ԱՆԳԼԻԱ՞, ԳԵՐՄԱՆԻԱ՞, ԻՍԿ ՄԻԳՈՒՑԵ ԻՏԱԼԻԱ՞. ՄԽԻԹԱՐՅԱՆԻ ԸՆՏՐՈՒԹՅՈՒՆԸ ՄԵԾԱՆՈՒՄ Է

ԱՆԳԼԻԱ՞, ԳԵՐՄԱՆԻԱ՞, ԻՍԿ ՄԻԳՈՒՑԵ ԻՏԱԼԻԱ՞.

ՄԽԻԹԱՐՅԱՆԻ ԸՆՏՐՈՒԹՅՈՒՆԸ ՄԵԾԱՆՈՒՄ Է

Հայաստանի ազգային հավաքականի եւ Դորտմունդի "Բորուսիայի" կիսապաշտպան Հենրիխ Մխիթարյանի անվան շուրջ քննարկումները չեն դադարում: Անգլիայի պրեմիեր լիգա հնարավոր տեղափոխության վարկածներն իրենց տեղը զիջեցին "իտալականներին": Տոներից հետո ամենից շատ շահարկվում է Թուրինի "Յուվենտուսի" հետաքրքրությունը հայ ֆուտբոլիստի նկատմամբ եւ նրա հնարավոր տեղափոխությունը իտալական ակումբ:

Ավելի վաղ "Յուվենտուսի" գլխավոր տնօրեն Բեպե Մարոտան պատմել է Իտալիայի չեմպիոնի տրանսֆերային ծրագրերի մասինª հաստատելով նաեւ Հենրիխ Մխիթարյանի նկատմամբ հետաքրքրությունը, Մարոտայի խոսքը մեջբերում է Goal.com-ը. "Մեզ անհրաժեշտ չէ իրականացնել աղմկահարույց տրանսֆերներ, այդ պատճառով սպասում ենք լավ հնարավորության: Ինչ վերաբերում է Հենրիխ Մխիթարյանին ու Ռոնալդուին, ապա չեմ հերքի, որ նրանք մեր հետաքրքրության ոլորտում են: Ֆունկցիոնալ առումով նրանք համապատասխանում են մեր խաղային մոդելին":

Այս կապակցությամբ թիմի գլխավոր մարզիչ Մասիմիլիանո Ալեգրին նույնպես հայտնել է կարծիքը. "Մխիթարյանը" եւ Յանուզայը լավ ֆուտբոլիստներ են, սակայն նրանք պատկանում են այլ ակումբների: Մենք չգիտենք այդ ակումբները պատրաստ են բաց թողնել նրանց, թեª ոչ: Այդ պատճառով չենք կարող ասել, թե որքանով են իրական նրանց տեղափոխությունները",- Ալեգրիի խոսքը մեջբերում է Tuttojuve.com-ը:

Թեեւ Մխիթարյանը շարունակում է իր մարզումներն անցկացնել իր ակումբի կազմում, եւ կարծես թե չի էլ մտածում գերմանական ակումբը լքելու մասին, "Յուվենտուսը" ճանապարհներ է փնտրում հայ ֆուտբոլիստին իր կազմում տեսնելու համար, դե իսկ միջազգային մամուլը այս թեման չի եզրափակում: Ըստ վերջին տվյալների, որը ներկայացնում է Tuttomercatoweb-ը, իտալական ակումբը կփորձի վարձակալել Հենրիխ Մխիթարյանին: Ըստ Tuttomercatoweb-ի` Իտալիայի չեմպիոնի ներկայացուցիչներն առաջիկայում կբանակցեն 25-ամյա ֆուտբոլիստի հետ: "Յուվենտուսը" մտադիր է կես տարով վարձակալել Մխիթարյանին, իսկ այս մրցաշրջանի վերջում գնել նրա տրանսֆերային իրավունքները:

Ինչեւէ, ինչպես երեւում է, այն "իրարանցումը", որ սկսվել է հայ ֆուտբոլիստի անվան շուրջ, դրական արդյունք է գրանցում` մեծացնելով հետաքրքրությունը ֆուտբոլիստի նկատմամբ: World Soccer Kings ֆուտբոլային ամսագիրը նույնպես անտարբեր չի մնացել հայ ֆուտբոլիստի նկատմամբ, Հենրիխ Մխիթարյանն իսպանական Լա Մանգայում հավաքի մասնակցելու օրերին հարցազրույց է տվել ճապոնական ամսագրին: Այսպիսով, անհայտ է` կհասնի հաջողության իտալական ակումբը, թե` ոչ, այս ամենի մեջ կարելի մի դրական կողմ առանձնացնել. իրադարձությունների ցանկացած շրջադարձի դեպքում էլ, Մխիթարյանը կարիերան շարունակելու շատ հարմար տարբերակներ է ձեռք բերում: Սակայն այս պահին Մխիթարյանը հավաստիացնում է, որ ցանկանում է մնալ "Բորուսիայում" եւ վայելում է թիմի գլխավոր մարզչի՝Յուրգեն Կլոպի վստահությունը:

ՔՐԻՍՏԻՆԵ ՊԵՏՐՈՍՅԱՆ