ՔՈՉԱՐՅԱՆԱԿԱՆ ԵՆԹԱՏԵՔՍՏԸ

ՔՈՉԱՐՅԱՆԱԿԱՆ ԵՆԹԱՏԵՔՍՏԸ

Օրերս քաղաքական անդրաշխարհից կրկին իր մասին հիշեցրեց ՀՀ երկրորդ նախագահ Ռոբերտ Քոչարյանը: Անդրադառնալով Գյումրու դեպքերին`վերջինս իրեն հատուկ հեգնանքով խոսեց, թե ով ինչ պետք է աներ ու ինչ չաներ: Ավելին` ըստ նրա, տեղի ունեցածը կանխելու համար անհրաժեշտ էին իշխանությունների կայծակնային առաջանցիկ գործողությունները: Այս մասին «Իրավունքը» զրուցեց «Քրիստոնեա-ժողովրդական վերածնունդ» կուսակցության նախագահ ՍՈՍ ԳԻՄԻՇՅԱՆԻ հետ:
-Պարոն Գիմիշյան, որպես փորձառու քաղաքական գործիչ` ըստ Ձեզ, վերոնշյալ արտահայտությամբ ի՞նչ էր ուզում իրականում ասել Ռ. Քոչարյանը:
- Գիտեք, հիմա կողքից խոսելը շատ հեշտ է, խորհուրդ տալը` նույնպես: Իհարկե, իշխանությունների կեցվածքը փայլուն չէր, բայց կայծակնային գործողություններ, թե ինչ պիտի անեին, լավ չեմ պատկերացնում, բացի ժամանակին ցավակցելուց եւ որոշակի հանդարտեցնող հարցադրումներ անելուց:

Չեմ կարող այդպես շատ լուրջ վերաբերվել Ռոբերտ Քոչարյանի հայտարարությանը: Կարծում եմ` միայն արձագանքելու համար ընդամենը արձագանքել է, դա քննարկելու առարկա չէ:
- Այնուամենայնիվ, ըստ Ձեզ, այստեղ զուտ արձագանքելու խնդի՞ր էր, թե նա այսպիսի հարցազրույցներով փորձում է այլ քաղաքական խնդիրներ լուծել:
- Իհարկե, այստեղ ենթատեքստը, կարծում եմ, ավելի կարեւոր է իր համար, քան թե բուն Գյումրու դեպքը: Ըստ երեւույթին, նպատակն էր այսօրվա իշխանություններին որոշակի հարված հասցնել: Ի վերջո, նաեւ իշխանական պայքար է գնում: Իշխանության տարբեր թեւեր լուրջ կռիվ են տանում, թե ով որ կտորին պետք է տիրանա, այսպես ասած, իշխանության տորթից: Ավելի շատ այդ կոնտեքստը կա այստեղ, այսինքն` քաղաքական դաշտում ի հայտ գալու եւ հիմնական ներիշխանական մրցակցին հարված հասցնելու: Չեմ բացառում նաեւ, որ կարող է այլ ենթատեքստեր լինել, բայց ենթադրությունները շատ կլինեն, դրա մասին չարժե խոսել:

ՀՐԱՆՏ ՍԱՐԱՖՅԱՆ