ՕԵԿ-Ը ԱԳՐԱՐԱՅԻՆ ՀԱՄԱԼՍԱՐԱՆ ԴԱՏԱԿԱՆ ՎԵՃԸ ՇԱՐՈՒՆԱԿՎՈՒՄ Է

ՕԵԿ-Ը ԱԳՐԱՐԱՅԻՆ ՀԱՄԱԼՍԱՐԱՆ ԴԱՏԱԿԱՆ ՎԵՃԸ

ՇԱՐՈՒՆԱԿՎՈՒՄ Է

«Իրավունքը» բազմիցս անդրադարձել է ՕԵԿ-Ագրարային համալսարան մեծ աղմուկ հանած տարածքային վեճին:

Հիշեցնենք` Երևանի նախկին քաղաքապետ Երվանդ Զախարյանը 2008-ին «Օրինաց երկիր» կուսակցությանը տվել է  մի փաստաթուղթ, ըստ որի՝ Ագրարային համալսարանի տարածքից  262 քմ. տրվում է իրենց: Զավեշտալին այն  է, որ նույն քաղաքապետը 2006 թ-ի մայիսի 6-ի  որոշմամբ ՕԵԿ-ի կողմից ապօրինի կառուցված կաթսայատունն ու ավտոտնակը  ճանաչում է  որպես ապօրինի կառույց և որոշում   կայացնում այն քանդել: Նույն քաղաքապետը 2006-ի օգոստոսի 15-ին չեղյալ է համարում իր նախորդ որոշումը: Հաջորդ օրը՝ օգոստոսի 16-ին, քաղաքապետը որոշում է այդ ապօրինի կառույցները  ճանաչել պետական սեփականություն եւ հանձնել Ագրարային համալսարանին:  Դրա հիման վրա ՀՀ կառավարությունը  2006 թ-ի դեկտեմբերի 28-ին 1900 Ա որոշմամբ  որոշում է պետական սեփականություն ճանաչված  կառույցն անժամկետ եւ անհատույց   հանձնել  Ագրարարային համալսարանին հողի հետ:  Թվաց՝ ամեն ինչ ավարտվեց, սակայն ութ տարի անց՝ 2014-ին,  ՕԵԿ-ի հանձնարարությամբ բանվորները սկսեցին տանիքը քանդել:  Քանի որ կողմերն այդպես էլ  համաձայնության չեկան,  գործը հասավ  վարչական դատարան:

Այսօր «Իրավունքի» հետ զրույցում Ագրարային համալսարանի պրոռեկտոր Պարույր Էֆենդյանն ասաց, որ նախորդ դատական նիստին ՕԵԿ անդամ Հովհաննես Մարգարյանը եւ նրա փաստաբանը չէին ներկայացրել. «Մենք  վարչական դատարանում վիճարկում ենք քաղաքապետի որոշումը (նկատի ունի նախկին քաղաքապետ Երվանդ Զախարյանին-խմբ.), որով հողահատկացում  է  արվել ՕԵԿ-ին, բայց  ՕԵԿ-ի ներկայացուցիչները դատարան չեկան»:

Թեւ քաղաքապետարանը, պրոռեկտորի խոսքով, երկու անգամ տուգանել է ՕԵԿ-ին ապօրինի շինաշխատանքներ  կատարելու համար, իսկ հիմա էլ գործը դատական փուլում է, սակայն  ՕԵԿ-ը վիճելի կառույցում հարդարման աշխատանքներ անելուց հետո այն շահագործում է` անցկացնում միջոցառումներ:

Սույն գործով դատական հաջորդ նիստը նշանակվել է փետրվարի վեցին:

ՍՈՆԱ ԴԱՎԹՅԱՆ