ԼԵՎՈՆ ԱՐՈՆՅԱՆԻ ԱՆՀԱՋՈՂՈՒԹՅՈՒՆՆԵՐԸ ՉՄՆԱՑԻՆ 2014-ՈՒՄ

ԼԵՎՈՆ ԱՐՈՆՅԱՆԻ ԱՆՀԱՋՈՂՈՒԹՅՈՒՆՆԵՐԸ
ՉՄՆԱՑԻՆ 2014-ՈՒՄ

Հոլանդիայի Վեյկ Ան Զեե քաղաքում շարունակում է ընթանալ Tata Steel Chess շախմատային սուպերմրցաշարը, որտեղ մասնակցում է շախմատի Հայաստանի հավաքականի առաջատար Լեւոն Արոնյանը: 2014 թվականը հայ գրոսմայստերի համար անհաջող էր, իսկ նոր մեկնարկած մարզական տարվա հետ Արոնյանը այլ հույսեր է կապում:
Սակայն արդեն իսկ գրանցած արդյունքներն առանձնապես չեն ոգեւորում. Tata Steel Chess-ի 4 տուրերն ավարտված են, սակայն Հայաստանի հավաքականի առաջատարն իր անվան դիմաց դեռ ոչ մի հաղթանակ չի գրանցել: Արոնյանը մրցաշարը մեկնարկեց ոչ-ոքիով, այն դեպքում երբ նրա մրցակիցը մրցաշարի ամենացածր վարկանիշն ունեցող խորվաթ Իվան Շարիչն էր:

Հայ շախմատիստը խաղում էր սեւերով, պարտիան ավարտվեց 32-րդ քայլում: Այսպիսի մեկնարկը հուշեց, որ Արոնյանի խնդիրները, այնուամենայնիվ, 2014-ում չեն մնացել: Շախմատային սուպերմրցաշարի երկրորդ տուրում եւս Արոնյանը սպիտակներով ոչ-ոքի խաղաց հոլանդացի Անիշ Գիրիի հետ: Վերջնամասում Հայաստանի հավաքականի առաջատարն ուներ 2 խաղաքարի առավելություն, սակայն զարմանալիորեն չկարողացավ պարտիան ավարտել հաղթանակով: Մրցաշարի երրորդ տուրն առավել անհաջող էր. 2 ոչ-ոքիներից հետո մեր առաջատարը սեւերով պարտվեց ԱՄՆ-ն ներկայացնող Ուեսլի Սոյին: Չորրորդ տուրում հայ գրոսմայստերը "կայունացրեց" խաղը եւ սպիտակներով ոչ-ոքի խաղաց լեհ Ռադոսլավ Վոյտաշեկի հետ:
Ի դեպ, մինչ մրցաշարի մեկնարկը` վիճակահանությունից հետո Արոնյանը կիսվել էր տպավորություններով. "Արձակուրդս լավ անցավ Կուբայում: Նախորդ տարին այնքան էլ հաջող չէր ինձ համար: Այժմ պատրաստ եմ այս մրցաշարին եւ սիրում եմ լինել այստեղ: Ինձ համար կարեւոր է ձմռանից առաջ հանգստանալ տաք երկրում: Վիճակահանությունից գոհ եմ: Սիրում եմ վերջին տուրում խաղալ սպիտակներով: Սիրում եմ այս քաղաքն ու մրցաշարը: Կփորձեմ ցուցադրել լավագույն որակներս",- հայ գրոսմայստերի խոսքը մեջբերում է Tata Steel Chess-ի մամուլի ծառայությունը: Հավելենք, որ Արոնյանը Tata Steel Chess-ի քառակի հաղթող է, իսկ 13 տուրից բաղկացած մրցաշարն ավարտվելու է հունվարի 25-ին:

ՔՐԻՍՏԻՆԵ ՊԵՏՐՈՍՅԱՆ