ՍԻՆՋԱՐ ՔԱՂԱՔԻ ՄԱՏՈՒՅՑՆԵՐՈՒՄ ԹԵԺ ՄԱՐՏԵՐԸ ՇԱՐՈՒՆԱԿՎՈՒՄ ԵՆ

ՍԻՆՋԱՐ ՔԱՂԱՔԻ ՄԱՏՈՒՅՑՆԵՐՈՒՄ ԹԵԺ ՄԱՐՏԵՐԸ

ՇԱՐՈՒՆԱԿՎՈՒՄ ԵՆ

Եզդի համայնքի ներկայացուցիչ  Թենգիզ Ուզոյանը «Իրավունքին» տեղեկացրեց, որ չնայած ձյան առկայությանը, Սինջար (Շանգալ) քաղաքի ազատագրման համար մղվող կատաղի մարտերը շարունակվում են: «Քաղաքի կեսը վերահսկում են HPG -ը (PKK-ի զինված ուժերից է) եւ եզդիների զինված ուժերը: Իսկ Սինջարի լեռները ամբողջությամբ  վերահսկվում են HPG -ի, YPG –ի (Սիրիայի քրդական զինված ուժեր), Փեշմարգայի` իրաքյան Քուրդիստանի զինված ուժերի եւ Սինջարի եզդիների զինված ուժերի կողմից»,- մանրամասնեց եզդի համայնքի ներկայացուցիչը:

Թ. Ուզոյանի  տեղեկացմամբ Սինջար լեռան հարավային շրջանները` Սնոն, Խանասոր,Դիգոր, Զորվա եւ էլի մի քանի շրջաններ ազատագրվել են, իսկ լեռան հյուսիսային շրջանները` Թըլ Էզէր, Սիբա շեխ Խդր, Գըր Զարըկ, Թըմ Բանատ, Ռամբուսի և էլի տարածքներ դեռևս մնում են ԻԼԻՊ-ի զինյալների հսկողության տակ:

«Այդ շրջանները ազատագրելու համար այս պահին Սինջար քաղաքի մատույցներում թեժ մարտերը շարունակվում են: Հունվարի 17-ին` առավոտյան ժամը 05:00-ից 06:00-ն ընկած ժամանակահատվածում, երկու անգամ օդային հարված է հասցվել Սինջար քաղաքում տեղակայված ահաբեկիչների կարեւոր նշանակություն ունեցող դիրքերին, որի հետեւանքով կրելով մարդկային և ռազմական տեխնիկայի կորուստներ` նահանջել են իրենց հիմնական դիրքերից: Նրանց հասցված վնասի չափը ճշտվում է: Սինջար քաղաքի ազատագրման համար մղվող մարտերում` HPG - ի և Եզդի զինված ուժերի զոհերի թիվը  հասնում է 50-ի, Փեշմարգայի զոհերի թիվը` 20-ի :Իսկ եզդի գերիների թիվը կազմում է շուրջ 5000»,- եզրափակեց եզդի համայնքի ներկայացուցիչը:

ՍՈՆԱ ԴԱՎԹՅԱՆ