ԳՅՈՒՄՐԻԻ ԴԵՊՔԵՐԻ ՀԵՏ ԿԱՊՎԱԾ ԱԺ ԼՍՈՒՄՆԵՐԸ ՎԵՐԱԾՎԵՑ Գ. ԿՈՍՏԱՆՅԱՆԻ ՏՂԱՄԱՐԴԿՈՒԹՅԱՆ ՄԱՍԻՆ ՔՆՆԱՐԿՄԱՆ

ԳՅՈՒՄՐԻԻ ԴԵՊՔԵՐԻ ՀԵՏ ԿԱՊՎԱԾ ԱԺ ԼՍՈՒՄՆԵՐԸ ՎԵՐԱԾՎԵՑ Գ. ԿՈՍՏԱՆՅԱՆԻ ՏՂԱՄԱՐԴԿՈՒԹՅԱՆ ՄԱՍԻՆ ՔՆՆԱՐԿՄԱՆ

Այսօր ԱԺ պետաիրավական հանձնաժողովում կազմակերպված խորհրդարանական լսումները խիստ թեժ ընթացան: Արդյունքում հարցերի մեծ մասը քննարկման ենթակա չէր, քանի որ նախաքննություն է գնում, իսկ մի շարք հարցեր էլ նվիրված էին ավելորդ պաթոսին ու հուզառատությանը: Օրինակ, ԱԺ ԲՀԿ խմբակցության քարտուղար ՆԱԻՐԱ ԶՈՀՐԱԲՅԱՆԻՆ հետաքրքրում էր ավելի շատ ՀՀ գլխավոր դատախազ Գեւորգ Կոստանյանի տղամարդկությունը: Այս մասին տիկին Զոհրաբյանը հետաքրքրվեց. «Երբ Դուք Գյումրիում հայտարարեցիք, որ անհապաղ կդիմեք ՌԴ գլխավոր դատախազին՝ հիմա դա զգացմունքային, էմոցիաների տակ արվա՞ծ հայտարարություն էր: Ասացիք՝ որպես տղամարդ հայտարարում եմ, դա ինքնանպատա՞կ էր: Եվ հետո այս օրերին գլադիատորական հայտարարություններ եղան, որ երկու ժամ առաջ արդեն գիտեինք, որ Պերմյակովը լքել է զորամասը: Բա որ գիտեիք, ինչի՞ չխանգարեցիք: Ի՞նչն էր խանգարում ՀՀ իրավապահներին ձերբակալել նրան: Քանի որ այս օրերին հնչեցին տարբեր հայտարարություններ սուգ հայտարարելու աննպատակահարմարության վերաբերյալ, նման հայտարարություն անողներին անվանում եմ անպարկեշտ, որոնք զբաղված են եղել քաղաքական սպեկուլյացիաներով եւ իրենց տերերի շահերը սպասարկելով»: Դյուրագրգիռ տիկնոջը փորձեց հանգստացնել ՀՀ Գլխավոր դատախազ Գ. Կոստանյանը. « Տիկին Զոհրաբյան, տղամարդկային հարթության մասին խոսելիս պետք է նախ նշեմ, որ ոչ միայն տղամարդկային, այլեւ ես՝ որպես գլխավոր դատախազ պարտականություն ունեմ նման դիմումով հանդես գալու ՌԴ գլխավոր դատախազի առաջ: Ես դա կատարելու եմ: Մեր հասարակության մեջ արհամարվում է տղամարդկային հատկության վերաբերյալ պատկերացումները: Պետք է ավելի զուսպ լինել: Ես երբեք չեմ դրժում իմ պարտականությունների կատարման հետ կապված որեւէ գործընթաց: Ես դիմելու եմ, բայց պետք է ունենամ անհրաժեշտ հիմքեր»:

ՀՐԱՆՏ ՍԱՐԱՖՅԱՆ