ԽՈՅԻ, ԱՅԼ ՈՉ ԹԵ "ԿԱԶՅՈԼԻ" ՏԱՐԻ

ԽՈՅԻ, ԱՅԼ ՈՉ ԹԵ "ԿԱԶՅՈԼԻ" ՏԱՐԻ

Հարգելի ընթերցող, ահա եւ մուտք ենք գործում 2015 թվական: 2014-ը լեցուն էր դրամատիկ իրադարձություններով` ե՛ւ ներքին խժդժություններ հրահրելու փորձեր, ե՛ւ գնալով կատարելագործվող ռազմական սադրանքներ` մազութային սուլթանատի կողմից, ե՛ւ կատաղի գրոհ հայկական դրամի եւ Հայաստանի տնտեսության դեմ: Եղավ նաեւ կարեւորագույն, կարելի է ասել` դարակազմիկ իրադարձություն` Հայաստանի մուտքը ԵՏՄ:
2015-ը սկսում ենք որպես եվրասիական քաղաքակրթության կարեւորագույն հանգույց: Դա նաեւ ապահովում է մեզ քաղաքակրթական հովանոցով, որի ներքո այլեւս կարող ենք հաջողությամբ դիմագրավել գլոբալացման գործընթացի բերած երեւույթներին` պետական ինքնիշխանության, ազգային ինքնության, ավանդույթի եւ բարոյականության քայքայմանը:
2015-ին լրանում է Հայոց ցեղասպանության 100-ամյակը: Բայց վստահաբար կարող ենք ասել, որ այլեւս երկրորդ անգամ դա չի կարող կրկնվել, քանզի ունենք տարածաշրջանի լավագույն բանակը: Ռազմականացման ինդեքսով մենք աշխարհում երրորդն ենք, իսկ հայոց մեջ քաջարի ռազմիկի ոգու վերածնունդը մեր զորականներին դարձնում է առավելագույն արդյունավետ կռվողներ: Իսկ մեր 100-ամյա ողբերգության կապակցությամբ արդեն կուտակվել են բավարար նախադրյալներ, որպեսզի ճանաչման փուլից արդեն մուտք գործենք փոխհատուցման փուլ:
Ինչեւէ, չնայած առջեւում անորոշություններ կան, սակայն կարող ենք վստահաբար նայել մեր ապագային: 2015-ը մեզ համար լինելու է հզոր եւ համարձակ խոյի, այլ ոչ թե տակից վատություններ անող "կազյոլի" տարի:

Շնորհավոր Ամանոր եւ Սուրբ ծնունդ: