"ՓՈՒԼ ԱՌ ՓՈՒԼ ՍՐՏԻ ԱՆՀԵՏԱՁԳԵԼԻ ՎԻՐԱՀԱՏՈՒԹՅՈՒՆՆԵՐԸ ՏԵՂԱՓՈԽՈՒՄ ԵՆՔ ՊԵՏՊԱՏՎԵՐԻ ՀԱՄԱԿԱՐԳ"

"ՓՈՒԼ ԱՌ ՓՈՒԼ ՍՐՏԻ ԱՆՀԵՏԱՁԳԵԼԻ ՎԻՐԱՀԱՏՈՒԹՅՈՒՆՆԵՐԸ ՏԵՂԱՓՈԽՈՒՄ ԵՆՔ ՊԵՏՊԱՏՎԵՐԻ ՀԱՄԱԿԱՐԳ"

Ինչպես հայտնի է` 2015թ. պետական բյուջեով սրտի անհետաձգելի վիրահատությունների ծրագրի իրականացման համար հատկացվելու է 500 մլն դրամ: Ծրագրի շրջանակներում մշակվել են չափորոշիչները, որոնցով այս կամ այն անհատին կիրականացվի սրտի անվճար անհետաձգելի վիրահատությունը: Սակայն խմբագրության ստացած բազում զանգերը հուշում են, որ քաղաքացիները դեռ չեն պատկերացնում, թե որ դեպքում կարող են հիվանդներն օգտվել ծրագրից եւ որ բուժներում եւ այլն: Ուստիեւª այս հարցերի շուրջ զրուցեցինք Առողջապահության նախարարության աշխատակազմի բժշկական օգնության քաղաքականության վարչության պետ ԾԱՂԻԿ ՎԱՐԴԱՆՅԱՆԻ հետ:
-Հունվարի մեկից մեկնարկած սրտի անհետաձգելի բուժօգնության ծրագրի հիմքը նախագահի նախընտրական թեզերում ներառված առողջ ազգաբնակչության հետ կապված թեզն է, որը արդեն 2014թ. վերջում ներառվել է առողջապահական համակարգի նպատակային ծրագրերի մեջ: Եվ մենք փուլ առ փուլ սրտի անհետաձգելի վիրահատությունները տեղափոխում ենք պետպատվերի համակարգ:
Ծրագրում ընդգրկվում են այն քաղաքացիները, ովքեր մինչ այս ներառված չեն եղել սրտի անվճար ինվազիվ վիրահատության իրավունք ունեցող որեւէ խմբում: Հաշվի է առնվել այն հանգամանքը, որ մեր երկրում լայն տարածում ունեցող սրտանոթային հիվանդությունները մահացության ընդհանուր կառուցվածքում 48 տոկոս են կազմում, եւ որ ստենտավորումն ինֆարկտից մարդու կյանքը փրկելու ամենաարդյունավետ միջոցն է: Նշեմ նաեւ, որ սրտի անհետաձգելի բուժօգնության ծրագրի մեջ ներառված անձինք վեց ամիս անպայման մնալու են տվյալ բուժկենտրոնի հսկողության ներքո, եւ որն այդ ամիսների ընթացքում ոչ միայն շարունակական հսկողություն է իրականացնելու, այլ նաեւ բարդությունների` ռեկորնեզիացիայի դեպքում, եթե ստենտը փակվեց եւ նորից ստենտավորելու հարց եղավ, ապա երկրորդ ստենտը տվյալ բուժկենտրոնն անվճար տեղադրելու:
- Լաբորատոր հետազոտությունը մտնո՞ւմ են ծրագրի մեջ:
- Այո, լաբորատոր հետազոտությունները եւս արվում են անվճար: Դրա մեջ մտնում է կորոնարոգրաֆիան, էլեկտրասրտագրությունը, տրոմբոնինի որոշումը, բիոքիմիական անալիզը, արյան, մեզի ընդհանուր անալիզը: Առնվազն ինը մինիմալ հետազոտություններ ներառված են ծրագրի շրջանակներում, որից հետո հիվանդանոցում անհետաձգելի սրտաբանության պատասխանատու բժիշկը որոշում է` ըստ կլինիկա-լաբորատոր հետազոտությունների` տվյալ հիվանդը մտնո՞ւմ է ծրագրի մեջ, թե` ոչ: Վերջնական որոշողը կլինիսիստն է` որեւէ այլ սոցիալական մակարդակ այստեղ նշանակություն չունի, կարեւոր է բացառապես ախտորոշումը: Այսինքն, եթե եղավ սուր ինֆարկտ էստե էլեվացիայով, ապա անկախ սոցիալական պատկանելությունից, հիվանդը ներառվում է ծրագիր:
- Ցանկացած բժշկական կենտրոն, որտեղ կատարում են սրտի ստենտավորում, կարո՞ղ է հիվանդը հարկ եղած դեպքում դիմել:
- Մենք հուշագիր ենք ստորագրել վեց բժշկական կազմակերպությունների հետ: Չորսը մայրաքաղաքում են, երկուսը` մարզերում: Մարզերի հետ կապված` մենք այլընտրանք էլ չունեինք, որովհետեւ այս պահի դրությամբ տասը մարզերում գործում են միայն երկու բժշկական կազմակերպություններ, որտեղ հնարավոր է կատարել ստենտավորում` դա Գյումրու բժշկական կենտրոնի սրտաբանական բաժանմունքն է եւ ֆրանս-հայկական սրտաբանական կենտրոնը` Գորիսի տարածքում: Երեւանում չորս բկ-ներ են ընտրվել, դրանք են` "Նորք-Մարաշ" սրտաբանական կենտրոնը, "Էրեբունին", "Մալաթիա" բկ-ները եւ թիվ մեկ համալսարանական հիվանդանոցի սրտաբանական բաժանմունքը: Երեք ամիս հետո մենք որոշում կկայացնենք` ընդլայնո՞ւմ ենք այս վեց բկ-ների թիվը, թե` ոչ:
Մենք հետեւելու ենք, որ հենց սկզբից հիվանդի վիճակը ճիշտ գնահատվի, նվազագույնի հասցվեն հնարավոր բոլոր ռիսկերը եւ ապահովվի քաղաքացու իրազեկությունը: Մեր հանձնաժողովներն ուսումնասիրություններ են իրականացնում կոռուպցիոն ռիսկերն իսպառ վերացնելու համար: Իսկ նախարարին կից մշտադիտարկման խորհուրդը կվերահսկի ծրագրի իրականացման ընթացքն ու որակը:
- Ի՞նչ սկզբունքով եք որոշել քվոտաները:
- Առաջին երեք ամսվա համար առայժմ քվոտա չունենք, քանի որ ծրագիրը նոր է մեկնարկել: Այսինքնª այս պահին բոլորն ընդունվում են: Երեք ամիս հետո նոր միայն մենք կփորձենք որոշակի քվոտավորում մտցնել, որի հետ էլ կսահմանենք կարգ:
- Այսինքնª բացառվելո՞ւ է, որ նույն անհետաձգելի բուժօգնության կարիք ունեցող հիվանդին ասեն, որ քվոտան վերջացել է:
- Որեւէ մեկը նման հարցից չի տուժելու:
- Հունվարի մեկից մինչ օրս քանի՞ ստենտավորում է արվել ծրագրի շրջանակներում:
- Այս պահի դրությամբ արդեն 89 հիվանդ ծրագրի շրջանակներում ստենտավորվել է:

ԻԼՈՆԱ ԱԶԱՐՅԱՆ