«ԵՌՅԱԿԸ» ԺՈՂՈՎՐԴԻ ՀԵՏ ԽԱՂԵ՞ր Է ՏԱԼԻՍ

«ԵՌՅԱԿԸ» ԺՈՂՈՎՐԴԻ  ՀԵՏ ԽԱՂԵ՞ր Է ՏԱԼԻՍ

«Ժառանգություն» խմբակցության ղեկավար Ռուբեն Հակոբյանն այսօր լրագրողների հետ հանդիպման ժամանակ հայտարարեց, որ «եռյակի» առաջնորդների հանդիպում, հավանաբար, կլինի ԲՀԿ-ի խորհրդաժողովից հետո:

Մեր հարցին` արդյոք «Եռյակը» միասնական օրակարգ ունի, պրն  Հակոբյանը դրական պատասխանեց, ապա հստակեցրեց.  «Խորհրդարանական ձեւաչափով մենք միասնական  օրակարգ ունենք»:

Կուսակցության փոխնախագահ Արմեն Մարտիրոսյանն էլ, ով այսօր ևս  մասնակցում էր «Եռյակի» նիստին,  ի պատասխան «Իրավունքի» հարցին` արդյոք «Եռյակը»  դուրս կգա «Ժառանգությունից»` հաշվի առնելով Րաֆֆի Հովհաննիսյանի`«Այլեւս ժողովրդի հետ խաղ տալ պետք չէ» արտահայտությունը, Արմեն Մարտիրոսյանը բացասական պատասխանեց. ««Եռյակից» դուրս գալու խնդիր չկա»:

Պրն Մարտիրոսյանից հետաքրքրվեցինք`«Եռյակը», ի վերջո, միասնական օրակարգ ունի՞: «Միասնական օրակարգն իշխանափոխությունն է: «Մնացածը քննարկելի է: Կարծում եմ` ապագայում հնարավորություն կունենանք  միասնական որոշումներով առաջ գնալու»,- պատասխանեց  կուսակցության փոխնախագահը:

Եթե Րաֆֆի Հովհաննիսյանը  հայտարարել է, որ ժողովրդի հետ խաղ տալ այլեւս չի կարելի, կարելի՞ է ենթադրել, որ նախկինում «Եռյակը» խաղե՞ր էր տալիս,   «Ժառանգության» փոխնախագահն ասաց, որ  ամեն ոք կարող է  հասկանալ, այնպես ինչպես ուզում է. «Բայց որպեսզի ձեր հասկացածը լինի այն, ինչ պրն Հովհաննիսյանն է ասել, հարցն ուղղեք նրան»:

Պրն Մարտիրոսյանին խնդրեցինք իր անձնական կարծիքը հայտնել Րաֆֆի Հովհաննիսյանի այդ արտահայտության վերաբերյալ: «Ինքն ասում է` իշխանությունների վարած քաղաքկաանությունը կամ մեկն ասում է,  ես ընդդիմադիր եմ, մյուսը ավելի շատ ընդդիմադիր եմ, կամ իրար քարկոծում են: Դրանք բոլորը խաղերի մեջ են եմ մտնում: Բայց կարող է ես էլ եմ սխալ: Դրա համար հարցն ուղղեք Րաֆֆի Հովհաննիսյանին»,- ասաց «Ժառանգության» փոխնախագահը, ապա հավելեց, որ չի կարծում, թե «ժողովրդի հետ խաղ տալ այլեւս չի կարելի» արտահայտությունը նշանակում է, թե «Եռյակում» խնդիրներ կան:

ՍՈՆԱ ԴԱՎԹՅԱՆ