ԱՊՊԱ ԳՈՐԾԱԿԱԼՆԵՐԸ ՆԱԵՎ ԶԵՂՉԱՅԻՆ ՏՐՅՈՒԿՆԵՐԻ ԵՆ ԴԻՄՈՒՄ

ԱՊՊԱ ԳՈՐԾԱԿԱԼՆԵՐԸ ՆԱԵՎ
ԶԵՂՉԱՅԻՆ ՏՐՅՈՒԿՆԵՐԻ ԵՆ ԴԻՄՈՒՄ

Հայտնի է, որ ԱՊՊԱ պայմանագրերի սակագները թանկացել են: Իսկ թե ինչով է դա պայմանավորված, ապա այս եւ այլ հարցերի պատասխաններ ստանալու ակնկալիքով դիմեցինք "Հայաստանի ավտոապահովագրողների բյուրոյի" լրատվական ծառայություն:
-Խնդրում ենք մանրամասնել, թե ինչո՞վ է պայմանավորված ավտոմեքենաների ապահովագրությունների պայմանագրերի գների թանկացումը, որքա՞ն են կազմում նոր սակագները:
- Նոր սակագներ գոյություն չունեն. դրանք անփոփոխ են` սկսած 2010 թվականից: Դեռեւս 2010 թվականին Բյուրոն սահմանել է հիմնական ապահովագրավճարի նվազագույն եւ առավելագույն սահմանաչափեր, որոնք կազմում են համապատասխանաբար 31,848 եւ 33,122 ՀՀ դրամ: Հարկ է նշել, որ ապահովագրական ընկերություններն իրավունք ունեն ընտրել այս սահմանաչափերում ընկած ցանկացած մեծություն:
- Եթե վարորդը ողջ տարվա ընթացքում որեւէ պատահարի մեջ չի հայտնվել, ի՞նչ առավելություններ ունի տվյալ անձնավորությունը` նոր ԱՊՊԱ պայմանագիր կնքելու դեպքում:
- Եթե նախորդ անգամ բոնուս-մալուս դաս ստանալու օրվանից մինչեւ նոր պայմանագրի կնքման կամ նոր պայմանագրում որպես լիազորված տիրապետող ավելացման օրվան նախորդող օրը վարորդը ունի նվազագույնը 345 պայմանագրային օր, ապա նրա ԲՄ դասը կիջնի 1 դասով, այսինքն` կկիրառվի բոնուս:
- Բացի բոնուս-մալուսի տված զեղչերիցª ԱՊՊԱ գործակալությունները տարաբնույթ զեղչեր էլ են խոստանում: Սակայն օրերս ականատես դարձանք մեկ դեպքի, երբ ԱՊՊԱ գործակալները բոնուս-մալուսի զեղչը փորձում էին սեփական 10 տոկոսանոց զեղչ ներկայացնել: Մինչդեռ նման խաբեության արդյունքում վարորդը կարող է զրկվել այլ գործակալների մոտ բացի բոնուս-մալուսից, գործակալության իրական զեղչից եւս օգտվելու հնարավորությունից: Ինչո՞վ կբացատրեք վերոնշյալը:
- Ցանկացած զեղչի կիրառում, որը կապված չէ բոնուս-մալուս համակարգի հետ, անօրինական է: Ապահովագրական ընկերությունները կամ նրանց գործակալները իրավունք չունեն կիրառել զեղչեր, որոնց հիմքում դրված չեն բոնուս-մալուս համակարգի զեղչ ստանալու պայմանները: Բյուրոն հայտնում է իր պատրաստակամությունը` Ձեզ կամ ցանկացած սպառողին ցուցաբերել անհրաժեշտ աջակցություն բոլոր այն դեպքերում, երբ վերոնշյալ կամ ԱՊՊԱ համակարգի ցանկացած այլ հարցի հետ կապված` խախտվել են Ձեր իրավունքները:

ԻԼՈՆԱ ԱԶԱՐՅԱՆ