ՀԱՅ-ՌՈՒՍԱԿԱՆ ԽՈՐՀՐԴԱՐԱՆԱԿԱՆ ԱԿՈՒՄԲԻ ՉԿՈՂՄՆՈՐՈՇՎԱԾ ՎԻՃԱԿՆԵՐԸ

ՀԱՅ-ՌՈՒՍԱԿԱՆ ԽՈՐՀՐԴԱՐԱՆԱԿԱՆ ԱԿՈՒՄԲԻ ՉԿՈՂՄՆՈՐՈՇՎԱԾ ՎԻՃԱԿՆԵՐԸ

Նախապես տեղեկացել էինք մամուլից, որ Հայ-ռուսական բարեկամական խորհրդարանական ակումբի այս տարվա առաջին նիստը տեղի կունենա հունվարի 20-ին, ժամը 13:00-ին: Ավելին` հերթական հանդիպմանը, որի թեման էր «Մշակութային կապերի զարգացման հեռանկարները եվրասիական կինոարտադրման ոլորտում», Ռուսաստանի կողմից պետք է մասնակցեր ռեժիսոր, սցենարիստ, պրոդյուսեր, արձակագիր ԿԱՐԵՆ ՇԱՀՆԱԶԱՐՈՎԸ, իսկ Հայաստանից` ԱԺ պատգամավորներ, կինոյի եւ թատրոնի ոլորտի ներկայացուցիչներ: Ի դեպ, նույն օրը պետք է կայանար նաեւ խորհրդարանական լսումներ ԱԺ պետական-իրավական հարցերի մշտական հանձնաժողովում, որտեղ պետք է քննարկվեր վերջին օրերին ստեղծված իրավիճակը: Բայց հաշվի առնելով, որ Գյումրիում ոճրագործության զոհ դարձած Ավետիսյանների ընտանիքի փոքրիկի` ՍԵՐՅՈԺԱ ԱՎԵՏԻՍՅԱՆԻ մահվան հանգամանքը, հանձնաժողովը հետաձգեց լսումները` նախապես տարածելով համապատասխան հաղորդագրություն: Մինչդեռ, արի ու տես, որ Հայ-ռուսական բարեկամական խորհրդարանական ակումբը ո՛չ հայտարարել էր, ո՛չ էլ ակնարկել, թե հանդիպումը կհետաձգվի: Ավելին` մինչեւ ժամը 13:00-ն անգամ ակումբի կոորդինատորներն էին համոզված, որ այն կայանալու է: Ինչեւէ, օրվա ընթացքում մի քանի անգամ փոխվեց հանդիպման ժամը, իսկ ակումբից պատճառաբանում էին, թե պարոն Շահնազարովն է ուշանում: Եվ այսպես` ժամը 13:00-ն դարձավ 15:00, ապա հանդիպումը տեղափոխվեց 16:00, եւ միայն այս ժամերի փոփոխության ընթացքում ակումբը հասկացավ, որ օրը հարմար չէ, քանի որ չհայտարարված սուգ է Հայաստանում: Ի դեպ, հատկապես ուշագրավ էր այն, որ վերոնշյալ ակումբի անդամ ոչ բոլոր պատգամավորներն էին տեղեկացված, որ ընդհանրապես լինելու է նման հանդիպում, առավել եւս, որ այն կայանալու է, կամ` հետաձգվելու:

ՀՐԱՆՏ ՍԱՐԱՖՅԱՆ