ՔԱՂԱՔԱՊԵՏԱՐԱՆՆ ԻՐ ԱՉՔԻ ՏԵՍԱԾԻՆ ՉԻ ՀԱՎԱՏՈՒՄ. ՖՈՏՈՇԱՐՔ

ՔԱՂԱՔԱՊԵՏԱՐԱՆՆ ԻՐ ԱՉՔԻ ՏԵՍԱԾԻՆ ՉԻ ՀԱՎԱՏՈՒՄ.

ՖՈՏՈՇԱՐՔ

«Իրավունքը» նախորդ հրապարակներում անդրադարձել է Եզնիկ Կողբացի 50/2 հասցեում կատարվող  անհասկանալի շինարարարությանը:

Հիշեցնենք` տարածքն աճուրդով  գնել է «Վան» մոթելի տնօրեն Վահագն Վանթյանը, ով մեզ հետ զրույցում հավաստիացնում էր, որ  իրեն պատկանող տարածքը  կանաչապատ ու ծառածածկ չի եղել: Սակայն մեր հրապարակած լուսանկարները փաստում էին հակառակը:

Մեր հրապարակումներից օրեր անց մի խումբ քաղաքացիներ, Եզնիկ Կողբացի 50/2 հասցեի բնակիչներ Երեւանի քաղաքապետարանի «Բարեւ Երեւան» ավագանու խմբակցության անդամ Անահիտ Բախշյանն իրենց բողոքի ձայնն էին բարձրացրել կատարվող շինարարության դեմ: Ավելին` Անահիտ Բախշյանը խոստացել էր քաղաքապետարանից պարզել, թե ինչ շինաշխատանքներ են այդտեղ կատարվում:

«Իրավունքը» գրավոր հարցում էր ուղարկել  Երեւանի քաղաքապետարան` պարզելու. 1.երբ եւ ինչ նպատակով  է քաղաքապետարանը շինաշխատանքներ կատարելու թույլտվություն տվել պատվիրատու Վահագն Վանթյանին: 2. Ինչ  է կառուցվում Եզնիկ Կողբացի 50/2 հասցեում: 3. Արդյոք  տարածքը մինչ շինաշխատանքներ կատարելը չի եղել կանաչապատ ու ծածկված ծառերով: 4. Որքանո՞վ  է քաղաքապետարանը  տարածքը վաճառել պատվիրատուին, աճուրդին, բացի Վահագն Վանթյանից, ինչ ընկերություններ կամ անհատներ են մասնակցել:

Քաղաքապետարանի պատասխանը հրապարակում ենք ստորեւ. «…Եզնիկ Կողբացու փողոցի հ.50/2 հասցեում նախատեսվում է իրականացնել մեկ հարկանի հասարակական նշանակության օբյեկտի կառուցման շինարարական աշխատանքներ, որի համար առկա է Երևանի քաղաքապետարանի հետ 15.12.2014թ. համաձայնեցված հ.01/18-05/1-Վ-1668-1152 նախագիծն ու կառուցապատող Վահագն Վանցյանին 15.12.2014թ. տրված հ.01/18-Վ-1668-1330 շինարարության թույլտվությունը և ներկայումս հիշյալ հասցեում իրականացվում է օբյեկտի հիմքերի կառուցման համար նախապատրաստական աշխատանքներ: Ե.Կողբացու փողոց հ.50/2 հասցեում գտնվող 99.07քմ մակերեսով հողամասի աճուրդային վաճառքը կայացել է 01.08.2014թ: Հողամասը վաճառվել է 31.207.050 ՀՀ դրամով: Աճուրդի մանակիցներն են եղել քաղաքացիներ Վահագն Վանցյանը և Համլետ Հայրապետյանը: Աճուրդի հաղթող է ճանաչվել Վահագն Վանցյանը: Տեղեկացվում է նաև, որ վերոգրյալ հասցեում ի սկզբանե ծառեր չեն եղել և տարածքը կանաչապատ չի եղել»:

Ուշագրավն այս պատասխանի մեջ այն է, որ  քաղաքապետարանը հերքում է տարածքի կանաչապատ  ու ծառածածկ լինելը այն դեպքում, երբ լուսանկարները փաստում են  հակառակը: Եզրակացությունը  մեկն է`քաղաքապետարանն իր  տեսածին  չի հավատում...

Ի դեպ, տեղեկացնենք, որ շինարարությունը բավական ինտենսիվ շարունակվում է:

ՍՈՆԱ ԴԱՎԹՅԱՆ