ՈՉԻՆՉ ՉԱՆԵԼՈՒ ՀԱՄԱՐ ԱՇԽԱՏԱՎԱ՞ՐՁ ԵՆ ՍՏԱՆՈՒՄ

ՈՉԻՆՉ ՉԱՆԵԼՈՒ ՀԱՄԱՐ ԱՇԽԱՏԱՎԱ՞ՐՁ ԵՆ ՍՏԱՆՈՒՄ

Ամանորյա այս եռուզեռին արհեստականորեն թանկանում են ոչ միայն սննդամթերքի որոշ տեսակներ, հատկապես այն տեսակները, որոնք անհրաժեշտ են ամանորյա սեղանին դնելու համար,  այլեւ բարձրանում է  արտարժույթի կուրսը: «Իրավունքի» թղթակիցն այսօր  մի քանի տարադրամի փոխանակման  կետերում  ու բանկերում է եղել ու ֆիքսել, որ նախորդ օրերի  համեմատ դոլարի առքը բարձրացել է` կազմելով 467-472, իսկ վաճառքը`477-479 դրամ: Բավական բարձր է նաեւ եվրոյի փոխարժեքը: Առքը տատանվում  է 564- 575, վաճառքը`583-601 ՀՀ դրամի սահմաններում:  Հարց է առաջանում` իսկ ուր մնաին ԿԲ-ի պաշտոնյաների այն խոստումները, որ  դրամի գերարագ արժեւորում պետք  է տեղի ունենա, մինչդեռ հիմա հակառակն է տեղի ունենում:

Քանի որ անդրադարձանք  Ամանորյա եռուզեռին տեղի ունեցող  արհեստական թանկացումներին, հարկ է  հիշել, որ գնաճի պատասխանատու տնտեսական մրցակցության պետական պաշտպանության հանձնաժողովի անգործության մասին: Գրեթե ամեն տարի`տոներից առաջ, ականատես ենք լինում արհեստական  գնաճի, սակայն ՏՄՊՊՀ-ի ղեկավար Արտակ Շաբոյանը  կամ հայտարարում է, որ գնաճը նորմայի սահմաններում է, կամ տեղյակ չէ թանկացումներից կամ էլ «ձեւի» համար  մի երկու օլիգարխի սիմվոլիկ կերպով  կտուգանի, ու հարցը կհամարի փակված: Այսիքանից  հետո մնում է  եզրակացնել` ԿԲ-ն ու Արտակ Շաբոյանն իր ղեկավարած հանձնաժողովի անդամների  հետ ոչինչ չանելու համար աշխատավարձ են ստանում:

ՍՈՆԱ ԴԱՎԹՅԱՆ