«ԴՈՒՔ ՈՒԶՈՒՄ ԵՔ, ՈՐ 131 ՊԱՏԳԱՄԱՎՈՐՆ ԷԼ ԳՅՈՒՄՐԻՈ՞ՒՄ ԼԻՆԵԻՆ». ԱՐՄԵՆ ՄԱՐՏԻՐՈՍՅԱՆ

«ԴՈՒՔ ՈՒԶՈՒՄ ԵՔ, ՈՐ 131 ՊԱՏԳԱՄԱՎՈՐՆ ԷԼ

ԳՅՈՒՄՐԻՈ՞ՒՄ ԼԻՆԵԻՆ». ԱՐՄԵՆ ՄԱՐՏԻՐՈՍՅԱՆ

Նախագահի թեկնածու, «Ժառանգություն» կուսակցության առաջնորդ Րաֆֆի Հովհաննիսյանը 2013 թ-ին նախագահական ընտրություններին  գյումրեցիներից ստացավ ամենաշատ թվով ձայներ: Սակայն հունվարի 15-ին Գյումրիում տեղի ունեցած  բողոքի հուժկու ալիքի ժամանակ գյումրեցիների կողքին էր երկու պատգամավոր` ԲՀԿ-ական Մարտուն Գրիգորյանն ու «Ժառանգության»  պատգամավոր Զարուհի Փոստանջյանը: Որտեղ էր Րաֆֆի Հովհաննիսյանը, ինչո՞ւ գյումրեցիների կողքին չէր: Հարցի պատասխանը փորձեցինք ստանալ «Ժառանգության» կուսակցության փոխնախագահ Արմեն Մարտիրոսյանից: «Այս մի քանի օրը անընդհատ գնում-գալիս եմ Գյումրի, բազմաթիվ քաղաքացիների եմ տեսել, սակայն նրանցից ոչ ոք նմանատիպ  խոսք չի հայտնել: Ընդդիմադիր մեր գործընկերներն ինչո՞ւ են այդքան մտահոգ, չեմ կարողանում հասկանալ, բայց Րաֆֆի Հովհաննիսյանը Գյումրու հետ միջնորդի կարիք չունի: Ինքը ցանկացած պահի էլ գյումրեցիների հետ է»,- պատասխանեց  կուսակցության փոխնախագահը:

Ինչո՞ւ «Ժառանգության» առաջնորդը  Գյումրու սարսափելի սպանդի լուրը լսելուն պես   անմիջապես Հայաստան չեկավ ու չկանգնեց գյումրեցիների կողքին, ընդամենը ցավակցական խոսք հղեց: «Րաֆֆի Հովհաննիսյան արտերկրում կարեւոր հանդիպումներ ունի, դրա համար էլ Հայաստանում չէ: Բայց  Հովհաննիսյանի հարգանքը մեկ  անգամ չէ, որ դրսեւորվել է եւ  այդպես էլ  շարունակվելու է»,- ասաց պրն Մարտիրոսյանը:

- Այդքան կարեւոր հանդիպումնե՞ր ուներ Րաֆֆի Հովհաննիսյանը, որ չէր կարող գալ Հայաստան:

- Եթե այդ պահին այդ իրադարձությունների ժամանակ նա այստեղ չէր, հետագայում գալը չեմ կարծում` իրավիճակ էր փոխվելու: Ընդդիմադիր  քաղաքական ուժերի այս խիստ մտահոգ հարցին կարծում եմ կպատասխանի նաեւ Րաֆֆի Հովհաննիսյանը:

- Պրն Մարտիրոսյան, «եռյակը» ՕԵԿ-ի հետ  2014-ին  միասնական դատապարտող հայտարարություն տարածեց ՀԱԿ պատգամավոր Արամ Մանուկյանի ու ազատամարտիկների նկատմամբ տեղի ունեցած բռնությունների մասին: Ինչո՞ւ այդ նույն քաղաքական ուժերն այդքան միասնական մոտեցում չդրսեւորեցին գյումրիի դեպքերի օրը` հունվարի 15-ին, եւ չսատարեցին գյումրեցիներին:

- Քաղաքական ուժերը իրենց հայտարարություննեևը ներկայացրել են: Կարծում եմ` քաղաքական ուժերի խնդիրը մեկն է`ստեղծել այնպիսի իշխանություն, որը համապատասխանի իր լիազորություններին, իր պարտականություններին:

- Բայց ինչպես է , որ Արամ Մանուկյանի դեմ կատարված բռնության համար կարողանում են միավորվել քաղաքական ուժերը, իսկ այս դեպքում միասնականություն չկար:

- Միասնական են, ո՞վ ասաց` միասնական չեն:

- Միայն երկու պատգամավոր են եղել…

- Դուք ուզում եք, որ 131 պատգամավորն էլ էնտե՞ղ լինեին:

- Այո, քանի որ անկառավարելի իրավիճակ էր ստեղծվել Գյումրում:

- Երեւի թե: Դուք զարգացումների  սցենարը պետք է նախօրոք մեզ տայիք, որ մենք պատկերացնեիք` ինչ կարող էր  լինել: Բայց եթե մենք գնում ենք այդ տրամաբանությամբ, չեմ ընդունում դա: Եթե Ձեզ թվում է, որ հեշտ է նման իրավիճակը կառավարել, սխալվում եք: Ցանկացած պարագայում մենք խնդիր ունենք պատճառները վերացնելու, ոչ թե գնալու հետեւանքների հետեւից: Ես կարծում եմ, որ երկու պատգամավորի ներկայությունը բավական էր Գյումրիում  ժողովրդին հանդարտեցնելու համար:

- Տեսակետ է հնչում, որ փորձ արվեց Գյումրիում  հունվարի 15-ին մայդան սարքելու:

- Ոչ, նման խնդիր չկար: Իշխանություն փորձում էր  իր վրայից այդ ընթացքը այլ ուղղությամբ տանել:

- Համաձա՞յն եք, որ գյումրիի դեպքերի օրը քաղաքական մեռելոց էր:

- Այո, ճիշտ են  գրում, քանի դեռ կա այս իշխանությունը, քաղաքական դաշտում  մեռելոց է…

- Մեռելոցը վերաբերում է  նաեւ ընդդիմությանը:

- Ընդդիմությանն էլ է վերաբերում: Քանի դեռ կա այս իշխանությունը, մենք բոլորս մեռելոցի մեջ ենք:

ՍՈՆԱ ԴԱՎԹՅԱՆ