"ՉԵՄ ԸՆԴՈՒՆՈՒՄ ՊԱՏԵՐԱԶՄԱԿԱՆ ԳՈՏՈՒՄ ՈՐԵՎԷ ԱԿՑԻԱ"

"ՉԵՄ ԸՆԴՈՒՆՈՒՄ ՊԱՏԵՐԱԶՄԱԿԱՆ ԳՈՏՈՒՄ ՈՐԵՎԷ ԱԿՑԻԱ"

ՀՀ ԱԺ նախագահ ԳԱԼՈՒՍՏ ՍԱՀԱԿՅԱՆԻ մոտ երեկ տեղի ունեցավ փակ քննարկում` ՀՀ վարչապետի, ինչպես նաեւ խորհրդարանական խմբակցությունների ներկայացուցիչների մասնակցությամբ: Քննարկման ընթացքում նախ խոսվել է "Շրջանառության հարկի" օրենքի փոփոխության մասին, ապա անդրադարձ կատարվել "Հիմնադիր խորհրդարան" կոչված քաղաքացիական նախաձեռնության "գաստրոլներին" Արցախում, ինչի արդյունքում վերոնշյալ ցուցարարները ստիպված են եղել "քոռ ու փոշման" վերադառնալ Հայաստան` հայտարարելով, թե իրենց դիմավորել են ոստիկանական մահակներով: Փակ քննարկումից հետո որոշ պարզաբանումներ հաջողվեց ստանալ հենց ԱԺ նախագահից:

"ԱՅԴ ԱՄԲՈՂՋ
ԺԱՄԱՆԱԿԱՇՐՋԱՆՈՒՄ ՈՐԵՎԷ ԴՐՍԵՎՈՐՈՒՄ ԸՆԴԴԻՄՈՒԹՅԱՆ ԿՈՂՄԻՑ ՉՏԵՍԱՆՔ"

-Պարոն Սահակյան, բավական աղմկահարույց դարձած "Շրջանառության հարկի մասին" օրենքի փոփոխության կասեցման վերաբերյալ ի՞նչ կոնսենսուի եկաք ՀՀ կառավարության հետ:
- Իհարկե, միտումն այն է, որ, իրոք, փոփոխություններ պիտի անենք: Նաեւ իմ հարցադրումը հետեւյալն էր, որ մեկ անգամ կասեցրինք, բայց այդ ամբողջ ժամանակաշրջանում որեւէ դրսեւորում ընդդիմության կողմից չտեսանք, որ լսումներ կազմակերպեին կամ նորից քննարկեին հարցը: Ի վերջո, չի կարելի յուրաքանչյուր պայքարի թեմա հանդիսացող նյութի շուրջ 10 օր պայքարել, հետո նահանջել: Եվ հետո տեսնել, որ ժողովուրդ է հավաքվել նոր պահանջներ ներկայացնել: Հորդորեցի, որ պիտի կարողանաք պայքարել մինչեւ վերջ, մանավանդ, որ ընդդիմության դերակատարումը մի այլ դաշտում է, իսկ իշխանությունների վերաբերմունքը` մի այլ: Այսինքն` այն, ինչը խոսվում է, իշխանությունները պարտավոր են եւ պատասխանատու են դրա համար եւ պիտի գնան ժողովրդի պահանջի հետեւից: Ինչպես նաեւ հորդորեցի, որ արտահերթը անարդյունավետ գործընթաց է, եւ դրա համար հրավիրեցի նաեւ պարոն վարչապետին: Որոշակի զրույցներից հետո, կարծես թե, հավատի մոտեցումներ ձեւավորվեցին, որ, իրոք, շահագրգիռ ենք այս հարցում:
- Արդյո՞ք կարող են ստեղծված կրքերը հանդարտվել` մինչեւ հուլիսի 1-ը` վերոնշյալ օրենքի կասեցմամբ:
- Եթե օրենքի կասեցումն անում ենք մինչեւ հուլիսի 1-ը, դա չի նշանակում, որ հենց հուլիսի 1-ին պիտի անդրադառնանք դրան: Առաջիկա մեկ ամսվա ընթացքում կամ մինչեւ հաջորդ քառօրյա որոշակի քննարկումներ տեղի կունենան, որովհետեւ բացի ընդդիմության առաջարկություններից, որն արդեն շրջանառության մեջ է նախագծի տեսքով, կան նաեւ նրանք, ովքեր շահագրգիռ են եւ այդ օրենքի տրամաբանությամբ պիտի հայտնեն իրենց առաջարկությունները ու քննարկվեն դրանք: Այդ իմաստով կասեցրել ենք եւ փորձելու ենք շատ սեղմ ժամկետում ընդունել մի որոշում, որն արդարացի կլինի ե՛ւ բողոքողների, ե՛ւ ընդդիմության համար:

"ԿԱՏԱՐՎԱԾԸ ՉԵՄ ԿԱՐՈՂ
ԴԱՏԱՊԱՐՏԵԼ"

-Ի դեպ, հանդիպման ժամանակ քննարկվել է նաեւ Բերձորում տեղի ունեցած միջադեպը: Այս ուղղությամբ ի՞նչ քայլեր է կատարելու  խորհրդարանը:
- Ընդդիմությունը պահանջում էր, որ Ազգային ժողովը ժամանակավոր հանձնաժողով ստեղծի եւ Արցախում քննարկեն այդ հարցը` չմտածելով, որ մենք ընդունել ենք, որ Արցախն առանձին պետություն է, հետեւաբար, ես դա ճիշտ չեմ համարում: Պայմանավորվել ենք հետեւյալը. միջխորհրդարանական հանձնաժողով ունենք, եւ այդ կառույցի շրջանակներում առաջարկել եմ ձեւավորել խումբ, որը կմեկնի Արցախ: Այդ մասին զեկուցել եմ ե՛ւ ԼՂՀ նախագահին, ե՛ւ ԼՂՀ ԱԺ նախագահին: Այնպես որ, մեր պատգամավորներն այնտեղ ընդունելություն կունենան եւ բոլոր մանրամասներով հնարավոր կլինի նաեւ ստանալ այն տեղեկատվությունը, որի պակասը կա այս պահին:
- Իսկ Դուք ինչպե՞ս կգնահատեք տեղի ունեցածը:
- Կատարվածը չեմ կարող դատապարտել, որովհետեւ տեղում չեմ եղել: Պիտի ընդունեք, որ Արցախն իշխանական կառույցներ ունի, ունի նախագահ: Այնպես որ, Ազգային ժողովից հանձնախումբ կգնա Արցախ, եւ բոլոր այն խնդիրները, որոնք կապված կլինեն Արցախի կառույցների հետ, ընդ որում նաեւ հետաքննող մարմինների, դատախազության, լրիվ կիրազեկվեն նաեւ մեր պատգամավորները:

"ԱՄԲՈՂՋԱԿԱՆ ԻՐԱՎԻՃԱԿԻ ԳՆԱՀԱՏԱԿԱՆԸ ԿԼԻՆԻ ՆԱԵՎ
ԱԶԳԱՅԻՆ ԺՈՂՈՎԻ ԿՈՂՄԻՑ"

-Որքանո՞վ է Ձեզ համար ընդունելի, որ Հայոց ցեղասպանության 100-րդ տարելիցին ստեղծվել է "100-ամյակն առանց ռեժիմի" նախաձեռնություն, որոնք էլ հենց հայտնվեցին Բերձորի միջադեպի կիզակետում:
- Նախ չեմ ընդունում պատերազմական գոտում որեւէ ակցիա եւ երկրորդ` չեմ ընդունում, իհարկե, որ որեւէ նման քաղաքական ակցիա կապվի ապրիլի 24-ի հետ: Մեր պատգամավորներից մեկը անբարոյականություն համարեց դա, ես ավելին կասեի... Բայց եթե այդտեղ օրենքների խախտում են եղել, ինչ-որ մարդիկ խոշտանգվել են կամ ինչ-որ ձեւով նրանց իրավունքները ոտնահարվել են, ապա կարծում եմ, որ պիտի լիարժեք տեղեկություն ստանանք այդ մասին եւ ամբողջական իրավիճակի գնահատակը կլինի նաեւ Ազգային ժողովի կողմից: Ինձ համար անթույլատրելի է, որ Արցախում` որպես պատերազմող երկիր, որեւէ քաղաքական ակցիա կատարվի, դա աշխարհում ընդունված կարգ է, առավել եւս մեզ համար: Իսկ եթե այնտեղ հանցածին արարքներ են տեղի ունեցել, դա պիտի քննարկվի մինչեւ վերջ:
- Տեղյա՞կ եք` որեւէ քրեական գործ հարուցվել է տեղի ունեցածի հետ կապված:
- Խնդիրը ԼՂՀ դատախազության շրջանակներում է եւ քննարկման փուլում է, դրա համար էլ ես առաջարկեցի ու որոշակի հավանություն նաեւ ընդդիմադիրների կողմից ստացա, որպեսզի մեր պագամավորները գնան տեղում պարզեն եւ ավելի անմիջական տեղեկատվություն ունենանք եղելության վերաբերյալ:

ՀՐԱՆՏ ՍԱՐԱՖՅԱՆ