«ՈՒԶՈՒՄ ԵՄ` ՁՄԵՌ ՊԱՊԻԿՆ ԱՅՆՔԱՆ ԳՈՒՄԱՐ ՈՒՆԵՆԱ, ՈՐ ԱՇԽԱՐՀԻ ԲՈԼՈՐ ԵՐԵԽԱՆԵՐԻ ՆՎԵՐՆԵՐԸ ԿԱՐՈՂԱՆԱ ԳՆԵԼ…»

«ՈՒԶՈՒՄ ԵՄ` ՁՄԵՌ ՊԱՊԻԿՆ ԱՅՆՔԱՆ ԳՈՒՄԱՐ ՈՒՆԵՆԱ, ՈՐ ԱՇԽԱՐՀԻ ԲՈԼՈՐ ԵՐԵԽԱՆԵՐԻ ՆՎԵՐՆԵՐԸ ԿԱՐՈՂԱՆԱ ԳՆԵԼ…»

2014 թվականն իր եզրափակիչ քայլերգով նաև դպրոցականներին է ուղեկցում: Տարեվերջյան ուսումնական տարին գրեթե բոլոր աշակերտների համար ամփոփվում է ամանորյա հանդեսներով, Ձմեռ պապիկի այցելությամբ: Այսօր «Բյուրակն» կրթական համալիրում իսկական տոն էր. ժպտացող մանկական աչքեր, ամանորյա բարեմաղթություններ, մանկական անեզր երազանքներ, որոնք լի են սպասումներով, հավատով: «Ձմեռ պապիկին նամակ արդեն գրել եմ  ու մի քանի նվեր ուզել` լեգո, գնացք ու կոշիկներ: Ու մեկ էլ շատ ուզում եմ` Ձմեռ պապիկն այնքան գումար ունենա, որ աշխարհի բոլոր երեխաների նվերները կարողանա գնել ու ոչ մեկի նամակը չմերժի, կամ ցանկությունները կիսատ կատարի»,-մեզ հետ զրույցում անկեղծանում է 2-րդ դասարանում սովորող Արեգը: Եվ մինչ Արեգը ոգևորությամբ պատմում է իր նամակի մասին, 3-6-րդ դասարանում սովորող բյուրակցիները, ամենատարբեր հեքիաթների հերոսների կերպարներ ստացած, հանդես են գալիս բեմական ներկայացմամբ:

Միջոցառման ավարտին տեղի ունեցավ ամենամյա տոնածառերի մրցույթը, որտեղ աշակերտները ներկայացրեցին ամենատարբեր հնարավոր ու անհնարին լուծումներով պատրաստած ոչ սովորական տոնածառերը: Մասնակիցները պարգևատրվեցին խրախուսական նվերներով: Տոնական հանդիսությունն ավարտվեց գեղեցիկ վալսով և 2015 թվականը հրաշքների տարի տեսնելու սպասումով…

ԷԹԵՐԻ ՄԱՄՈՒԼՅԱՆ