«ՍՆՎԵՔ ՄԻԱՅՆ ԱՅՆ ԺԱՄԱՆԱԿ, ԵՐԲ ՔԱՂՑԱԾ ԵՔ». Բժիշկ

«ՍՆՎԵՔ ՄԻԱՅՆ ԱՅՆ ԺԱՄԱՆԱԿ, ԵՐԲ ՔԱՂՑԱԾ ԵՔ». Բժիշկ

Ճիշտ և չափավոր սնվելու դեպքում կարիք չի լինի բեռնաթափման օրեր «հայտարարելու» և սթրեսի ենթարկելու օրգանիզմը: Այդ մասին «Իրավունքի» հետ զրույցում ասաց «Շտապբուժօգնություն» ՓԲԸ կենտրոն ենթակայանի բժիշկ ՄԻՇԱ ՊԱՐՈՆՅԱՆԸ`հավելելով, որ սովորաբար բեռնաթափման մասին շատերը սկսում են մտածել հատկապես տոնական օրերից հետո, ինչը, բնականաբար, ցանկալի չէ: «Բայց, եթե եղածն արդեն եղած է, ապա բեռնաթափումը կլինի օգնություն ձեր օրգանիզմին», - ասաց բժիշկը:

Մ. Պարոնյանի փոխանցմամբ`բեռնաթափման տարբերակները շատ են, բայց նախընտրելի է կատարել այն միայն ջրով. օրվա ընթացքում հարկ է խմել մոտ 3 լիտր ջուր:

«Խորհուրդ չի տրվում բեռնաթափում կազմակերպել այն անհատներին, ովքեր ունեն քրոնիկ հիվանդություններ՝ կապված տարբեր օրգան-համակարգերի հետ, օրինակ՝ սիրտ-անոթային, ստամոքս-աղիքային, նյարդային և այլն»,- զգուշացնում է բժիշկն ու հավելում, որ բեռնաթափումը կարող է ուղեկցվել մի շարք անցանկալի երևույթներով՝ զարկերակային ճնշման անկում, ընդհուպ գիտակցության կորուստ, ստամոքս–աղիքային համակարգի խանգարումներ (հատկապես խոցային, ռեֆլյուքս էզոֆագիտ, քրոնիկական կոլիտ և այլ հիվանդություններով տառապողների մոտ), նյարդային համակարգի խանգարումներ՝ ագրեսիա, դյուրագրգռություն և այլն:

Մ. Պարոնյանը հորդորում է. «Սնվեք միայն այն ժամանակ, երբ քաղցած եք: Ընդունեք այնքան սնունդ, ինչքան հարկավոր է, և ոչ մի գրամ ավելի»:

Վ. ՄՈՒՐԱԴՅԱՆ