"ՀՈՒՅՍ ՈՒՆԵՄ, ՈՐ ԱՇԽԱՐՀԻ ԵՐԿՐՆԵՐԻ ՂԵԿԱՎԱՐՆԵՐԸ ՃԻՇՏ ԿԿՈՂՄՆՈՐՈՇՎԵՆ"

"ՀՈՒՅՍ ՈՒՆԵՄ, ՈՐ ԱՇԽԱՐՀԻ ԵՐԿՐՆԵՐԻ ՂԵԿԱՎԱՐՆԵՐԸ ՃԻՇՏ ԿԿՈՂՄՆՈՐՈՇՎԵՆ"

Հայոց ցեղասպանության 100-րդ տարելիցին նվիրված միջոցառումները խոչընդոտելու համար Թուրքիայի նախագահ Ռեջեփ Թայիբ Էրդողանը ապրիլի 24-ից ուղիղ 100 օր առաջ 102 երկրների ղեկավարների ու վարչապետների Չանաքքալեի պատերազմին նվիրված միջոցառումների շրջանակում երկիր այցելելու հրավերներ է ուղարկել: Ի դեպ, թուրքական հնարովի այս միջոցառումները նույնպես կկայանան ապրիլի 23-24-ին:
Ըստ էության, թուրքական այս հրավերը դարձավ աշխարհի ջրբաժան, քանի որ պետությունների ղեկավարները պետք է որոշեն` ապրիլի 24-ին մասնակցում են Հայոց ցեղասպանության զոհերի հիշատակի ոգեկոչման արարողությանը, թե` թուրքական շոուին: Աշխարհաքաղաքական այս ջրբաժանի արդյունքում, թե ո՞ր ափում` Հայաստանում կամ Թուրքիայում, կարելի է սպասել ապրիլի 24-ին ավելի շատ պետությունների ղեկավարների, "Իրավունքը" հետաքրքրվեց ՀՀ ԳԱԱ Արեւելագիտության ինստիտուտի տնօրեն, թուրքագետ ՌՈՒԲԵՆ ՍԱՖՐԱՍՏՅԱՆԻՑ.
- Հույս ունեմ, որ Թուրքիայի իշխանությունների այդ լկտի արարքը, որով իրենք փորձում են փոխել ապրիլի 24-ի խորհուրդը, չի ունենա իր այն ազդեցությունը, այն նշանակությունը, որն իրենք ծրագրավորել են: Եվ հույս ունեմ, որ աշխարհի երկրների ղեկավարները ճիշտ կկողմնորոշվեն, ու նախապատվությունը կտան Հայաստանին, քանի որ նրանք պիտի ներկա լինեն Երեւանում կայանալիք Ցեղասպանության մեկուկես միլիոն զոհերի հիշատակի ոգեկոչման արարողությանը, այլ ոչ թե դառնան թուրքական այդ քարոզչական մեքենայի խաղալիքը:
- Պարոն Սաֆրաստյան, այնուամենայնիվ, արդյոք ապրիլի 24-ին` հաշվի առնելով, թե ովքեր մեկնեցին Թուրքիա, եւ ովքեր ժամանեցին Հայաստան, կկարողանանք տեսնել աշխարհի տարբեր երկրների իրական պատկերը:
- Ինչ-որ մի այցելությամբ, իհարկե, իրական պատկեր չի կարելի տեսնել: Բայց, ամեն դեպքում, կարեւոր է, թե որ երկրների ղեկավարները ճիշտ կկողմնորոշվեն:

ՀՐԱՆՏ ՍԱՐԱՖՅԱՆ