ՀԱՄԱԶԳԱՅԻՆ ԹԱՏՐՈՆԸ ՀՅՈՒՐԱԽԱՂԵՐԻ Է ՄԵԿՆՈՒՄ

ՀԱՄԱԶԳԱՅԻՆ ԹԱՏՐՈՆԸ ՀՅՈՒՐԱԽԱՂԵՐԻ Է ՄԵԿՆՈՒՄ

Համազգային պետական թատրոնը հյուրախաղերով հանդես կգա ԱՄՆ-ում և Կանադայում։ Սփյուռքահայ հանդիսատեսին կներկայացվեն «Շխոնց Միհրան», «44 աստիճանի վրա», «Փրկության կղզի» և «Ամենալավ տունը» ներկայացումները։ Այդ մասին «Իրավունքի» հետ զրույցում ասաց թատրոնի տնօրեն ՎԱՐԴԱՆ ՄԿՐՏՉՅԱՆԸ:

«Փետրվարի 3-8-ը Կալիֆորնիայի Լոս-Անջելես քաղաքում հայկական շնչով հագեցած թատերական փառատոն է սպասվում։ Համազգային պետական թատրոնը  Համազգային հայ կրթական և մշակութային միության Ամերիկայի արևմտյան շրջանային վարչության հրավերով կներկայացնի չորս ներկայացում:

Վ. Սարոյանի ստեղծագործությունների հիման վրա բեմադրված «Փրկության կղզին» լեցուն է բարության ամենափրկիչ ուժի հավատով։

Արտագաղթի ցավոտ թեմային անդրադարձող «44 աստիճանի վրա» ներկայացումն անցյալ տարի ընդգրկված լինելով թատրոնի ամերիկյան հյուրախաղերում՝ այս անգամ հատուկ հրավեր է ստացել և փետրվարի 15-ին կներկայացվի նաև Սան Ֆրանցիսկոյում»։

Վ. Մկրտչյանն ընդգծեց, որ այս տարվա հյուրախաղերում առանձին տեղ է գրավում Հայոց եղեռնի զոհերի հիշատակին նվիրված «Շխոնց Միհրան» ներկայացումը։ Մ. Խերանյանի այս հուզումնառատ երկը լի է թախիծի, կարոտի և միևնույն ժամանակ հույսի ելևէջներով։ Իսկ ահա «Ամենալավ տունը» ներկայացումը նախատեսված է դպրոցահասակ երեխաների համար։

Տնօրենի փոխանցմամբ` ամերիկյան հյուրախաղերին կհաջորդեն թատրոնի հյուրախաղերը Կանադայում ՝ այս անգամ Համազգային հայ կրթական և մշակութային միության Կանադայի շրջանային վարչության հրավերով։ Փետրվարի 21-ից մարտի 1-ը Մոնրեալ և Տորոնտո քաղաքներում կանադահայ համայնքին կներկայացվեն «Փրկության կղզի» և «44 աստիճանի վրա» ներկայացումները։

«Սա Համազգային թատրոնի պատմության մեջ ամենաերկար հյուրախաղերն են՝ մոտ մեկ ամիս տևողությամբ։ Անցյալ տարի, երբ Լոս-Անջելեսում հանդես եկանք հյուրախաղերով, արժանացանք ջերմ ընդունելության և թատերասեր ժողովրդի դրվատանքին, ինչն էլ դարձավ այս տարվա հրավերի գրավականը։ Հյուրախաղերի կայացման առհավատչյան Համազգային հայ կրթական և մշակութային միության կենտրոնական վարչության նվիրյալ աշխատանքն է, մարդկային և ֆինանսական միջոցների ներդրումը, ինչի համար մեր անսահման շնորհակալությունն ենք հայտնում», - եզրափակեց Վ. Մկրտչյանը:

Վ. ՄՈՒՐԱԴՅԱՆ