ԶԱՐՄԱՆՔ

Մեր ժողովուրդը դիպուկ ասացվածք ունի` "Դուզ խոսքը հո շանտղություն չի՞": Եվ զարմանալին այն է, որ դա վերաբերում է նաեւ այնպիսի ոչ այնքան համակրելի կերպարին, ինչպիսին է ԱՄՆ նախկին դեսպան Մարի Յովանովիչը: Ինչ ճիշտն է ճիշտը` տիկինը ժամանակին անկեղծորեն բացատրել է հայ հանրությանը, որ "քաղաքացիական հասարակությունը" բաղկացած է գրանտածիծ ՀԿ-ների հանրագումարից, ու նրանց խնդիրը "սարեր շուռ տալն է": Սակայն հիմա Վիկիլիքսի շնորհիվ հայտնի է դարձել, թե ինչպիսի զեկուցագրեր է գրել տիկին դեսպանը իր վերադասին, մասնավորապես տարբեր քաղաքական ուժերի մասին: Այսպես նա ԱՐԹՈՒՐ ԲԱՂԴԱՍԱՐՅԱՆԻ մասին զեկուցել է հետեւյալը. "Հայկական քաղաքականության քամելեոն` պատրաստակամ վաճառելու իր կուսակցությունը ամենաբարձր գնով":
Մեզ անզարմանք չթողեց եւ ԲՀԿ խմբակցության անդամ ՍՏԵՓԱՆ ՄԱՐԳԱՐՅԱՆԸ. "Եռյակը պահպանելու է իր կենսունակությունը եւ հետագայում եւս շարունակելու է երբեմն-երբեմն հավաքվել, քննարկել: Այսինքն` գործելու է ե՛ւ "եռյակի" ֆորմատը, ե՛ւ քաղաքական ուժերի ավելի լայն կոնսոլիդացման ֆորմատը: Միանշանակ գնալու ենք ամեն ինչի, որ իշխանությունները հրաժարական տան: Իհարկե սահմանադրական ճանապարհով` ցույցեր, երթեր, նստացույցեր": Ընթերցողը հավանաբար կհիշի, թե շուրջ 10 տարի առաջ ինչպես էր բոլոր տեսակի ամբիոններից Ստեփան Դեմիրճյանը բացականչում. "Միայն սահմանադրական ճանապարհով": Եվ ո՞ւր է հիմա նա... Չէ, ուղղիչ աշխատանքային գաղութում չէ, ընդամենը ԱԺ-ում գլխավորում է պարապ գործերի խմբակցությունը: Իսկ Ստեփան Մարգարյանը մեզ զարմացնելով հանդերձ, հիշեցրեց հին սովետական անեկդոտը` փոսն ընկած ձախորդի մասին, ով մինչեւ մութ փորձում է փոսից դուրս գալ եւ հետո ասում. "Մի հատ էլ կփորձեմ, եթե չստացվի կգնամ տուն":
Երեկ Լեհաստանում սկսվեցին ՕՍՎԵՆՑԻՄ համակենտրոնացման ճամբարի ազատագրման 70-ամյակին  նվիրված հանդիսավոր միջոցառումները: Դա ֆաշիզմի դեմ տարած հաղթանակի կարեւորագույն դրվագներից մեկն է, որն ունի մեծագույն` ոչ միայն պատմական, այլեւ բարոյական նշանակություն: Բայց արի ու տես, որ օրվա քաղաքական անբարոյական կոնյուկտուրան այն աստիճանի զզվելի է, որ միջոցառումներին չեն հրավիրել ազատագրման գլխավոր գործող անձին, ում զորքերով էլ ազատագրումը տեղի էր ունեցել` ռուսներին: Լավ, այդ աստիճանի էլ անբարոյական կարելի է լինել, որ ամերիկացիներին հաճոյանալու համար ուրանան 70-ամյակի առիթի թերեւս միակ կերտողին: Հետաքրքիր է, եթե ռուսները տեղյակ լինեին հայկական "անաղուհաց քրդի շուն" դարձվածքին, ապա ի՞նչ նոր դարձվածք կամ այդ դարձվածքի ինչ խմբագրում կառաջարկեին:
ԵՎ վերջապես զարմանալի նախագծեր են քննարկվել ԱԺ ՀԱՆՁՆԱԺՈՂՈՎՆԵՐՈՒՄ: Այսպես, քննարկվել է միջազգային համաձայնագիր "Լուսնի եւ այլ երկնային մարմինների վրա պետությունների գործունեության կարգավորման մասին": Հասկանալի է, որ ոմանք սկսել էին դրա վրա չարախնդալ եւ ծիծաղել, բայց այդպիսի համաձայնագրի առնչությամբ նույն հաջողությամբ կարող էին ծիծաղել ցանկացած պետության վրա, այդ թվում եւ տիեզերական գերտերությունների: Չէ որ դեռեւս չկա որեւէ պետություն, որը կարողանար տիեզերագնաց ուղարկել այլ մոլորակներ ու առավել եւս այդտեղ զբաղվեր տիեզերագնաց փրկելով, իսկ ամերիկացիներն էլ իրենց լուսնային ծրագիրը վաղուց փակել են եւ չեն վերսկսում: Բոլոր դեպքերում` լավ է, որ մեր օրենսդիրները նաեւ բավականին հեռավոր ապագային վերաբերող նախագծեր են քննարկում: Բայց, օրինակ, Առողջապահության, մայրության եւ մանկության հարցերի հանձնաժողովը մեզ բոլորիս հաճելիորեն զարմացրեց` մեկ տարով հետաձգելով Առողջապահության նախարարության առաջարկած ալյուրի քիմիական եսիմ ինչերով հարստացնելու կասկածելի նախագիծը եւ հանձնարարեց լրացուցիչ ուսումնասիրություններ կատարել:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ