ԶԱՐՄԱՆՔ

Գնալով դաշնակները, կարծես թե, ավելի ու ավելի մտքափոխ են լինում: Եվ ահա դատելով ՀՅԴ խմբակցության ղեկավար ԱՐՄԵՆ ՌՈՒՍՏԱՄՅԱՆԻ խոսքից, ՀՅԴ-ն արդեն իսկ զարմանալիորեն հեռու է ե՛ւ ԲՀԿ-ից, ե՛ւ ՀԱԿ-ից, ե՛ւ "Ժառանգությունից", ե՛ւ նույնիսկ հերթական անգամ ընդդիմադիր գրված ՕԵԿ-ից. "Եթե աշխատում ես Ազգային ժողովում, դու չես կարող ինչ-որ բանի հասնել` առանց քաղաքական մեծամասնության հետ համագործակցության: Պետք չէ բարիկադավորել հասարակությանը, հակառակը` պետք է ցույց տալ, որ առանց բարիկադների հնարավոր է հարցեր լուծել: Ի՞նչ, եթե մենք ընդդիմություն ենք, ուրեմն չպետք է որեւէ տեղ հարաբերվենք իշխանությունների հե՞տ: Բայց չէ՞ որ դա նշանակում է չմասնակցել պետության գործերին": Դե ինչ, մնում է, որ Ռուստամյանի արտահայտած պարզ ճշմարտությունը մտնի նաեւ այլ ընդդիմադիրների գլուխները: Թե չէ կամաց-կամաց գնալով վերածվում են քաղաքական աղանդների:
Մեզ բավականին զարմացրեց ԿԲ նախագահ ԱՐԹՈՒՐ ՋԱՎԱԴՅԱՆԸ, հայտարարելով. "Մենք օգտագործում ենք մեր ամբողջ գործիքակազմը, ընդունել ենք տարբեր որոշումներ, անհատական աշխատանք ենք տանում բանկերի բաժնետերերի հետ: Այն դեպքում, եթե բացահայտվի որեւէ սպեկուլյատիվ գործողություն, բանկերը կենթարկվեն խստագույն պատասխանատվության": Բայց ի՞նչ է նշանակում "եթե", երբ ակնհայտից ակնհայտ էին սպեկուլյացիաները, այն էլ այն սպեկուլյացիաները, որոնք դիվերսիոն գործողությունից չէին տարբերվում: Հիմա ինչ, բոլորի տեսածը պարոն Ջավադյանը չէ՞ր նկատել, թե պարզապես ձեւ էր անում, որ չէր նկատում:
Իսկ այժմ քաղաքական դաշտում աննկատ դարձած, բայց ժամանակին "Փարաքարը փակելու" խոստումով աչքի ընկած ԱՐԱՄ ԿԱՐԱՊԵՏՅԱՆԻ սիրտը հանկարծ սոցիալական բունտ ուզեց. "Սոցիալականի հիմքի վրա համակարգային քաղաքական փոփոխություններ կարող են լինել: Սոցիալական վիճակն այնքան կարող է վատթարանալ, որն իր հերթին նոր համակարգի ձեւավորման անհրաժեշտության կբերի` բունտերի ու խժդժությունների միջոցով": Ինչպես կասեր ժողովուրդը` բերանդ խերով բաց արա: Տվյալ դեպքում` փարաքարափակիչի մաղթանքը, բառիս բուն իմաստով, նմանվում է անեծքի եւ, ըստ էության, քաղաքական թուղթուգիր է: Բայց կարծում ենք, որ Նոր տարին ի վերջո կկտրի բոլոր տեսակի թունավոր բաղձանքներն ու մաղթանքները:
Իսկ մեր հայրենակիցները զարմանալիորեն իրար հետ կռիվ ու թշնամություն են անում անգամ օտարության մեջ: Այսպես, Իսպանիայի ԲԱՐՍԵԼՈՆԱ քաղաքում օրերս տեղի է ունեցել ՀՀ մի քանի քաղաքացիների տուրուդմբոց, այն էլ ուր` Հայաստանի հյուպատոսարանի շենքի մուտքի մոտ: Ու այնպիսի տուրուդմբոց, որ 2 հոգի դանակահարվեցին, եւ նրանցից մեկի կյանքը բժիշկները չկարողացան փրկել: Զարմանալի է` իրար չեք հարգում, ձեր գլուխը ձեր պատովը, բայց գոնե հյուպատոսարանի շենքին ծածանվող ՀՀ պետական դրոշը հարգեիք:
Բայց բոլոր դեպքերում նույնիսկ արտերկրում ունենք հայրենակիցներ, ովքեր մեզ դրականորեն են զարմացնում: Այսպես, Ռուսաստանի Խաղաղօվկիանոսյան նավատորմի հրամանատար, փոխծովակալ ՍԵՐԳԵՅ ԱՎԱԳՅԱՆՑԸ արժանացել է ծովակալի կոչմանը, քանզի փայլուն կերպով է իրեն դրսեւորել վերջին "Արեւելք-2014" ռազմավարական զորավարժությունների ժամանակ: Եվ ի դեպ, այդ փայլուն զինվորականը պարզվում է երեւանցի է: Ահա այդպիսի մարդկանց է աշխարհին տալիս մեր` Հռոմից էլ հին մայրաքաղաքը:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ