«ՌՈՒՍԱՍՏԱՆԻ ՀԱՄԱՐ ՎՐԱՍՏԱՆԻ ՔՎԵԱՐԿԵԼ ԿԱՄ ՉՔՎԵԱՐԿԵԼԸ ԱՅԴՔԱՆ ԷԼ ՍԿԶԲՈՒՆՔԱՅԻՆ ՉԷՐ»

«ՌՈՒՍԱՍՏԱՆԻ ՀԱՄԱՐ ՎՐԱՍՏԱՆԻ ՔՎԵԱՐԿԵԼ ԿԱՄ ՉՔՎԵԱՐԿԵԼԸ ԱՅԴՔԱՆ ԷԼ ՍԿԶԲՈՒՆՔԱՅԻՆ ՉԷՐ»

Երկու օր առաջ հերթական հակառուսական որոշումը կայացվեց ԵԽԽՎ ձմեռային նստաշրջանում, ըստ որի, մինչեւ ապրիլի գարնանային նստաշրջան ուժի մեջ է թողնվում Ռուսաստանի պատվիրակությանը ձայնից զրկելը: Վերոնշյալ քվեարկության պատկերը հետեւյալն էր. 160 եվրոպացի պատվիրակ քվեարկեցին «կողմ»` ՌԴ պատվիրակության լիազորությունների դադարեցմանը, իսկ 42 պատվիրակ «դեմ» էր, 11-ը` «ձեռնպահ»:

Ուշագրավ էր այն, որ ՌԴ պատվիրակության լիազորությունների դադարեցմանը «կողմ» քվեարկողների թվում էին նաեւ Վրաստանի պատվիրակության բոլոր ներկայացուցիչները:

Թե Վրաստանի այսպիսի պահվածքից հետո արդյո՞ք Ռուսաստանը համարժեք պատասխան չի տա նրանց` հարմար առիթի դեպքում, «Իրավունքը» հետաքրքրվեց Վրաստանի հարցերով փորձագետ ՋՈՆԻ ՄԵԼԻՔՅԱՆԻՑ.
-Չեմ կարծում, քանի որ ի սկզբանե պարզ էր, որ եթե այդպիսի քվեարկություն լինի, ապա Վրաստանը Ռուսաստանի դեմ է քվեարկելու: Ընդհանրապես, ինչ տիպի քվեարկություն էլ եղել է վերջին տարիներին, մանավանդ 2008 թվականի ռուս-վրացական պատերազմից հետո, միշտ Վրաստանն առաջ է տարել հակառուսական հեղափոխական փաստաթղթերը: Հետեւաբար, պարզ է, որ եթե ուրիշ երկրները այդպիսի մի ձեռնարկ են սկսում, պիտի իրենք սատարեն, քանի որ նույնիսկ եթե փորձեն անկողմնակալ լինել, ապա շատ մեծ քննադատության կարժանանան Վրաստանի ընդդիմության կողմից: Իսկ այս դեպքում ասեմ, որ հայտարարություններ են եղել անգամ ՌԴ-ի հետ հարաբերությունների վերաբերյալ` Վրաստանի վարչապետի հատուկ ներկայացուցչի կողմից, ով մասնավորապես նշել է, թե ամենակոշտ պատասխանը Ռուսաստանի ձեռնարկած քայլերի դեմ հենց Վրաստանին էր, որովետեւ 2008 թվականին դիվանագիտական հարաբերությունները դադարեցվել են նրանց հետ: Եվ իրենց կարծիքով, քանի որ իրենք դադարեցրել են այդ հարաբերությունները, իրենք էլ ամենակոշտ քայլին են դիմել: Ուստի` իրենց մոտեցումը պարզ է: Բայց չեմ կարծում, որ ՌԴ-ն որեւէ պատասխան քայլ կձեռնարկի Վրաստանի դեմ, քանի որ դեռեւս բավականին մեծ ու լուրջ խնդիրներ ունի: Այնպես որ, Ռուսաստանի Դաշնության համար Վրաստանի քվեարկել կամ չքվեարկելը այդքան էլ սկզբունքային չէր:

ՀՐԱՆՏ ՍԱՐԱՖՅԱՆ