ՍՆՆԴԻ ՊԵՏԱԿԱՆ ՏԵՍՉՈւԹՅՈւՆ. «ՄՈՒՇ»-ՈՒՄ ԼՎԱՑԱՐԱՆՆԵՐԸ ԱՊԱՀՈՎՎԱԾ ՉԵՆ ԵՂԵԼ ՉՈՐԱՑՄԱՆ ՀԻԳԵՆԻԿ ՍԱՐՔԵՐՈՎ

ՍՆՆԴԻ ՊԵՏԱԿԱՆ ՏԵՍՉՈւԹՅՈւՆ. «ՄՈՒՇ»-ՈՒՄ

ԼՎԱՑԱՐԱՆՆԵՐԸ ԱՊԱՀՈՎՎԱԾ ՉԵՆ ԵՂԵԼ ՉՈՐԱՑՄԱՆ

ՀԻԳԵՆԻԿ ՍԱՐՔԵՐՈՎ

Ինչպես հայտնի է Սննդամթերքի անվտանգության պետական ծառայությունն ավելի վաղ իր հայտարարությունում նշել էր, որ Եղվարդի թիվ 1 մանկապարտեզ մատակարարված հավի մսի, ձվի, տավարի մսի, կարագի, պանրի ուսումնասիրություններից պարզվել է, որ որակի անհամապատասխանություն չի եղել, իսկ տոմատի մածուկի ու խտացրած կաթի ուսումնասիրությունները դեռ ընթացքի մեջ են: Հայտարարությունում նշված էր նաեւ, որ թունավորման նախորդ օրը երեխաներին տրվել է «Մուշ» ընկերության արտադրած նրբերշիկ, եւ որ ծառայության պետի կողմից հանձնարարական է տրվել` «Մուշ» ՍՊԸ-ում իրականացնել ստուգում: Հայտարարության տեքստից ստացվում էր, որ ստուգումը «Մուշ» ընկերությունում պայմանավորված է հենց թունավորման դեպքով: Իսկ, թե, ինչ արդյունքներ են արձանագրվել վերոնշյալ արտադրամասում ստուգումների ընթացքում մեր գրավոր հարցմանը ՀՀ ԳՆ սննդամթերքի անվտանգության պետական ծառայությունից պատասխանել են հետեւյալը.

«Տեղեկացնում ենք Ձեզ, որ ՀՀ ԳՆ սննդամթերքի անվտանգության պետական ծառայության (այսուհետ` Ծառայություն) պետի հրամանի համաձայն սույն թվականի դեկտեմբերի 2-15-ն ընկած ժամանակահատվածում «Մուշ» ՍՊԸ- ում իրականացվել է ստուգում: Ստուգման ժամանակահատվածում պատրաստի արտադրանքից (նրբերշիկ, երշիկ կիսաապխտած, երշիկ հում ապխտած, երշիկ եփած) կատարվել է նմուշառում եւ տրվել լաբորատոր փորձաքննության: Լաբորատոր փորձաքննության արձանագրությունների համաձայն` նմուշներում անհամապատասխանություններ չեն արձանագրվել: Ստուգման ժամանակահատվածում արտադրական տարածքներում գտնվող ձեռքերը լվանալու համար նախատեսված լվացարանները ապահովված չեն եղել չորացման հիգիենիկ սարքերով: Ստուգման ժամանակահատվածում առկա թերությունը շտկվել է: Ի լրումն դրան` հայտնում ենք, որ ՀՀ կառավարության 2014թ. Փետրվարի 28-ի` 338-Ն որոշման 3 հավելվածի 8.10, 8.11, 8.12, 8.13 կետերի համաձայն մասնագետների կողմից ուսումնասիրվել են «Մուշ» ՍՊԸ-ի արտադրանքը մատակարարող տրանսպորտային միջոցները: Արդյունքում տրանսպորտային միջոցների սանիտարահիգիենիկ պահանջների անհամապատասխանություն չի արձանագրվել: Ներկայումս ստուգման արդյունքները գտնվում են ամփոփման փուլում»:

Հավելենք, որ, ըստ հանրության շրջանում տարածված լուրերի, ոչ միայն «Մուշ» ՍՊԸ-ի արտադրանքը առաքող ավտոմեքենաներն են գտնվում սանիտարահիգենիկ ոչ պատշաճ վիճակում, այլ նաեւ պահեստները, որտեղ պահվում է մսամթերքը:

ԻԼՈՆԱ ԱԶԱՐՅԱՆ