ՖՈՏՈ-ՑՈՒՑԱՀԱՆԴԵՍ`ՆՎԻՐՎԱԾ ՀՆԴԿԱՍՏԱՆԻ ՀԱՆՐԱՊԵՏՈՒԹՅԱՆ 65-ԱՄՅԱԿԻՆ

Արխիվ 12-16 21 Հունվար, 2015 20:14

ՖՈՏՈ-ՑՈՒՑԱՀԱՆԴԵՍ`ՆՎԻՐՎԱԾ ՀՆԴԿԱՍՏԱՆԻ ՀԱՆՐԱՊԵՏՈՒԹՅԱՆ 65-ԱՄՅԱԿԻՆ

Հունվարի 27-ին՝ Հայաստանի ազգային պատկերասրահում (ՀԱՊ) կբացվի Հնդկաստանի Ջամմու և Քաշմիր նահանգի վերաբերյալ «Դրախտ երկրի վրա» ֆոտո-ցուցահանդեսը, որը նվիրված է Հնդկաստանի Հանրապետության 65-ամյակին: Այս մասին տեղեկացնում է ՀԱՊ-ի հասարակայնության հետ կապերի բաժինը:

Ցուցադրված 82 լուսանկարներում պատկերված են նահանգի մշակույթը, գեղատեսիլ վայրերը, տաճարները և այլն:

Բացման պաշտոնական մասում ելույթ կունենան ՀՀ-ում Հնդկաստանի դեսպան Սուրեշ Բաբուն, Հայաստանի ազգային պատկերասրահի տնօրենի ժ/պ Անուշ Հակոբյանը, «Լոտոս» ՀԿ-ի նախագահ Մարինե Պապյանը:

Արևելագետ, ԵՊՀ դասախոս Նաիրա Մկրտչյանը կներկայացնի հետաքրքիր տեղեկություններ Ջամմու և Քաշմիր նահանգի մասին:

Համերգային մասում ելույթ կունենան «Զանգակներ» համույթը (գեղ. ղեկավար Շահե Քեշիշյան), քամանչահար Հակոբ Խալաթյանը, դուդուկահար Հարություն Չկոլյանը, «Վիկտորիա» պարային համույթը:

Կցուցադրվի նաև «Հնդկաստան. միասնություն բազմազանության մեջ» ֆիլմը, որը պատրաստել է «Արմեդիա» տեղեկատվական-վերլուծական գործակալությունը (հեղինակ` Նաիրա Մկրտչյան): Ֆիլմը ներկայացնում է բազմազգ և բազմակրոն Հնդկաստանը, նրա բազմազան բնությունը, պատմում է երկրի` բրիտանական գաղութատիրությունից անկախանալու և հանրապետություն հռչակելու, ինչպես նաև՝ բազմադարյա փիլիսոփայության մասին:

«Դրախտ երկրի վրա» ֆոտո-ցուցահանդեսը կգործի հունվարի 27-ից փետրվարի 10-ը:

Հայաստանի ազգային պատկերասրահում ցուցահանդեսը կազմակերպել է «Լոտոս» հասարակական կազմակերպությունը՝ ՀՀ-ում Հնդկաստանի դեսպանատան աջակցությամբ:

Վ. ՄՈՒՐԱԴՅԱՆ