ԱՐԾՎԻԿ ՄԻՆԱՍՅԱՆ. «ՎԱՀԵ ԷՆՖԻԱՋՅԱՆԻ ԲԱՌԱՊԱՇԱՐԸ ԼԻԱՐԺԵՔ ՏԵՂԱՎՈՐՎՈՒՄ Է «ԱՆԱՍՆԱՖԵՐՄԱ» ԳՐՔԻ ԲԱՌԱՊԱՇԱՐԻ ՄԵ

ԱՐԾՎԻԿ ՄԻՆԱՍՅԱՆ. «ՎԱՀԵ ԷՆՖԻԱՋՅԱՆԻ ԲԱՌԱՊԱՇԱՐԸ ԼԻԱՐԺԵՔ ՏԵՂԱՎՈՐՎՈՒՄ Է «ԱՆԱՍՆԱՖԵՐՄԱ» ԳՐՔԻ  ԲԱՌԱՊԱՇԱՐԻ ՄԵՋ»

ՀՅԴ պատգամավոր Արծվիկ Մինասյանի հարցազրույցից հետո շարունակվում է ՀՅԴ-ԲՀԿ փոխհրաձգությունը:

Հիշեցնենք` ՀՅԴ պատգամավոր Արծվիկ Մինասյանը հայտարարել էր, որ երկրում փոփոխությունները  մեկ անձով պայմանավորելը բոլշեւիկյան կլասիկ մոտեցում է: Այս հայտարարությունից հետո հաջորդեց ԲՀԿ պատգամավորներ Վահան Բաբայանի ու Վահե Էնֆիաջյանի պատասխանները:  Վահան Բաբայանն Արծվիկ Մինասյանին դհոլ էր անվանել, իսկ Վահե Էնֆիաջյանը հայտարարել. «Ընկեր Արծվիկը փորձում է վաստակել «իշխանական կերակրատաշտի թիվ 1 կլիենտ» տիտղոսը»:

«Իրավունքը» ՀՅԴ պատգամավոր Արծվիկ Մինասյանից հետաքրքրվեց` հնարավո՞ր է  նա դիմի էթիկայի հանձնաժողով իր հասցեին հնչեցված  գնահատականների համար: «Այս պահին դեռ ոչ: Մանավանդ կարծում եմ պատասխանս պետք է որ բավարարի: Բայց եթե այս ամենը շարունակվեց, այլ միջոցառումներ էլ կանեմ»,- ասաց պատգամավորը:

Հստակեցրինք` էթիկայի հանձնաժողով դիմելը չի բացառվում. «Իհարկե, չեմ բացառում, բայց նաեւ չեմ պնդում`կախված իրավիճակի զարգացումից»:

Քաղաքական գործչի խոսքով` ինքը նպատակ չի ունեցել անձնապես որեւէ մեկին վիրավորել, բայց երբ ճշմարտությունը ասվում է, դրա դեմ ոչ թե պետք է վիրավորանքը հնչի, այլ հակափաստարկ: «Ես  ափսոսում եմ, որ Ազգային ժողովի կարգավիճակը փչացում են Վահան մարդիկ, որ նման պահվածքը ոչ միայն իրենց, այլեւ ԱԺ-ին է հեղինակազրում, հասարակության մեջ ձեւավորում է անհանդուրժողական մոտեցում տարբեր կարծիքների նկատմամբ»,- ասաց Ա. Մինասյանը:

Հարցին`հնարավո՞ր է կոնֆլիկտի մասնակիցները հանդիպեն, առանձին խոսեն ու փորձեն հարթել ստեղծված իրավիճակը, պատգամավորն ասաց. «Կարծում եմ` առաջին հերթին իրենք պետք է նախաձեռնեին նման հանդիպում մինչ նման արտահայտություններ անելը: Հետեւաբար, չեմ կարող ասել, թե հետագայում ինչ զարգացումներ կլինեն»:

Պրն Մինասյանը նաեւ նշեց, որ չի ցանկանում ԲՀԿ-ին վերագրել այդ երկու պատգամավորների պահվածքը, բայց եթե ԲՀԿ-ը, չկանխի, համարժեք գործողություններ չձեռնարկի, ապա ինքը ստիպված կլինի այդ պահվածքը վերագրել  ԲՀԿ-ին. «ԲՀԿ-ում կան նորմալ, բարեկիրթ, պետությունը սիրող, պետականությունւ հարգող  մարդիկ: Եթե այդ ուժը չի արձագանքում իր ներկայացուցիչների պահվածքին, հետագայում ես գնահատական կհնչեցնեմ»:

Ինչ վերաբերում է ԲՀԿ պատգամավոր Վահան Բաբայանին  հաջորդած  ԲՀԿ մեկ այլ պատգամավոր Վահե Էնֆիաջյանի` Արծվիկ Մինասյանին ուղղված գնահատականներին, ՀՅԴ պատգամավորն այսպես արձագանքեց. «Նրա  օգտագործած,  կամ նրա անունից հրապարակված տեքստի բառապաշարը լիարժեք տեղավորվում է «Անասնաֆերմա» գրքի  բառապաշարի մեջ: Եվ Վահե Էնֆիաջյանը, եթե հայտնվեր էդ ֆերմայում, ինչը վստահաբար իրատեսական է, քանի որ էդ սցենարն այնտեղ նկարագրված է, Էնֆիաջյանը կարժանանար երկրորդ կարգի հերոս-անասուն կարգավիճակին: Եվ եթե մի քիչ էլ ձգտի, նաեւ բարձրագույն կոչում կստանա` առաջին աստիճանի հերոս-անասուն»:

ՍՈՆԱ ԴԱՎԹՅԱՆ