ՀԻՄԱ ՀԱԿ-Ը «ԵՌՅԱԿԻ» , ԹԵ՞ «ԵՐԿՅԱԿԻ» ՀԵՏ Է

ՀԻՄԱ ՀԱԿ-Ը «ԵՌՅԱԿԻ» , ԹԵ՞ «ԵՐԿՅԱԿԻ» ՀԵՏ Է

Փետրվարի հինգին տեղի է ունենալու  ԲՀԿ առաջնորդի հրավիրած ԲՀԿ-ի խորհրդաժողովը, որին, սակայն, ՀԱԿ-ը չի մասնակցելու: «Ազգային անվտանգություն» կուսակցության ղեկավար,  քոչարյանա-ԲՀԿ-ամետ Գառնիկ Իսագուլյանը հայտարարել է, որ ՀԱԿ-ը պարտավոր է մասնակցել խորհրդաժողովին, քանի որ այն աննախադեպ է:

ՀԱԿ խմբակցության պատգամավոր Գագիկ Ջհանգիրյանից «Իրավունքը» հետաքրքրվեց` ինչպես է արձագանքում այդ հայտարարությանը: «Էդպիսի բան չկա, ո՞վ է ասել»,- հարցին հարցով պատասխանեց պրն. Ջհանգիրյանը:

Հիշեցրինք` հայտարարության հեղինակը Գառնիկ Իսագուլյանն է: «Գառնիկ Իսագուլյանը հայտարարել է, նրան էլ հարցրեք»,- ասաց պատգամավորը:

- Պրն Ջհանգիրյան, ինչո՞ւ ՀԱԿ-ը չի մասնակցում խորհրդաժողովին: Ի վերջո, կարեւոր հարցեր են քննարկվելու:

- ՀԱԿ-ը  չմասնակցելու բացատրությունն արդեն տվել է: Ես լրացնելու ոչինչ չունեմ:

- Ամբիացիաների խնդի՞ր կա:

- Ես արդեն ասացի` ՀԱԿ-ը բացատրել է, հայտարարել է:

- Իսկ չմասնակցելով ՀԱԿ-ը ինչ մեսիջ է հղում հանրությանը, երբ հայտարարում է, որ չի մասնակցում խորհրդաժողովին` ֆորմատի փոփոխությունը պատճառ բերելով:

- Նորմալ բան է հայտարարել Կոնգրեսը...

- Եթե ՀԱԿ-ը չի մասնակցում խորհրդաժողովին, հանրությունը գուցե կարծի, թե «եռյակը» միասնական չէ»:

- Մենք էլի միասնական ենք «երկյակի», «եռյակի» ֆորմատում եւ շարունակում ու շարունակելու ենք ապագայում մեր համագործակցությունը:

ՍՈՆԱ ԴԱՎԹՅԱՆ