«ԱՆՀԻՄՆ ՑԱՆԿՈՒԹՅՈՒՆ Է ՄԵՐ ՄԵԾԵՐԻ ԱՆՈՒՆՆԵՐԸ ՇԱՀԱՐԿԵԼԸ»

«ԱՆՀԻՄՆ ՑԱՆԿՈՒԹՅՈՒՆ Է ՄԵՐ ՄԵԾԵՐԻ ԱՆՈՒՆՆԵՐԸ ՇԱՀԱՐԿԵԼԸ»

Այսօր «Ազդակ» լրագրողական ակումբում հյուրընկալված Հայաստանի գրողների միության (ՀԳՄ) նախագահ ԷԴՎԱՐԴ ՄԻԼԻՏՈՆՅԱՆԸ ամփոփելով 2014 թվականը` ՀԳՄ-ի համար, խոսեց նաեւ 2015-ի անելիքների մասին եւ շեշտեց, որ Գրողների միությունում ավանդույթներ կան, որոնք շարունակվելու են նաեւ այս տարի եւս. «Դրանք այն գլխավոր միջոցառումներն են, հանդիպումները, որոնք նպաստում են գրականությունը ընթերցողներին լայն ճանաչելի դարձնելուն: Օրինակ` փետրվարի 19-ին գիրք նվիրելու օրը, Հ. Թումանյանի ծննդյան օրը, մանկական գրքի շաբաթը, Թարգմանչաց տոնը, Գանձայում Տերյանական օրերը, Գորիսում Բակունցյան օրերը, Սեւակի օրը` Զանգակատանը, Սայաթ-Նովայի օրը` Թբիլիսիում, որն իր մեջ ամփոփում է հայ համայնքի մշակույթի գործիչների եւ վրաց մեր գործընկերների հետ հանդիպումները: Դրանք բազմապլան ավանդական օրեր են, որոնք ամեն տարի իրագործվում են»,- ասաց ՀԳՄ նախագահն ու շեշտեց, որ 2014 թվականին այս բոլորն իրականացրել են ՀԳՄ-ի հնարավորությունների սահմաններում:

«Իրավունքի» այն հարցին, թե այսօր Հայաստանում գործող երեք գրողների միությունները` հնարավո՞ր է միավորվեն ու 100-ամյա տարելիցի հետ կապված ծրագրերը համատեղ իրականցնեն, ՀԳՄ նախագահը հետաքրքրվեց.

- Ո՞ր 3 միությունների մասին է խոսքը:

- Կան Երեւանի գրողների, Հայ գրողների եւ Հայաստանի գրողների միություններ:

- Ես գիտեմ մի գրողների միություն, որն իր մեջ գրողներ ունի: Եթե Երեւանի գրողների միությունն է` Աբգարի հետ մենք շփումներ ունենք, բայց ես կուզեի տեսնել նրանց գրողների գործունեությունը, գրական գրվածքները: Ցանկությունս դրական է, ճանաչենք` կապ չունի, թե նա որ գրողների միության անդամ է, ուզում եք գրողների 30 միություն թող լինի, կարեւորը ոչ թե միությունն է, այլ այն գրականությունը, որը ստեղծում են այդ միության անդամները: Իսկ այդ Հայ գրողների միության հետ ես ծանոթ չեմ:

- Որքան գիտեմ` իրենց ու Ձեր միությունների միջեւ դատական պրոցեսներ էլ են եղել:

- Դատական պրոցեսը նրանք պարտվել են: Կարծում եմ` անհիմն ցանկություն է մեր մեծերի անունները շահարկելը: Սերո Խանզադյանը իր դիմումի համաձայն` հետ է վերադարձել Գրողների միություն, բնականաբար, իր  կենդանության օրոք: Այդ գրողների միություն կոչվածի` Հայ գրողների միության մասին, ուղղակի ձեզանից եմ լսում:

ԼԻԼԻԹ ԵՂԻԱԶԱՐՅԱՆ

Հ.Գ. Նյութն ամբողջությամբ կարդացե՛ք վաղվա տպագիր «Իրավունքում»: