«ՀԱՅԵՐԸ ՀԻՍԹԵՐԻԱ ԱՆՈՂ ՉԵՆ, ՈՉ ՌԴ-Ի, ՈՉ ԱՄՆ-Ի ՆԿԱՏՄԱՄԲ». ԱՐՄԵՆ ՄԱՐՏԻՐՈՍՅԱՆ

«ՀԱՅԵՐԸ ՀԻՍԹԵՐԻԱ ԱՆՈՂ ՉԵՆ, ՈՉ ՌԴ-Ի, ՈՉ ԱՄՆ-Ի ՆԿԱՏՄԱՄԲ». ԱՐՄԵՆ ՄԱՐՏԻՐՈՍՅԱՆ

Գյումրիի դեպքերից հետո Հայաստանում Արեւմուտքից սնվող ուժերը փորձում են ստեղծել հակառուսական տրամադրություններ` այս անգամ կենցաղային կամ անձական հանցագործությունների միջոցով: Մասնավորապես` օրեր առաջ հայրը սպանել է որդուն, իսկ հետո ոստիկանությունում ստահոդ հայտարարություն տվել, թե իբր որդուն տեսել է ազգությամբ ռուս մի քանի երիտասարդների հետ: Իսկ վերջերս էլ լուրեր էին տարածվել, թե ռազմաբազայից վեց ռուս զինվոր դիմել է փախուստի:

Եթե արեւմտամետ գրանտակերներին հաջողվի հակառուսական մեծ հիսթերիա բարձրացնել Հայաստանում, արդյոք  Ռուսաստանը  չի հանի իր ռազմաբազան Հայաստանից ու տեղափոխի Ադրբեջան` հաշվի առնելով այն հանգամանքը, որ ԵԽԽՎ-ում  հունվարի 28-ին  ՌԴ-ին ձայնից զրկելու մասին բանաձեւին դեմ է քվեարկել  Ադրբեջանը եւ այս կերպ իր աջակցությունը հայտնել Ռուսաստանին:

«Իրավունքի» հետ զրույցում «Ժառանգություն» կուսակցության փոխնախագահ Արմեն Մարտիրոսյանը չի կարծում, որ ՌԴ-ը ռազմաբազան Հայաստանից կհանի.

«Հայաստանն ու Ադրբեջանը ռազմավարական տարբեր տարածքներ են: Հայաստանը խաչմերուկ է: Կարծում եմ` ՌԴ-ը շատ է շահագրգռված Հայաստանով, քանի որ կորցնելով մեզ` նա կորցնում է ոչ միայն Անդրկովկասի այլեւ Միջին Արեւելքի նկատմամբ վերահսկողությունը»:

Ինչ վերաբերում է հակառուսական հիսթերիային, ապա ըստ Մարտիրոսյանի, հայերը հիսթերիա անող չեն, ոչ ՌԴ-ի ոչ էլ, օրինակ, ԱՄՆ-ի նկատմամբ:

«Այլ հարց է, որ ռուս մեր գործընկերների պահվածքը, ցավոք սրտի, գործընկերային չէ: ՌԴ-ի հետ հարաբերությունները այլ հարթության վրա են, անձնական հարաբերությունները` այլ»:

Համաձայն չե՞ք, որ Հայաստանում կան արեւմտյան գրանտներով սնվող եւ ամեն կերպ հակառուսական հիսթերիա տարածողներ հարցին Ա. մարտիրոսյանն ասաց, որ  ոչ, քանի որ «եթե էդպես է, կարող եմ ասել, որ Հայաստանում կան որոշ ուժեր, որոնք սնվում են ՌԴ-ից եւ ռուսամոլ կոչերով են հանդես գալիս:  Չեմ կարծում, որ դավադրության գործընթաց  կա Հայաստանում»:

ՍՈՆԱ  ԴԱՎԹՅԱՆ