ԻՆՉՈ՞Ւ ՍՊԱՌՈՂՆԵՐԸ ՉԵՆ ԱՐՁԱԳԱՆՔՈՒՄ ՍՊԱՌՈՂԱԿԱՆ ՇՈՒԿԱՅՈՒՄ ՏԻՐՈՂ ԻՐԱՎԻՃԱԿԻՆ

ԻՆՉՈ՞Ւ ՍՊԱՌՈՂՆԵՐԸ ՉԵՆ ԱՐՁԱԳԱՆՔՈՒՄ ՍՊԱՌՈՂԱԿԱՆ ՇՈՒԿԱՅՈՒՄ ՏԻՐՈՂ ԻՐԱՎԻՃԱԿԻՆ

Նախորդ տարվա նոյեմբերից սկսած Հայաստանի սպառողական շուկայում նկատվեց ապրանքների գների բարձրացում: Ընդհանուր առմամբ այդ թանկացումները սկսվեցին նախքան դրամ-դլար փոխարժեքի տատանումը: Որոշ տնտեսվարողներ այդ ամենը կապեցին  էներգակիների եւ հումքի թանկացումների հետ: Սպառողների ազգային ասոցիացիայի նախագահ Մելիտա Հակոբյանի խոսքով`գուցե սպառողական շուկայում թանկացումները չշարունակվեին մինչեւ այսօր, եթե սպառողները կարողանային այդ ամենին ճիշտ ձեւով արձագանքել. «Ես չեմ հասկանում, թե ինչ է կատարվում, մարդիկ կամ այսպիսի իրավիճակներից զզվել են, կամ` հոգնել: Երբ շուկայում թանկացումներ են նկատվում, մենք սպառողներից զանգեր չենք ստանում»,-նշեց Մելիտա Հակոբյանը :

Ըստ նրա` տարադրամի փոխարժեքի  կարգավորմանը զուգահեռ սպառողական շուկայում ոչինչ չփոխվեց, քանի որ տնտեսվարողները նման ճանապարհով ցանկանում են իրենց կրած վնասները շտկել. «Ամբողջ աշխարհում բենզինի գները իջնում են, իսկ մեզ մոտ ընդհակառակը: Համաշխարհային շուկայում բենզինի գինը իջավ մինչեւ 47-48 դոլար, իսկ մեզ մոտ այդպիսի դեպքերում 10-20 դրամով թանկանում է: Հայաստանում գները բարձրացնելու դեպքում 100-150 դրամ բարձրացնում են, իսկ իջեցնելու դեպքում` միայն 10 դրամով»,-շեշտեց Մ. Հակոբյանը:

Անդրադառնալով «Ցորենի ալյուրի հարստացման մասին» օրենքի նոր նախագծին`տիկին Հակոբյանը  փաստեց, որ առաջիկա ուրբաթ օրը ասոցիացիայի անդամներով կհանդիպեն առողջապահության նախարարի հետ: Այդ հանդիպման ժամանակ էլ կհայտնեն իրենց տեսակետը նոր օրենքի նախագծի վերաբերյալ:

ԶՎԱՐԹ ԽԱՉԱՏՐՅԱՆ