ՓՈԽՈՍՏԻԿԱՆԱՊԵՏԻ ՍՊԱՆՈՒԹՅԱՆ ԳՈՐԾՈՎ.«ՈՐՈՇԱԿԻ ԱՌԱՋԸՆԹԱՑ ԿԱ»

ՓՈԽՈՍՏԻԿԱՆԱՊԵՏԻ ՍՊԱՆՈՒԹՅԱՆ ԳՈՐԾՈՎ. «ՈՐՈՇԱԿԻ ԱՌԱՋԸՆԹԱՑ ԿԱ»

2009թ-ի փետրվարի 3-ին սպանված փոխոստիկանապետ Գեւորգ Մհերյանի գործով «Որոշակի առաջընթաց կա, շատ կարեւոր առաջընթաց է ինձ համար, դեռ սպասողական վիճակ է: Չնայած արդեն եղած առաջընթացը ինձ հույս է ներշնչում, որ հնարավոր է որդուս սպանության գործը ի վերջո բացահայտվի, դեռ ոչինչ ասել չեմ ուզում»,-iravunk.com-ի հետ զրույցում ասաց սպանված փոխոստիկանապետի հայրը`Պետրոս Մհերյանը:

Մեր զրուցակիցը նշեց, որ այս օրերին շատ սրտնեղված է նաեւ մեկ այլ պատճառով. «Փետրվարի 3-ին` որդուս սպանության օրը որեւէ մեկը չզանգեց, չանդրադառձավ, դա ինձ համար շատ ցավալի է»:

Հիշեցնենք, որ փոխոստիկանապետ Գեւորգ Մհերյանը սպանվել է 2009թ. փետրվարի 3-ին, Երեւանի Բարբյուս փողոցի 65 շենքի (Կիեւյան կամրջի հարեւանությամբ գտնվող «Օլիմպիա» մոթելի դիմաց) 7-րդ հարկի միջանցքում` վերելակից դուրս գալուց հետո։ Մհերյանի վրա արձակվել է ութ կրակոց, որոնցից հինգն են նրան դիպել։ Իրավապահները դեպքի վայրում հայտնաբերել են 9 մմ տրամաչափի 8 պարկուճ եւ չորս գնդակ։ Ավելի ուշ պարզվել էր, որ Գեւորգ Մհերյանին մարդասպանը դարանակալել էր զոհի բնակարանի հարկաբաժնի վերելակի մոտ։ Երբ Մհերյանը վերելակից դուրս է եկել, մարդասպանն անմիջապես դիմահար կրակել է նրա կրծքին եւ գլխին։ Մարդասպանի արձակած ութ կրակոցների ձայնը լսելի է եղել Մհերյանի հարկաբաժնում ապրող բնակիչներին։ Սակայն նրա հարեւանները մի քանի րոպե վախեցել են տանից դուրս գալ, ինչի արդյունքում մարդասպանին հաջողվել է հանցագործության վայրից աննկատ հեռանալ:

ԻԼՈՆԱ ԱԶԱՐՅԱՆ