ՍԱՀՄԱՆԻՆ ՀՆՉՈՂ ԿՐԱԿՈՑՆԵՐԸ ԿԱՊ ՉՈՒՆԵՆ ԵՏՄ-ԻՆ ՀԱՅԱՍՏԱՆԻ ԱՆԴԱՄԱԿՑՈՒԹՅԱՆ ՀԵՏ

ՍԱՀՄԱՆԻՆ ՀՆՉՈՂ ԿՐԱԿՈՑՆԵՐԸ ԿԱՊ ՉՈՒՆԵՆ ԵՏՄ-ԻՆ
ՀԱՅԱՍՏԱՆԻ ԱՆԴԱՄԱԿՑՈՒԹՅԱՆ ՀԵՏ

2015 թվականի հունվարի 1-ին Ադրբեջանը հերթական անգամ ապացուցեց, որ չի էլ մտածում Արցախի հիմնախնդիրը խաղաղ ճանապարհով լուծելու մասին: Հետագա օրերին եւս հակառակորդը բազմաթիվ դիվերսիոն գործողությունների դիմեց, որոնք հայկական զինված ուժերի կողմից կանխվեցին: Բայց անտեսելով կորուստներըª ադրբեջանական բանակը մինչ օրս էլ շարունակում է սադրիչ գործողությունները: Միեւնույն ժամանակ Հայաստանում սկսեցին հնչել կարծիքներ, որ եթե Հայաստանն արդեն Եվրասիական միության կազմում է, ապա Միության մյուս անդամներն ավելի ակտիվորեն չպե՞տք է միջամտեն Ադրբեջանի նման պահվածքին: Մինչեւ իսկ հնչեց տեսակետ, թե այս կրակոցներով Ադրբեջանն է փորձում ստուգել այս նոր իրավիճակում ԵՏՄ մյուս անդամների վերաբերմունքը հայ-ադրբեջանական սահմանային կրակոցների նկատմամբ: Թե ինչքանով է հիմնավոր նման տեսակետը, փորձեցինք պարզել մեր հարցախույզի միջոցով:

ՀՀ պաշտպանության նախկին նախարար ՎԱՂԱՐՇԱԿ ՀԱՐՈՒԹՅՈՒՆՅԱՆԸ "Իրավունքի" հետ զրույցում հետեւյալ կարծիքին էր.
- ԵՏՄ-ն տնտեսական միություն է, որին չենք կարող դարձնել մեր անվտանգության երաշխավորը: Բայց մյուս կողմից էլª 1997 թվականին կնքված հայ-ռուսական պայմանագրում հստակ նշված է, որ Ռուսաստանը Հայաստանի անվտանգության պատասխանատվությունը վերցնում է իր վրա: Ամեն դեպքումª պետք չէ սահմանին հնչող կրակոցները կապել ԵՏՄ-ին Հայաստանի անդամակցության հետ, քանի որ այդ կրակոցները Ադրբեջանի կողմից միշտ էլ եղել են: Նախորդ տարվա օգոստոսին կրկին եղան թեժ կրակոցներ, այդ ժամանակ մենք դեռեւս ԵՏՄ-ի անդամ չէինք: Ծիծաղելի է կապ փնտրել կրակոցների եւ ԵՏՄ-ին` Հայաստանի  անդամակցության հետ: Այստեղ գործում է այլ տրամաբանություն` Ադրբեջանը փորձում է վախի մթնոլորտ ստեղծել Հայաստանում, որը ուղղված է նաեւ Մինսկի խմբի համանախագահներին, քանզի հասկանում է, որ ժամանակը գործում է ի վնաս իրեն` Ադրբեջանի:
Աժ "Ժառանգություն" խմբակցության պատգամավոր ԹԵՎԱՆ ՊՈՂՈՍՅԱՆԸ եւս ընդգծեց, որ Հայաստանի խաղաղության երաշխավորը ոչ թե ԵՏՄ-ն է, որը տնտեսական միություն է, այլ հայոց բանակը.
- Մենք պետք է կարողանանք մեր բանակը պինդ պահել, քանի որ նա է միակ կառույցը, որն ապահովում է մեր երկրի խաղաղությունը: ԵՏՄ-ն մեր անվտանգության հետ որեւէ կապ չունի, քանի որ այն կայացած կառույց չէ եւ չունեմ հավատ, որ այն երբեւէ կկայանա: Սխալ է կարծել, թե սահմանում կրակոցները կապված է ԵՏՄ-ին Հայաստանի անդամակցության հետ, սա պարզապես Ադրբեջանի քաղաքականությունն է:
ՀՀ պաշտպանության նախարարի խորհրդական, ռազմական փորձագետ ԴԱՎԻԹ ՋԱՄԼՅԱՆՆ էլ ամփոփելով հնչեցրած կարծիքները` նկատեց.
- Սահմանին հնչող կրակոցները վկայում են այն մասին, որ հակամարտության կարգավորման վերաբերյալ Բաքվի ծայրահեղ մաքսիմալիստական մոտեցումներն անփոփոխ են: Ընդ որում ադրբեջանական մաքսիմալիզմը չի ենթադրում միայն Արցախի տարածքների զավթում: Անհերքելի փաստ է, որ Բաքվում հավակնում են նաեւ ՀՀ տարածքներին, եւ, մասնավորապես, Սյունիքինª հեռահար նպատակ ունենալով վերացնել Նախիջեւանի անկլավային վիճակը: Եվ ահա այս նպատակներին հասնելու համար ադրբեջանական կողմը որդեգրել է Հայաստանի հասարակության վրա ճնշում բանեցնելու մարտավարություն: Սակայն դա նորություն չէ, ադրբեջանական կողմը հրադադարի ռեժիմն ինտեսիվորեն խախտել է նաեւ նախորդ տարիներին: Պարզապես այս տարի թշնամու դիվերսիոն ակտիվությունն ավելի ինտենսիվ է, քան նախկինում: Կրկնում եմ` այս ամենի բուն նպատակը հայաստանյան հասարակության վրա բարոյահոգեբանական ճնշումներ բանեցնելն է, մեզանում ռազմական գործողությունների մոտալուտ վերսկսման տպավորություն թողնելն է:
Ինչ վերաբերում է ԵՏՄ-ին Հայաստանի անդամակցությանը, ապա չեմ կարծում, թե այս հանգամանքն ուղղակի կապ ունի սահմանային լարվածության հետ: Հիմնավորեմ միտքս. նախորդ տարվա օգոստոսին թշնամին կրկին լարվածության օջախներ ստեղծեց պետական սահմանին: Այդ օրերին հայոց զինուժը պատժեց թշնամուն. ադրբեջանական կողմը կրեց հրադադարի հաստատումից հետո ամենամեծաթիվ կորուստները, որից հետո մոտ երեք ամիս սահմանին հարաբերական անդորր էր տիրում: Այդ հարաբերական անդորրի  ընթացքում էլ էր ակնհայտ, որ Հայաստանն անդամակցելու է ԵՏՄ-ին, բայց թշնամին լուռ էր: Այստեղից հետեւություն. երբ ադրբեջանական կողմին ցավոտ պատժում ենք, ապա նրանց ակտիվությունը միառժամանակ դադարում է. Մեզ հետ ուժի լեզվով խոսող թշնամուն հարկավոր է հակադրել ավելի հզոր զսպող ուժ: Ասվածը մեր երկրի պաշտպանության նախարար Սեյրան Օհանյանը պատկերավոր կերպով ձեւակերպել է որպես "կանոնավոր ծեծի մարտավարություն":
Եվ ամենակարեւորը` մեր անվտանգության առաջին երաշխավորը մենք ենք: Մենք անկախ պետություն ենք եւ պետք է դադարենք ուրիշին տեսնել մեզ պաշտպանողի դերում, իսկ մեր դաշնակցից անհրաժեշտության դեպքում պետք է աջակցություն ակնկալենք:  Կանոնավոր ծեծի մարտավարություն բանեցնելով` հետայսու նույնպես կստիպենք թշնամուն զուսպ լինել:

ԶՎԱՐԹ ԽԱՉԱՏՐՅԱՆ