«ՄԵՆՔ ԱՊՐՈՒՄ ԵՆՔ ՀԱՄԵՐԱՇԽՈՒԹՅԱՄԲ ԽԱՂԱՂՈՒԹՅԱՆ ՁԳՏՈՂ ՀԱՅԵՐԻ ԿՈՂՔԻՆ…»

«ՄԵՆՔ ԱՊՐՈՒՄ ԵՆՔ ՀԱՄԵՐԱՇԽՈՒԹՅԱՄԲ ԽԱՂԱՂՈՒԹՅԱՆ ՁԳՏՈՂ ՀԱՅԵՐԻ ԿՈՂՔԻՆ…»

Հունվարի 27-ը Հոլոքոստի զոհերի հիշատակման օրն է: Այդ օրը կարևորվում է ոչ միայն հրեաների, այլև միևնույն ճակատագրին արժանացած հայերիս համար: Հայաստանում ներկայումս բնակվում են շուրջ 800 հրեաներ, ովքեր Հայաստանի հրեական համայնքի մասն են կազմում: Համայնքի ղեկավարը Ռիմա Վարժապետյան-Ֆելլերն է, ում նախաձեռնությամբ Երևանում կառուցվել է Հոլոքոստի և Ցեղասպանության զոհերի հիշատակն անմահացնող հուշարձան: Այստեղ յուրաքանչյուր տարվա վերոնշյալ օրը տեղի է ունենում ոգեկոչման արարողություն:

Երեկ տեղի ունեցած միջոցառման ժամանակ ՌԻՄԱ ՎԱՐԺԱՊԵՏՅԱՆՆ իր խոսքում նշեց. «Մենք բոլորս հավաքվել ենք Հոլոքոստի և Ցեղասպանության զոհերին նվիրված հուշարձանի մոտ` հարգելու Հոլոքոստի զոհերի հիշատակը, ինչպես նաև խորհրդային զորքերի կողմից Օսվենցիմի ազատագրման 70-ամյակը: Այս միջոցառումը կազմակերպվել է ՄԱԿ-ի հայաստանյան գրասենյակի կողմից: Մենք հայտնում ենք մեր շնորհակալությունը ՀՀ նախագահի աշխատակազմին, կառավարությանը, արտաքին գործերի նախարարությանը, ինչպես նաև բոլոր կազմակերպիչներին, ներկաներին: Մեծապես ցանկանում ենք, որ այս դժոխային իրադարձությունն այլևս չկրկնվի: Հայաստանն այն երկիրն է, որտեղ չկան հակահրեականության, նացիզմի, դեմագոգիայի, բռնության դրսևորումներ: Ընդհակառակը, այս երկրում բարենպաստ պայմաններ են ստեղծված ազգային փոքրամասնությունների կյանքի կազմակերպման համար: Ես՝ որպես Հայաստանի հրեական համայնքի նախագահ, համայնքի բոլոր անդամների անունից պաշտոնապես հայտարարում եմ, որ մենք ապրում ենք համերաշխությամբ խաղաղության ձգտող հայերի կողքին: Կարևոր է այն, որ անցյալում պատմաբանների հանցավոր լռությունը այսօր քննադատվում է, քանզի մենք իրավունք չունենք լռել և մոռանալ անցյալը: Հայաստանը պետք է հզորանա, և մենք բոլորս հզոր Իսրայելի կողքին կերտենք արժանապատիվ ապագա և՛ մեր, և՛ մեր երեխաների համար»:

Այնուհետև ելույթ ունեցավ Հայաստանի գլխավոր ՌԱՎԻՆ ԳԵՐՇ ՄԵՅՐ ԲՈՒՐՇՏԵՅՆԸ՝ իր խոսքն ավարտելով աղոթքով:

Հանդիսությանը մասնակցում էին նաև Ցեղասպանության ինստիտուտի տնօրեն ՀԱՅԿ ԴԵՄՈՅԱՆԸ, ԱԺ ՀՀԿ խմբակցության պատգամավոր, հայ-իսրայելական միջխորհրդարանական բարեկամական խմբի անդամ ՎԱՀՐԱՄ ՄԿՐՏՉՅԱՆԸ և այլոք:

ԷԹԵՐԻ ՄԱՄՈՒԼՅԱՆ