույթը, ապա թող մեր աչքից հեռու լինեն: Մենք թույլ չենք տա, որ մեր երեխաների հետ էլ վարվեք այնպես, ինչպես վարվել են Նորվեգիայում: Մենք պաշտպանում ենք ե՛ւ "Իրավունք" թերթի, ե՛ւ ՍԻՄ-ի դիրքորոշումը եւ կանգնած ենք իրենց կողքին:
- Պարոն Սարգսյան, չե՞ք կարծում, որ ԵԽԽՎ 22 պատգամավորների կողմից մամուլի եւ քաղաքական գործչի դեմ ուղղված այդ բանաձեւի ընդունումը տոտալիտարիզմի դրսեւորում է եւ հակասում է հենց եվրոպական արժեքներին:
- Դժվար է ասել, թե որոնք են եվրոպական արժեքները: Ես ծանոթ եմ հին եվրոպական արժեքներին եւ միաժամանակ կարող եմ ասել, որ նույն եվրոպացիները դրա կողմնակիցը չեն, այլ իշխանական համակարգում կան նման մարդիկ: Երբ Ֆրանսիայի նախագահ Օլանդը պետք է ստորագրեր միասեռական ամուսնություն թույլ տալու հանգամանքը, միլիոնավոր մարդիկ դուրս եկան երթի, ընդդիմացան: Հիմա նույնը ուզում են մեզ պարտադրել: 2013 թվականին մեր խորհրդարանում քննարկվում էր տխրահռչակ գենդերային հավասարության օրենքը, որտեղ պետք է փոփոխություն մտցվեր: Մենք ասում էինք, որ որեւէ առարկություն չունենք կնոջ եւ տղամարդու հավասարության միջեւ, բայց եթե դա վերաբերում է կնոջը, այլ ոչ թե դրա քողի տակ այլ բաներ ավելացվեն: Կառավարությունը, որը ստանձնել էր այդ պարտավորությունը, մինչեւ հիմա ոչինչ չի արել, իսկ խորհրդարանն էլ չի պահանջում, որ բերվեն այդ փոփոխությունները: Այստեղ լուրջ վտանգ կա, եւ ես բազմիցս ասել եմ, եթե տուրք տաք այդ ամենին, կնշանակի դուք նույնպես դրանցից եք: Իսկ սա ոչ այնքան տխրահռչակ, որքան վտանգավոր օրենք է:
- Չե՞ք կարծում, որ այդ 22 պատգամավորների ընտրած ժամանակահատվածն անգամ եւս պատահական չէ, քանի որ Հայաստանում համասեռամոլների լոբբիստները բազում դատական հայցերով դիմել են դատարան` ընդդեմ "Իրավունք" թերթի եւ Հայկ Բաբուխանյանի, որով ճնշում են ՀՀ արդարադատության համակարգը:
- Ես համոզված եմ, որ դրանք ուղղորդված եւ, ինչու չէ, համակարգված երեւույթներ են: Արդեն գաղտնիք չէ, որ այդ միասեռական կոչվածներն ու իրենց հովանավորողները իսկապես մեծ կառույց են, որոնք մխրճված են տարբեր երկրների իշխանական տարբեր համակարգերում: Չեմ զարմանա, որ մեր երկրում էլ նման բանի հանդիպենք: Ինձ չի հետաքրքրում իրենց կողմնորոշումը, պարզապես թող չքարոզեն եւ չցուցադրեն այդ ամենը: Հետաքրքիր է, այդ ի՞նչ գրանտներով են նրանք աշխատում, որտեղի՞ց են ֆինանսավորվում, ինչո՞ւ, օրինակ, չեն ֆինանսավորվում այն ՀԿ-ները, որոնք միտված են զարգացնելու Հայաստանի տնտեսությունը, աղքատության դեմ պայքարին:
- ՍԻՄ նախագահ Հայկ Բաբուխանյանը վերջերս հանդես է եկել հայտարարությամբ ու կոչ արել, որ փետրվարի 15-ից, երբ սկսվում է մեծ պահքի շրջանը, մինչ ապրիլի 24-ը հռչակել ազգային միասնության օրեր եւ ողջ էներգիան ուղղել արտաքին քաղաքական մարտահրավերներին…
- Ես դեմ չեմ այդ գաղափարին, բայց, ցավոք, հենց իշխանությունները չեն նպաստում դրան, օրինակ ՓՄՁ-ների ներկայացուցիչների փողոց դուրս գալը: Ասինքն, եթե իշխանություններն անեն ամեն ինչ, որ լինի ժողովրդի սրտով, հավատացնում եմ, նման գործողություն կատարողները կդառնան մարգինալ մարդիկ:

ԱՐՄԵՆՈՒՀԻ ՀԱԿՈԲՅԱՆ