«ՈՏՔԻ ՎՐԱ ՏԱՔ ԳԼԽՈՎ ՈՐՈՇՈՒՄՆԵՐ ԿԱՅԱՑՆԵԼԸ ՍԽԱԼ Է»

«ՈՏՔԻ ՎՐԱ ՏԱՔ ԳԼԽՈՎ
ՈՐՈՇՈՒՄՆԵՐ ԿԱՅԱՑՆԵԼԸ ՍԽԱԼ Է»

Մարեց հունվարի 12-ին Գյումրիում դաժանաբար սպանված Ավետիսյանների ընտանիքի վերջին ճրագը: Թեպետ հայաստանյան ու արտասահմանյան բժիշկներն արեցին հնարավորն ու անհնարինը, սակայն վիրավոր 6 ամսական Սերյոժա Ավետիսյանը հեռացավ կյանքից` ընդմիշտ միանալով իր ընտանիքին: Տեղի ունեցած ողբերգության եւ դրան հաջորդած դեպքերի մասին «Իրավունքը» զրուցեց «Ժողովրդավարական հայրենիք» կուսակցության նախագահ, ծնունդով Շիրակի մարզից ՊԵՏՐՈՍ ՄԱԿԵՅԱՆԻ հետ:

«ԲՆԱԿԱՆԱԲԱՐ, ՍԱԴՐԻՉՆԵՐ ՉԷԻՆ ԿԱՐՈՂ ՉԼԻՆԵԼ»

-Պարոն Մակեյան, հետադարձ հայացք նետելով Ավետիսյանների ընտանիքի ողբերգությանը հաջորդած դեպքերին` Գյումրիի եւ Երեւանի փողոցներում, ի՞նչ եզրակացություն կարող ենք անել այսօր:

- Տեղի ունեցածից հետո մեր կուսակցությունը քաղաքական հայտարարությամբ հանդես եկավ, որտեղ հստակ գնահատականները տվել ենք: Ոստիկանությունը կրկին գործեց այնպես, ինչպես գործել է վերջին տասնամյակում, այսինքն` հախուռն, անկազմակերպ, նպատակ ունենալով մեկ խնդիր` ահաբեկել: Եվ մենք շատ լուրջ մտահոգված ենք, որ եթե այս աշխարհաքաղաքական լարված իրավիճակում, Աստված ոչ անի, մեզ համար անցանկալի զարգացումներ լինեն այս տարածաշրջանում, ինչպիսի ողորմելի վիճակում կհայտնվենք:
- Ըստ Ձեզ, այնուամենայնիվ, տեղի ունեցած բախումները` ոստիկանության եւ ցուցարարների միջեւ, արդյո՞ք սադրիչների «ձեռքի գործը» չէր:
- Կային սադրիչներ, թե` ոչ, ասեմ, որ լավ տեղեկացված եմ, եւ այդ հավաքվածների մեծ մասը ինքնաբուխ էր հավաքվել: Ի դեպ, հիմնականում երիտասարդություն էր: Բնականաբար, սադրիչներ չէին կարող չլինել, բայց դրանք մեծ որակ չկազմեցին, եւ եղավ այն, ինչ եղավ: Ոստիկանությունը, փաստորեն, էլի գործեց ոչ պրոֆեսիոնալ:
- Ինչո՞ւ:
- Եթե մասնագիտական լուրջ կազմակերպված գործեր, այդ բախումը չէր լինի: Իրենք նախ պետք է կարողանային մեկուսացնել սադրիչներին, եթե, իրոք, նմաններ կային: Իսկ իրենք լավ գիտեին, թե ովքեր են սադրիչները: Փոխանակ նրանց հետ խնդիրը լուծեին, անկազմակերպ, հախուռն օպերացիա իրականացրին, որի արդյունքում բոլորս էլ տեսանք` ինչ եղավ:

«ԼԱՎ ՆՊԱՏԱԿՈՎ ՎԱՏ ԲԱՆ ԱՆԵԼԸ, ԿԱՐԾՈՒՄ ԵՄ,
ԱՐԴԱՐԱՑՎԱԾ ՉԷ»

-Ամեն դեպքում, տեղի ունեցած բախումների մեջ «մայդանի» հայաստանյան սցենար տեսնո՞ւմ էիք:
- Բարդ է միանշանակ գնահատական տալ, բայց զարգացումները, եթե խորանային, չի բացառվում: Այնուամենայնիվ, լավ նպատակով վատ բան անելը, կարծում եմ արդարացված չէ: Եվ դրա համար էլ, Երեւանում ոստիկանությունը անհասկանալի միջոցառում արեց Ազատության հրապարակում, այսինքն` չենք կարող բացառել, որ այդ գործողությունները կանխարգելիչ քայլեր էին:
- Իսկ հավանականություն տեսնո՞ւմ եք, որ Ավետիսյանների սպանության գործում ռուս զինվոր Վալերի Պերմյակովից բացի, ինչ-որ երրորդ ուժերի մասնակցություն լինի:
- Եթե շահագրգիռ կողմերը դիտարկենք, ապա պետք է նշենք, որ սա ո՛չ ռուսներին էր պետք, ո՛չ հայերիս: Մեր հայտարարության մեջ այդ ուղղությամբ եւս մեսիջներ ուղարկել ենք, որ պարտավոր են իշխանությունները գտնել դրդապատճառը: Երբ դա բացահայտվի, պարզ կլինի, թե երրորդ ուժեր կան այս քր.գործում, թե` չկան: Եվ հետո պետք է գտնել հանցագործությունն իրականացրած ամբողջ շրջանակը: Իմ ունեցած ինֆորմացիայով եւ իմ պատկերացմամբ` դա մի մարդու բան չէր, դրա հետ մարդիկ են եղել: Ու եթե այս երկու հարցերի պատասխանը լինի, Ձեր հարցի պատասխանն էլ պարզ կլինի:

«ՄԻԳՈՒՑԵ ԵՐՐՈՐԴ ՈՒԺԵՐԻ ՄԱՍՆԱԿՑՈՒԹՅՈՒՆԸ ԿԱ»

-Ի դեպ, այս օրերին նաեւ հնչեցին պահանջներ, թե պետք է Գյումրիում տեղակայված ռուսական ռազմաբազան փակել: Որքանո՞վ եք այս պահանջը տեղին համարում:
- Կարծում եմ` ոտքի վրա տաք գլխով որոշումներ կայացնելը սխալ է: Մի տարի առաջ երկարացնում են պայմանագրերը, հիմա առանց դրդապատճառներն իմանալու` պահանջում փակել: Միգուցե երրորդ ուժերի մասնակցությունը կա այս գործում, նույն թուրքերի, ադրբեջանցիների: Արեւմտյան ուժերը, կարծում եմ, քիչ հավանական են, բայց Թուրքիան բացառված չէ: Թուրքիան մի պետություն է, որը նման բան կարող էր կազմակերպել: Այս ամենը հաշվի առնելով` նման որոշում ընդունելը, կարծես, նույն Թուրքիայի ջրաղացին ջուր լցնել է:

ՀՐԱՆՏ ՍԱՐԱՖՅԱՆ