ՀԱՄԵՐԳԱՇՐՋԱՆԸ ԽՈՍՏԱՆՈՒՄ Է ԼԻՆԵԼ ԴԺՎԱՐ

ՀԱՄԵՐԳԱՇՐՋԱՆԸ ԽՈՍՏԱՆՈՒՄ Է ԼԻՆԵԼ ԴԺՎԱՐ

Հայաստանի ֆիլհարմոնիկ նվագախումբը սկսում է իր 90-րդ համերգաշրջանը նոր` ազգային կարգավիճակ ստացած. այսուհետ նվագախումբը կանվանվի Հայաստանի ազգային ֆիլհարմոնիկ նվագախումբ (ՀԱՖՆ): Այդ մասին տեղեկացրեց ՀԱՖՆ գեղարվեստական ղեկավար եւ գլխավոր դիրիժոր ԷԴՈՒԱՐԴ ԹՈՓՉՅԱՆԸ:
"2015 թվականը շատ կարեւոր եւ առանձնահատուկ տարի է հայ ժաղովրդի համար: Նախեւառաջ, Հայոց ցեղասպանության 100-րդ տարելիցն է, երբ ողջ հայությունը սգում եւ վառ է պահում Եղեռնի անմեղ զոհերի հիշատակը: Շնորհակալ ենք բոլոր այն երկրներին եւ ազգերին, որոնք ճանաչել են Ցեղասպանության փաստը, եւ մեզ համար խիստ գնահատելի է այն, որ ավելի շատ մարդիկ միանան արդարության մեր պահանջին` ուղղված նրանց, ովքեր հարյուր տարի անց դեռ չեն ընդունել Ցեղասպանության փաստը",- ասաց Է. Թոփչյանն ու հավելեց, որ Ֆիլհարմոնիկ նվագախումբը հայ ազգի կարեւորագույն խորհրդանիշներից մեկն է, քանի որ այն հիմնադրվեց դարասկզբին իրականացված մեծ ոճրագործությունից 10 տարի անց եւ գոյատեւեց մինչ օրս` դառնալով հայ ազգի վերածննդի յուրօրինակ խորհրդանիշ:
"Սկսում ենք համերգաշրջանը, որը խոստանում է լինել դժվար, բայց եւ լի` մեծամասշտաբ, տպավորիչ եւ գեղեցիկ իրադարձություններով: Կունենանք շրջագայություններ եւ համերգներ, փառատոների շրջանակներում կհյուրընկալենք արտասահմանցի եւ հայ մենակատարների",- ընդգծեց մաեստրոն:
Խոսելով առաջիկա սպասվող համերգի մասին` մեր զրուցակիցն ասաց. "Հունվարի 30-ի համերգային ծրագիրը մի փոքր բազմաբնույթ է. մեզ կհյուրընկալվեն շեփորահար Ռամ Օրենը (Իսրայել) եւ դաշնակահար Ալեքսեյ Կուրբատովը (Ռուսաստան)` կատարելու Արամ Խաչատրյանի, Նուբար Ասլանյանի եւ Ալեքսեյ Կուրբատովի ստեղծագործություններից: Վերջինիս "Դաշնամուրային կոնցերտը" կներկայացվի Դավիթ Մնացականյանի թեմաներով":

ՎԼԱԴ ՄՈՒՐԱԴՅԱՆ