Ի՞ՆՉ Է ԲԵՐԵԼՈՒ ՍԱՆՏԱՆ ՕՊԵՐԱՅԻՆ ԹԱՏՐՈՆԻ «ԱՐՔԱՅԱԶՆԻՆ»

Ի՞ՆՉ Է ԲԵՐԵԼՈՒ ՍԱՆՏԱՆ ՕՊԵՐԱՅԻՆ ԹԱՏՐՈՆԻ «ԱՐՔԱՅԱԶՆԻՆ»

Տարեմուտին ընդառաջ «Իրավունքը» ձիու պես սլացող 2014 թվականի, գալիք տարվա ծրագրերի, ինչպես նաեւ ամանորյա  եռուզեռի մասին զրուցեց Օպերայի եւ բալետի ազգային ակադեմիական թատրոնի դերասան, մոդել ԴԱՎԻԹ ՂԱՐԻԲՅԱՆԻ հետ:

- Դավիթ, ի՞նչ տվեց քեզ 2014 թվականը:

- Նախ ասեմ, որ 2014-ը իմ տարին էր, քանի որ ես ծնվել եմ հենց ձիու տարում: Այն ինձ համար դարձավ միայն ձեռբերումների տարի, ավելին`տարեմուտին ունեցա ինձ համար մեծ արժեք ունեցող հաղթանակ` գրավելով «Միստեր Ֆեյսբուք Տիեզերք 2014» մրցույթում առաջին պատվավոր տեղը:

- Ի դեպ, կարծես թե, վաղօրոք սկսվել է Ձեզ մոտ Ամանորը` հաշվի առնելով «Ֆեյսբուք» սոցիալական ցանցում տարածված Օպերայի եւ բալետի թատրոնի տոնական լուսանկարները:

- Այդ օրը Ա.Սպենդիարյանի անվան օպերայի եւ բալետի ազգային ակադեմիական թատրոնի սիմֆոնիկ նվագախումբը հանդես եկավ բացառիկ մի նախագծով՝ «Վիեննա գալա» համերգով: Եվ այդ ամանորյա շքեղ հանդիսությունից հետո տեղի ունեցավ ամանորյա մեծ պարահանդես թատրոնի ճեմասրահում` Հայաստանի օպերայի եւ բալետի թատրոնի լավագույն արտիստների մասնակցությամբ: Ի դեպ, ես այդ օրը օպերային թատրոնի «արքայազն» էի իմ կերպարով:

- Որքան էլ, որ 2015 թվականը ոչխարի տարի է, բայց, այնուամենայնիվ, ինչպե՞ս եք դիմավորելու Նոր տարին:

- Ամանորի գիշերը ունեմ շատ կարեւոր հյուր` Վրաստանից ժամանելու է իմ շատ լավ ընկեր Ջաբա Լաբաձեն, որը նաև իմ PR մենեջերն է: Եվ, իհարկե, ինչպես բոլորը, այդ օրը ես նույնպես նշելու եմ ընտանիքիս հետ: Բացի դա ունեմ մի քանի հրավերներ տարբեր ժամանցային կենտրոններից ու դեռ չեմ որոշել, թե Ամանորի գիշերվա շարունակությունը որտեղ կանցկացնենք:

-Արդեն կա՞ն գալիք տարվա համար նախատեսված նոր ծրագրեր, ինչով իր երկրպագուհիներին կուրախացնի Դավիթ Ղարիբյանը:

- Առաջիկա մեկ տարվա պլաններիս մեջ է «Միստեր Ֆեյսբուք Տիեզերք» մրցույթի հետ կապված ծրագրերը, ինչպես նաեւ նախատեսում եմ մասնակցել նոր ներկայացումներում` հանդես գալով հետաքրքիր կերպարներով: Ունեմ նաեւ ֆիլմում նկարահանվելու առաջարկ, որը դեռ բանակցությունների ընթացքի մեջ է:

- Եվ եթե գաղտնիք չէ, «Միստեր Ֆեյսբուք Տիեզերք 2014»-ը ի՞նչ է ուզել ավանդական հայկական Ձմեռ պապից կամ Սանտայից:

- 2015 թվականը կարծում եմ` ինձ համար լինելու է շատ պարտավորեցնող տարի: Վստահ եմ, որ հանդես եմ գալու նոր նախագծերով, որոնք իր հետ կբերի հենց Սանտան:

ՀՐԱՆՏ ՍԱՐԱՖՅԱՆ