ՆԱԽԿԻՆ ՓՈԽՆԱԽԱՐԱՐԸ ԿՊԱՇՏՊԱՆԻ՞ «ԵՀՈՎԱՅԻ ՎԿԱՆԵՐԻ» ՇԱՀԵՐԸ

ՆԱԽԿԻՆ ՓՈԽՆԱԽԱՐԱՐԸ ԿՊԱՇՏՊԱՆԻ՞ «ԵՀՈՎԱՅԻ ՎԿԱՆԵՐԻ» ՇԱՀԵՐԸ

Հունվարի 26-ին Արաբկիր եւ Քանաքեռ-Զեյթուն վարչական շրջանների առաջին ատյանի դատարանի դատավոր Սիմիզար Հովսեփյանը մերժեց Ավետարանական եկեղեցու նախկին հոգեւոր հովիվ, վերապատվելի Արմեն Միքայելյանի ու Ավետարանչական ընկերակության մի քանի նախկին աշխատակիցների  հայցը` իրենց աշխատանքից ազատելու վերաբերյալ:

Հիշեցնենք`Արմեն Միքայելյան ու մի քանի աշխատակիցներ դատի էին տվել Ավետարանչական ընկերակցությանը իրենց անհիմն աշխատանքից ազատելու համար: Դատարանում  Ավետարանչական ընկերակցության շահերը պաշտպանում էր արդարադատության նախկին փոխնախարար Արամ Օրբելյանը:

«Իրավունքը» նախկին փոխնախարարից հետաքրքրվեց` ինչու նա որոշեց  դատարանում պաշտպանել Ավետարանչական ընկերակցությանը, եթե այդ կառույցը, ինչպես հայտարարել է Արմեն Միքայելյանը, Հայաստանում գործում է աղանդակերպ: Ի պատասխան` Օրբելյանն ասաց, որ  այս գործը վերաբերում էր աշխատանքային հարաբերություններին` անկախ նրանից, թե  նախկին հովիվն ինչ է հայտարարում.

«Եկեղեցու հետ կախված  վեճի մասով ասեմ, որ եկեղեցուն չեմ պաշտպանել, բացի այդ` եկեղեցին  ներկայացրել է իր դիրքորոշումն ու դրա հետ  կապված հարցերը չեն ներկայացվել դատարանում: Ես իրավունք չունեմ գնահատելու` վստահորդն ինձ դուր է գալիս, թե ոչ Ես ներկայացրել եմ ընկերակցության շահերը  աշխատանքային վեճի շրջանակներում»:

Փաստաբանին հիշեցրինք` հովիվն ու գործին քաջատեղյակներըբ հայտարարել է, որ այս  խնդիրն առաջացել է կրոնական հողի վրա` մասնավորապես հայ ավետարանական եկեղեցին «Շողիկ» ճամբարում սեռադաստիարակության դասեր է  տվել անչափահասներին: «Չեմ ցանկանում դա մեկնաբանել, որովհետեւ անցնում ենք որոշակի փաստերի քննությանը, որոնք այս գործի շրջանակից դուրս են»,- ասաց  պրն Օրբելյանը:

Որոշ փաստաբաններ հրաժարվում են նման կառույցների շահերը պաշտպանել, որոնք ծավալում են Հայաստանում աղանդակերպ գործունեություն: Ինչո՞ւ Արամ Օրբելյանն այդ փաստաբանների  շարքին չեն դասվում:  Փաստաբանը  հարցին նախ  իրավական ձեւակերպումներով պատասխանեց, ապա ասաց. «Չեմ ուզում գնահատել`քայքայիչ է այդ կառույցի գործունեությունը, թե քայքայիչ չէ, որովհետեւ դա դուրս է գործի շրջանակներից:  Փաստաբանի գործն է տրամադրել իրավաբանական աջակցություն: Եթե  իրավաբանական աջակցություն չտրամադրվի` հիմք ընդունելով ինչ-ինչ կարծիքներ, երկիրը երբեք իրավական պետություն չի դառնա»:

Ինչ վերաբերում է խնդրի բարոյական կողմին, Արամ Օրբելյանը չցանկացավ այդ հարցին պատասխանել:

Եթե Ավետարանչական ընկերակցության փոխարեն, օրինակ, լիներ «Եհովայի վկաներ» աղանդավորական կազմակերպությունը, արդարադատության նախկին փոխնախարարը դարձյալ կպաշտպանե՞ր  այդ կառույցի շահերը:  «Եթե խնդիրը կլինի աշխատանքային վեճ, իրավական հարց,  լավ փաստաբանի համար հաճախորդի ով լինելը կարեւոր չէ: Չեմ կարող պնդել` կպաշտպանե՞մ, թե՞ ոչ:  Եթե կա իրավական վեճ, կողմերն իրավունք ունեն ունենալ պաշտպան: Եթե կլինի ազգային, գենդերային, կրոնական հատկանիշներով  խնդիր, եւ պետությունը հրաժարվի  փաստաբան տրամադրել, մենք իրավական պետություն չենք դառնա»,-  պատասխանեց պրն Օրբելյանը:

Անդրադառնալով  Արմեն Միքայելյանի այն հայտարարությանը, թե  առաջին ատյանի դատարանը վճիռ կայացնելիս հաշվի է առել այն, որ Ավետարանչական ընկերության շահերը պաշտպանում է արդարադատության նախկին փոխնախարար Արամ Օրբելյանը, մեր զրուցակիցը չմեկնաբանեց` դա համարելով անիմաստ.

«Մեկնաբանելու հարց  չկա»:

ՍՈՆԱ ԴԱՎԹՅԱՆ