ՀՀԿ-ԱԿԱՆ ՊԱՏԳԱՄԱՎՈՐԸ ԶԱՐՄԱՑԱԾ Է ԲՀԿ-ԱԿԱՆ ՔԱՂԱՔԱՊԵՏԻ ՊԱՀՎԱԾՔԻՑ

ՀՀԿ-ԱԿԱՆ ՊԱՏԳԱՄԱՎՈՐԸ ԶԱՐՄԱՑԱԾ Է ԲՀԿ-ԱԿԱՆ

ՔԱՂԱՔԱՊԵՏԻ ՊԱՀՎԱԾՔԻՑ

Գյումրիում տեղի ունեցած անկառավարելի իրավիճակի վերաբերյալ «Իրավունքը» զրուցեց ՀՀԿ պատգամավոր, ծագումով գյումրեցի Նաիրա Կարապետյանի հետ:

- Տիկին Կարապետյան, ինչպե՞ս եք գնահատում Գյումրիում երեկ տեղի ունեցած դեպքերն ու անկառավարելի իրավիճակը:

- Դժվար հարց եք տալիս: Իմ կարծիքով` գյումրեցիները երեկ արտահայտեցին իրենց արդարացի բողոքը սարսափելի սպանդի վերաբերյալ: Չտարբերակենք ու ասենք` գյումրեցի, երեւանցի, գորիսեցի: Սպանեցին մի հայ ընտանիքի քնած տեղը: Մենք դեռեւս չգիտենք` ինչ դրդապատճառով էդա եղել` մոլագար էր, վրեժխնդրություն էր: Մենք միայն հիմա կարող ենք ենթադրություն անել: Այնուամենայնիվ, սպանվեցին անմեղ մարդիկ ու երեխաներ: Ոչ մի նորմալ բանական մարդու մտքով չի անցնի ձեռք բարձրացնել երկու տարեկան երեխայի վրա ու դանակով հարվածել վեց ամսական երեխային:

- Դուք հիմա Գյումրիո՞ւմ եք, թե՞ Երեւանում:

- Ես Երեւանում եմ, վատառողջ եմ, բայց մշտական կապի մեջ եմ գործընկներիս, ծնողներիս հետ: Ցանկանում եմ կոչ անել հանդարտության, սառը գլխով մտածելու: Պետք չէ անել այնպիսի քայլեր, որոնք հետո անդառնալի հետեւանքների կբերեն:

- Երեկ «Ֆեյսբուք» սոցիալական ցանցում ու լրատվական մի քանի կայքերում շրջանառվում էին լուրեր այն մասին, որ որոշ սադրիչներ ամեն կերպ փորձում էին լարել իրավիճակը եւ անկառավարելի դարձնել:

- Ցանկացած ինքնաբուխ ակցիայի մեջ (չնայած կազմակերպված ակցիաների ժամանակ էլ են լինում նման դեպքեր) լինում են նաեւ սադրիչներ: Թե նրանք ինչ նպատակ են հետապնդում, դժվարանում եմ ասել: Ես երեկվա դեպքերի մեջ տեսել եմ սադրանք, ոչ թե մարդկային դրսեւորումներով (ո՛չ կոնկրետ մարդկանց կարող եմ ասել, ո՛չ անուններ տալ)… ճանաչելով գյումրեցիներին կարող եմ ասել` գյումրեցին գյումրեցու դեմ չի գնա: Ոստիկաններին քարով խփելն արդեն ինչ-որ մի տեղ կայծ էր…

- Սադրանքներն ո՞ւմ կողմից են հրահրված եղել ըստ Ձեզ:

- Ես ոչ մի պատասխան այս պահին չունեմ, քանի որ ապշած եմ ինքս: Ցանկանում եմ շնորհակալություն հայտնել իմ համաքաղաքացիներին, որ ռուբիկոնը չանցան, այսքանով սահմանափակվեց ամեն ինչ ու անդառնալի հետեւանքներ չունեցանք Մարտուն Գրիգորյանի,  սրբազանի, Գեւորգ Կոստանյանի, քաղաքական ակտիվիստների համատեղ ջանքերով:  Առողջություն եմ մաղթում բոլոր վիրավորներին, շուտափույթ ապաքինում: Հուսամ`այլեւս այդ տաքարյուն քայլին մենք չենք գնա: Հայկական ու ռուսական կողմը կկարողանան գտնել այնպիսի ճանապարհ, որ մարդկանց մոտ հարցեր չառաջանան, ոճրագործն էլ կրի իր պատիժը:

- Կարծիք կա, որ  սադրանքները հրահրված են եղել արեւմտյան դրամաշնորհներով սնվող ՀԿ-ների կողմից:

- Չեմ կարող առանց  հիմքի մեղադրանք ներկայացնել, չնայած  հասկանում եմ վարկածի տրամաբանությունը:

- Իշխանությանը երեկ մեղադրում էին գյումրեցիներին կողքին չկանգնելու, նրանց հանդարտեցնելու համար:

- Ես հակառակ կարծիքն էլ եմ կարդացել: Ժողովրդի կողքին կանգնած լինել` չի նշանակում գնալ-էնտեղ կանգնել: Եթե առողջ լինեի, ֆիզիկապես էնտեղ լինեի, դժվար թե մեծ օգուտ բերեի: Իմ ուժերի ներածին չափով կարողացել եմ անել այն, որ նպաստել է գյումրեցիներին այս իրադարձություններից դուրս գալուն: Իշխանություն ասելով` ուզում եմ հասկանալ` նկատի ունեն երկրի իշխանությա՞նը, թե՞ քաղաքային, մարզային իշխանություններին:

- Նկատի ունեն թե քաղաքային իշխանությանը, թե պատգամավորներին, նաեւ Գյումրու քաղաքապետ Սամվել Բալասանյանին, որը երեկ Գյումրիում չէր:

- Ես Գյումրու քաղաքապետի փոխարեն չեմ կարող խոսել,  բայց  ես ինքս զարմացած եմ:

- Որ նա Գյումրիում չէ՞ր երեկ:

- Այո:

ՍՈՆԱ ԴԱՎԹՅԱՆ